ގުޅީފަޅުގެ ވެލިގަނޑު ހަމަޖެހެމުންދާ ގޮތުގެ ދިރާސާއެއް މިހާތަނަށް ހަދާފައި ނެތް ނަމަވެސް އެތަނުގައި އިންފްރާސްޓްރަކްޗާގެ މަސައްކަތް ކުރިއަށްގެންދަން ސަރުކާރުން ނިންމައިފި އެވެ.
ގުޅީފަޅުގައި 4000 ހައުސިން ޔުނިޓް އެޅުމުގެ މަސައްކަތް މި އަހަރު ފަށަން ނިންމާފައިވާ ކަމަށް ވިދާޅުވީ ހައުސިން މިނިސްޓްރީގެ ސްޓޭޓް މިނިސްޓަރު އަހުމަދު ނާޒިމް އެވެ. އޭނާ ވިދާޅުވީ، އިންޑިއާގެ އެލްއޯސީއެއްގެ ދަށުން ކުރިއަށްގެންދާ އެ ޕްރޮޖެކްޓުގެ އަމަލީ މަސައްކަތް މި އަހަރު ފަށާނެ ކަމަށެވެ.
ގުޅީފަޅުގެ ފުން ސަރަހައްދަކީ ރާއްޖޭގައި މިހާތަނަށް ހިއްކި އެންމެ ފުން ތަނެވެ. ހިއްކުމުގެ ކުރިން އެތަނުގެ ފުން މިނުގައި 15 މީޓަރު ހުއްޓެވެ. މި ސަރަހައްދު ހިއްކުމަށްފަހު ބިންގަނޑު ހަމަޖެހެމުންދާ ގޮތުގެ ފުރިހަމަ ދިރާސާއެއް ނުހަދާ، އުމްރާނީ ތަރައްގީގެ އެއްވެސް މަޝްރޫއެއް ކުރިއަށްގެންދިޔުން ނުރައްކާތެރިވާނެ ކަމަށް މާހިރުން މިހާރު ދަނީ ބުނަމުންނެވެ.
"ގުޅީފަޅުގައި މުަސްތަގުބަލުގައި ދިރިއުޅޭނެ ރައްޔިތުންގެ ރައްކާތެރިކަމާއި ލިބިދާނެ މާލީ ގެއްލުމާއި ގެއްލިދާނެ ވަގުތަށް ބަލާއިރު، ގުޅީފަޅުގެ ބިންގަނޑު ހަމަޖެހެމުންދާ ގޮތުގެ ދިރާސާތަކެއް ނުހަދާ އެތަން ތަރައްގީ ކުރާކަށްނުވާނެ،" ދިވެހި ކޯސްޓަލް އިންޖިނިއަރެއް ކަމަށްވާ ނަޝްވާން މަތީން އެކްސްގައި ކުރެއްވި ޕޯސްޓެއްގައި ވިދާޅުވި އެވެ.
ސެޓެލައިޓް ބޭނުންކޮށްގެން ދިރާސާކުރުމުގެ މަސައްކަތް ވެސް ކުރައްވާ ނަޝްވާން އިތުރަށް ވިދާޅުވެފައި ވަނީ، ބިންގަނޑު ރަނގަޅަށް ހަމަނުޖެހެނީސް އިމާރާތްތަކާއި އުމްރާނީ ތަރައްގީގެ އެހެނިހެން މަސައްކަތްތައް ކުރިއަށްގެންގޮސްފި ނަމަ ނުރައްކާތެރި ހާދިސާއެއް ހިނގުން އެކަށީގެންވާ ކަމަށެވެ.
"ބިންގަނޑު ރަނގަޅަށް ހަމަނުޖެހޭ ނަމަ، އިމާރާތްތައް އަރިވެ، ގަނބައިގަތުމުގެ އިތުރުން ވެއްޓިދާނެ. ބިންގަނޑު ހަމަނުޖެހޭ ނަމަ ޔުޓިލިޓީ އާއި މަގުތައް ވެސް ހަލާކުވާނެ. އެހެން ސަރަހައްދުތަކަށް ވުރެ ގުޅީފަޅުގެ ފުން ސަރަހައްދުގައި މި މައްސަލަ ބޮޑުވެދާނެ،" ނަޝްވާން ވިދާޅުވެފައިވެ އެވެ.
