ތިލަފުށީ ބަނދަރުގެ ހެދުމުގެ މަސައްކަތް ޗައިނާގެ ކުންފުންޏަކަށް ދިނީ، އިންޑިއާ ދުރު ކުރުމަށްފަހު ކަމަށް ދެކެވޭ ވާހަކަ ދިވެހި ސަރުކާރުން ދޮގުކޮށްފި އެވެ.
މާލޭ ވިޔަފާރި ބަނދަރު ތިލަފުއްޓަށް ބަދަލު ކުރުމުގެ ޕްރޮޖެކްޓުގެ ފުރަތަމަ ފޭސް ޗައިނާ ހާބާ އިންޖިނިއަރިން ކޮމްޕެނީއާ ހަވާލު ކުރީ ފެބްރުއަރީ، 2026، ގަ އެވެ.
އެ ވާހަކަ މި ދުވަސްވަރު އިންޑިއާގެ ނޫސްތަކުގައި އަންނަނީ ލިޔަމުންނެވެ. ތިލަފުށީ ޕޯޓު ޗައިނާގެ ކުންފުންޏަކަށް ދިނީ އެތަން ބިނާ ކުރަން އެހީތެރިވެދެއްވުމަށް ތައްޔާރަށް ހުންނެވި ކަމަށް އިންޑިއާގެ ބޮޑުވަޒީރު ނަރެންދުރަ މޯދީ އޮކްޓޯބަރު، 2024، ގައި ވިދާޅުވެފައި އޮއްވަ އެވެ.
އިނގިރޭސި ބަހުން މިއަދު ނެރުނު ބަޔާނުގައި އިގްތިސާދީ މިނިސްޓްރީ އިން ބުނީ، އެ ނިންމުމަކީ ވަކި ގައުމަކާ މެދު ރާއްޖެއިން ދެކޭ ގޮތް ހާމަވާ ނިންމުމެއް ނޫން ކަމަށެވެ.
"މި ޕްރޮޖެކްޓު އެވޯޑުކޮށްފައި ވަނީ މި ބާވަތުގެ ޕްރޮޖެކްޓުތައް އެވޯޑް ކުރުމަށް ހަމަޖެހިފައިވާ ގާނޫނުތަކާއި އިޖުރާއަތުތަކާ އެއްގޮތަށް. އެ ނިންމުން ނިންމާފައި ވަނީ ރާއްޖޭގެ ދުރު ރާސްތާގެ ތަރައްގީއަށް ރިއާޔަތް ކުރުމަށްފަހު. އެ ނިންމުމަކީ ވަކި ގައުމަކާމެދު ދެކޭ ގޮތް ހާމަވާ، އަދި ވަކި ގައުމަކާ މެދު އޮތް ގުޅުމަކަށް ބަދަލެއް ވެސް އަންނާނެ ނިންމުމެއް ނޫން،" އެ ބަޔާނުގައި ބުނެފައިވެ އެވެ.
ތިލަފުށީ ބަނދަރު ހެދުމުގެ ފުރަތަމަ ފޭސްގެ ދަށުން ޗައިނާ ކުންފުންޏާ ހަވާލު ކުރީ ބަނދަރު ހެދުމުގެ ދިރާސާ އާއި ޑިޒައިންގެ މަސައްކަތެވެ. އޭގެ އިތުރުން ބަނދަރުގެ ކީވޯލް އެޅުން އެމްޓީސީސީއާ ވަނީ ހަވާލުކޮށްފަ އެވެ.
ތިލަފުށީ ބަނދަރު ހެދުމުގެ މަސައްކަތް ޗައިނާއަށް ދިނުމުން އިންޑިއާ އާއި އެމެރިކާއިން ވެސް ކަންބޮޑުވުން ފާޅުކުރިކަން މި ނޫހަށް އެނގިފައިވެ އެވެ. އޭގެ ފަހުން އެމެރިކާ ސަރުކާރުގެ ސީނިއާ އޮފިޝަލުންތަކެއް ވަނީ ތިލަފުށީ ބަނދަރު ހަދާ ސައިޓަށް ޒިޔާރަތެއް ވެސް ކޮށްފަ އެވެ.
