ޔަހޫދީންނާ ދެކޮޅު ހިޔާލުތަކެއް ފާޅުކުރި ކަމަށް ބުނެ، ރެޕް ލަވަކިޔުންތެރިޔާ ކާންޔޭ ވެސްޓުގެ ޓްވިޓާ އަދި އިންސްޓަަގްރާމް އެކައުންޓް ސަސްޕެންޑުކޮށްފި އެވެ.
އޭނާގެ އިންސްޓަގްރާމް އެކައުންޓް ފާއިތުވި ހަފުތާ ބަންދުގައި ސަސްޕެންޑް ކުރީ ރެޕް ލަވަކިޔުންތެރިޔާ ޑިޑީއަކީ ޔަހޫދީންގެ ބާރުގެ ދަށުގައި ހުރި މީހެއް ކަމަށް ބުނުމުންނެވެ.
އޭގެ ފަހުން ކާންޔޭ ވެސްޓް ކުރި ޓްވީޓެއްގައި ވެސް ވަނީ ޔަހޫދީންނަށް ފާޑުކިޔައިފަ އެވެ. އެއާ އެކު ޓްވިޓާއިން ވެސް އޭނާ ސަސްޕެންޑު ކުރި އެވެ.
ސޯޝަލް މީޑިއާގެ ދެ ޕްލެޓްފޯމުން ވެސް ބުނީ ކާންޔޭ ވެސްޓް ވަނީ ނަަފުރަތު އުފެއްދުމާ ދެކޮޅަށް އެ ޕްލެޓްފޯމްތަކުން ގެންގުޅޭ ސިޔާސަތާ ހިލާފުވެފައި ކަމަށެވެ.
މި މައްސަލަ ފެށުނީ ފާއިތުވި ހަފުތާގައި ކުރިއަށް ދިޔަ "ޕެރިސް ފެޝަން ވީކް" ގައި "ވައިޓް ލަައިވްސް މެޓާ" ޖަހާފައިވާ ޓީޝާޓެއް ކާންޔޭ ވެސްޓް ލައިގެން ހުރުމުންނެވެ.
ކަޅު ނަސްލުގެ މީހުންގެ ހައްގުތަކަށް ގޮވާލައި ފެށި "ބްލެކް ލައިވްސް މެޓާ" ހަރަކާތުގެ ސްލޯގަން އެގޮތަށް ބޭނުން ކުރުމުން ރެޕް ލަވަކިޔުންތެރިޔާ ޑިޑީ އޭނާއަށް ފާޑުކިޔެވެ.
ކާންޔޭ ވެސްޓަކީ ނަފުސާނީ ގިނަ މައްސަލަތަކެއް ދިމާވެ، މީގެ އަހަރުތަކެއް ކުރިން ބައިޕޯލާ ޑިސްއޯޑާ ހުރި މީހެކެވެ.
އޭނާގެ ކެރިއަރުގައި މީހުންގެ ފާޑުކިޔުން އަމާޒުވާ ވަރަށް ގިނަ ކަންކަން ކޮށްފައި އެބަ ހުއްޓެވެ. އެކަމަކު ފަހަކަށް އައިސް އެކަންކަން އިތުރުވެ، އޭނާގެ ވިޔަފާރިތަކަށް އަސަރު ކުރުމުގެ ނުރައްކާ އެބަ އޮތެވެ.
