ރައްޔިތުންގެ މަޖިލީހުގެ ކުރީގެ މެމްބަރު މުހައްމަދު "ކާނަލް" ނަޝީދު، އެމްޑީ އަލަމްގީރާއެކު ބަދުއަހުލާގީ އަމަލު ހިންގާ މަންޒަރު ފެންނަ ކަމަށް ތުހުމަތުވާ ވީޑިއޯގެ ތާޑް ޕާޓީ އެނަލަސިސްއެއް ހެދުމުގެ ހުއްދައަށް ޝަރީއަތުގައި އޭނާ އެދިއްޖެ އެވެ.
ނަޝީދުގެ މައްޗަށް ކުރާ ދައުވާގެ އަޑުއެހުންތައް ކުރިއަށްގެންދާނީ މީހުންނަށް ނުވަދެވޭ ގޮތަށް ސިއްރުކޮށްގެންނެވެ.
ކުރީގެ މެމްބަރު އަދި ޑީއާރްޕީގެ ކުރީގެ ލީޑަރު ނަޝީދަކީ އަލަމްގިރިއާއެކު ގުޅުން ހިންގި މަންޒަރު އާންމުވި ވީޑިއޯތަކުގެ ތެރޭގައި ނަޝީދުގެ ވީޑިއޯއެއް ހިމެނެ އެވެ.
މިއަދު ހެނދުނު ކްރިމިނަލް ކޯޓުގައި އޮތް އަޑުއެހުމުގައި ކުރިއަށް ގެންގޮސްފައިވަނީ ޝަރީއަތަށް ހުށަހެޅި ހެކި ރައްކާތެރިކުރުމުގެ އަމުރަށް އެދިފައިވާތީ އެކަމަށް ގޮތެއް ކަނޑައެޅުމެވެ.
އެގޮތުން، ދައުލަތުން ވަނީ ހެކީގެ ގޮތުގައި ހުށަހަޅާފައިވާ ވީޑިއޯ ނަޝީދަށް ދިނުމުގެ ބަދަލުގައި، ކޯޓުން އިންތިޒާމުކުރާ ގޮތެއްގެ މަތީން އެ ތަކެތި ދިރާސާކުރުމުގެ ފުރުސަތު ދިނުމަށް އެދިފަ އެވެ. ދެ ފަރާތުގެ ވާހަކަތަކަށް ބިނާކޮށް ޝަރީއަތުން ނިންމާފައިވަނީ މިގޮތަށް އަމަލު ކުރުމަށެވެ.
ވީޑިއޯގެ ތާޑްޕާޓީ އެނަލަސިސް ހެދުމަށް ނަޝީދުގެ ފަރާތުން އެދިފައިވާތީ، އެނަލަސިސް ހަދާ ފަރާތުގެ މައުލޫމާތު ލިޔުމުން ހުށަހެޅުމަށް ވަނީ އަންގާފަ އެވެ.
މި މައްސަލައިގައި ހިމެނޭ އަލަމްގީރު ވަނީ އޮރިޔާން ކާޑު ހެދުމުގެ 40 ދައުވާއަށް އިއުތިރާފުވެފަ އެވެ. އޭނާގެ މައްޗަށް އިއްވާފައިވަނީ ދެ އަހަރާއި ނުވަ މަހަށް ޖަލަށް ލުމަށެވެ.
އެ މައްސަލައިގައި ވީޑިއޯ ލީކުވި މީހުންގެ ތެރޭގައި ގާނޫނީ ވަކީލު ނާޒިމް އަބްދުއްސައްތާރު ވެސް ހިމެނެ އެވެ. އޭނާގެ މައްޗަށް ވެސް ދައުލަތުން އުފުލި ދައުވާ ސާބިތުވެ 2 މަސް ދުވަހުގެ ގޭބަންދު ހުކުމެއް ވަނީ އިއްވާފަ އެވެ.
