ނ. ވެލިދޫގައި ރޭގެ ވަގުތެއްގައި ހިންގި މާރާމާރީއެއްގައި އަނިޔާވި ޒުވާނާއަށް އިތުރު ފަރުވާ ދިނުމަށް މާލެ ގެނެސްފި އެވެ.
ފުލުހުންގެ މީޑިއާ އޮފިޝަލް ވިދާޅުވީ އެ ރަށުގައި މާރާމާރީއެއް ހިންގި ކަމުގެ މައުލޫމާތު ލިބުނީ ރޭ ދަންވަރު 12:30 ހާއިރު ކަމަށެވެ.
އެ މާރާމާރީގައި އަނިޔާވި އުމުރުން 19 އަހަރުގެ ޒުވާނާއަށް ރަށު ސިއްހީ މަރުކަޒުގައި ފަރުވާ ދިނުމަށް ފަހު މާލެ ގެނެސް، އައިޖީއެމްއެޗުގައި އިތުރު ފަރުވާ ދެމުން އަންނަ ކަމަށް ވެސް އޮފިޝަލް ވިދާޅުވި އެވެ.
އައިޖީއެމްއެޗްގެ މީޑިއާ އޮފިޝަލް ފޯނަށް ޖަވާބު ނުދޭތީ އޭނާގެ ސިއްހީ ހާލަތު މިހާރު ހުރި ގޮތް ވަނީ ސާފުވާ ގޮތް ނުވެފަ އެވެ.
އެ މާރާމާރީއާ ގުޅިގެން ފުލުހުން ވަނީ އުމުރުން 18 އަހަރުގެ ފިރިހެނަކު ކޯޓު އަަމުރެއްގެ ދަށުން ހައްޔަރުކޮށްފަ އެވެ. މައްސަލަ އިތުރަށް ތަހުގީގުކުރަމުން އަންނަ ކަމަށް ފުލުހުން ބުނެ އެވެ.
