ފުލުހަކަށް ބިރު ދައްކައި އިންޒާރު ދިން މައްސަލައެއްގައި، ފުލުހުން އިޖުރާއަތްތައް ފުރިހަމަ ނުކޮށް މީހަކު ހައްޔަރުކުރި ކަމަށް ބުނެ ކްރިމިނަލް ކޯޓުން ދޫކޮށްލި އެ މީހާ އަނެއްކާ ވެސް ހައްޔަރުކޮށްފި އެވެ.
މާލޭގައި ހަރަކާތްތެރިވާ ގޭންގެއްގެ މީހަކު ވައްކަމުގެ ތުހުމަތަށް ހައްޔަރު ކުރުމުން، ސެޕްޓެމްބަރު 18، ގައި އެ ގޭންގަށް ނިސްބަތްވާ ކަމަށް ބެލެވޭ މީހަކު ވަނީ މާފަންނު ޕޮލިސް ސްޓޭޝަނަށް ވަދެ ފުލުހުންނަށް ބިރު ދައްކައި އިންޒާރު ދީފަ އެވެ. އެ މައްސަލައިގެ ތުހުމަތުގައި ފުލުހުން މީގެ ކުރިން ހުޅުމާލެ، ގޯތި ނަންބަރު 11399، މުހައްމަދު އަޒުހާން އިސްމާއީލް (31 އ) ހައްޔަރުކުރި އެވެ.
ނަމަވެސް އޭނާގެ ބަންދާ މެދު ގޮތެއް ނިންމުމަށް ކްރިމިނަލް ކޯޓަށް ހާޒިރު ކުރުމުން، އިސް ގާޒީ އަހުމަދު ޝަކީލް ނިންމެވީ އޭނާ ހައްޔަރުކުރީ އިޖުރާއަތްތަކާ ހިލާފަށް ކަމަށެވެ. ސަބަބަކީ އޭނާ ހައްޔަރުކުރީ ކުށުގެ ވެށިން ނޫން ކަމަށް ވާއިރު، އެ ގޮތަށް ހައްޔަރުކުރަން ކޯޓު އަމުރެއް ބޭނުންވާތީ އެވެ.
އޭނާ މިއަދު ހެނދުނު ދެވަނަ ފަހަރަށް ހައްޔަރުކޮށްފައިވާކަން ފުލުހުން ކަަށަވަރުކޮށްދެ އެވެ. އޭނާ ހައްޔަރުކޮށްފައިމިވަނީ، އޭނާ ހޯދުމަށް އާންމުންގެ އެހީތެރިކަމަށް އެދި މިދިޔަ އާދީއްތަ ދުވަހު ފުލުހުން އިއުލާން ވެސް ކޮށްފައި ވަނިކޮށެވެ.
