އުތުރު ކޮރެއާއިން ޖަޕާނު މަތިން ބެލިސްޓިކް މިސައިލެއް ފޮނުވައިފި އެވެ.
އެ މިސައިލް ދަތުރު ކުރީ 4،500 ކިލޯމީޓަރުގެ ސަރަހައްދަކަށެވެ. ޖަޕާނު ހުރަސްކޮށް ގޮސް، މިސައިލް ވެއްޓުނީ ޕެސިފިކް ކަނޑަށެވެ. އެއީ އެމެރިކާގެ ގުއާމް ރަށާ ކައިރި އެވެ.
މިއީ 2017 ވަނަ އަހަރަށް ފަހު އުތުރު ކޮރެއާއިން ޖަޕާން މަތިން ފޮނުވި ފުރަތަމަ މިސައިލެވެ.
މިސައިލާ ގުޅިގެން ޖަޕާނުން ބައެއް ރައްޔިތުންނަށް ފޮނުވި އެލާޓުގައި އެންގީ ރައްކާތެރިވެ ތިބުމަށެވެ. އެމެރިކާ އާއި ދެކުނު ކޮރެއާއިން ރައްދުގައި އެޅި ފިޔަވަޅަކީ ބޮން އެޅުމުގެ ތަމްރީނެއް ހިންގުމެވެ.
ދެކުނު ކޮރެއާގެ ހަތަރު އަސްކަރީ ވައިގެ އުޅަނދާއި އެމެރިކާގެ ހަތަރު އަސްކަރީ ވައިގެ އުޅަނދު އެ ތަމްރީނުގައި ބައިވެރިވި އެވެ. އެގޮތުން ޔެލޯ ސީގައި އޮންނަ ފަޅު ރަށަކަށް ބޮން އެޅި އެވެ. ދެ ގައުމު ގުޅިގެން ނެރުނު ބަޔާނުގައި ބުނީ އުތުރު ކޮރެއާގެ ނުރައްކަލާ ދެކޮޅަަށް ދެކުނު ކޮރެއާ އާއި އެމެރިކާ އެކުގައި ތެދުވަން ފަސްނުޖެހޭނެ ކަމަށެވެ.
އދ. އިން ވަނީ އުތުރު ކޮރެއާއިން ބެލިސްޓިކް މިސައިލާއި ނިޔުކްލިއާ ހަތިޔާރު ޓެސްޓު ކުރުން މަނާކޮށްފަ އެވެ. އޭގެ އިތުރުން ކުރިން އެންގުމެއް ނެތި އެހެން ގައުމުތަކާ ދިމާލަށް އަދި އެ ގައުމުތަކުގެ މަތިން މިސައިލް ފޮނުވުމަކީ ބައިނަލްއަގްވާމީ ހަމަތަކާ ހިލާފު ކަމެކެވެ.
އެފަދަ އަމަލަކީ ހަމަލާއެއް ކަމަށް ހީވެދާނެތީ ގިނަ ގަައުމުތަކުން އެކަމެއް ނުކުރެ އެވެ. އަންގާރަ ދުވަހުގެ މިސައިލަކީ އުތުރު ކޮރެއާއިން މިހާތަނަށް ފޮނުވި އެންމެ ދުރު ރާސްތާގެ މިސައިލެވެ. އޭތި ދަތުރު ކުރީ 1000 ކިލޯމީޓަރު މަތިންނެވެ. އެއީ ދުނިޔެ ވަށައި ބުރު ޖަހަމުންދާ އިންޓަނޭޝަނަލް ސްޕޭސް ސްޓޭޝަން (އައިއެސްއެސް) އަށް ވުރެ އުހެވެ.
ޖަޕާނުގެ ބޮޑު ވަަޒީރު ފުމިއޯ ކިޝީޑާ ނުރުހުން ފާޅުކޮށް ވިދާޅުވީ އެއީ "ނުރައްކާތެރި އަމަލެއް" ކަމަަށެވެ. ޑިފެންސް މިނިސްޓަރު ޔަސުކާޒޫ ހަމާޑާ ވިދާޅުވީ ޖަޕާނުގެ ދިފާއީ ބާރު ވަރުގަދަ ކުރަން ފަސްނުޖެހޭނެ ކަމަށެވެ.
އުތުރު ކޮރެއާއިން މިސައިލް ފޮނުވި އިރު، ދެކުނު ކޮރެއާ އާއި ޖަޕާން އަދި އެމެރިކާއިން ގުޅިގެން ދަނީ ދިފާއީ ބާރު ވަރުގަދަ ކުރުމަށް މަސައްކަތް ކުރަަމުންނެވެ. މިދިޔަ ހަފްތާގައި ތިން ގައުމުން ކަނޑުމަތީގެ ތަމްރީންތަކެއް ބޭއްވި އެވެ.
މީގެ ކުރިން 2017 ވަނަ އަހަރު ޖަޕާނުގެ މަތިން ދެ މިސައިލް ފޮނުވިތާ ހަފްތާއެއް ފަހުން އުތުރު ކޮރެއާއިން ނިޔުކްލިއާ ޓެސްޓެއް ވެސް ކުރި އެވެ.
ޖާސޫސީ ތަކުރިބާކާރުން ބުނާ ގޮތުގައި މި ފަހަރު ވެސް އުތުރު ކޮރެއާއިން ނިޔުކްލިއާ ހަތިޔާރެއް ޓެސްޓު ކުރުމަށް ދަނީ ތައްޔާރުވަމުންނެވެ.
ބޮޑަށް ބެލެވެނީ އުތުރު ކޮރެއާއާ އެންމެ ގާތް ޗައިނާގެ ކޮމިއުނިސްޓް ޕާޓީގެ ކޮންގްރެސް މި މަހު ބޭއްވުމަށް ފަހު އެ ޓެސްޓު ކުރާނެ ކަމަށެވެ.
