ރާއްޖޭގައި ކެސިނޯ ހިންގެން ޖެހޭ ކަމަށް ވިދާޅުވެ، ކާށިދޫ ދާއިރާގެ މެމްބަރު އަބްދުﷲ ޖާބިރު ތަކުރާރުކޮށް ދައްކަވާ ވާހަކައަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދާއި ޔޫތު މިނިސްޓަރު އަހުމަދު މަހުލޫފު މިއަދު އެއްބާރުލުން ދެއްވައިފި އެވެ.
"ކެސިނޯ އަޅަން ރާއްޖޭގައި ހުއްދަ ނުދެނީ ކީއްވެތޯ" އެކި ވަޒީރުންނާ ޖާބިރު މީގެ ކުރިން ވެސް އެތައް ފަހަރަކު ސުވާލުކުރެއްވި އެވެ. މަޖިލީހުގައި ވަޒީރުންނާ ސުވާލުކުރުމުގެ ވަގުތުގައި ޔޫތު މިނިސްޓަރު އަހުމަދު މަހުލޫފާ ވެސް އޭނާ މިއަދު އެ ސުވާލު ކުރެއްވި އެވެ.
އެ ސުވާލަށް ޖަވާބު ދެއްވަން މިނިސްޓަރު މަހުލޫފަށް ފުރުސަތު ދެއްވުމުގެ ކުރިން ރިޔާސަތުން މަޖިލީހުގެ ރައީސް މުހައްމަދު ނަޝީދު ވިދާޅުވީ ކެސިނޯ ލައިސަންސް ދިނުމާ ގުޅޭ ސުވާލަކީ ތަކުރާރުކޮށް ނުކުންނަ ސުވާލެއް ކަމަށާއި އެއީ އެއްވެސް ގަވައިދަކުން މަނާކުރާ ކަމެއް ނޫން ކަމަށް ފާހަގަވާ ކަމަށެވެ.
"ފާހަގަވާ ކަމަކީ އެއީ [ކެސިނޯ ލައިސަންސް ދިނުމަކީ] އެއީ އެއްވެސް ގަވައިދަކުން މަނާކުރާ ކަމެއް ނޫން. އެހެން ނަމަވެސް ސާފު ގަވައިދުތަކެއް ރިޒޯޓްތަކަށް މި މަސައްކަތް ނުކުރެވި، އެ ހިދުމަތް ނުދެވި ވާކަމަށް ތަކުރާރުކޮށް އިއްޒަތްތެރި މެމްބަރުން ފާހަގަކުރައްވާ،" ނަޝީދު ވިދާޅުވި އެވެ.
ޖާބިރުގެ ސުވާލަށް ޖަވާބު ދެއްވަމުން މަހުލޫފު ވިދާޅުވީ ކެސިނޯގެ ވާހަކަ ރާއްޖޭގައި ދެއްކެން ނޯންނަ ކަމަށާއި އެ ވާހަަކަ ފެށިޔަސް ގޯސްވާ ކަމަށެވެ.
"ހަމަ ހަގީގަތަށް މިދެންނެވީ އިނގޭތޯ، އެ ނަން ކިޔަސް ގޯސްވާ ހިސާބުގައި. އެހެންވީމާ އެ އުޅެން ޖެހެނީ އެންމެން ބޮޑު ބިރުވެރިކަމެއްގައި. މިއިން ކަމަކާ ގުޅިގެން މަޝްވަރާކޮށްލާނެ ޖާގަ ވެސް، އެއީ އޮންނަ ކަމެއް ކަމަކަށް ނުވޭ. އެކަމަކު އިއްޒަތްތެރި މެމްބަރުގެ ވާހަކަފުޅުގައި ކުރީ ދުވަހު ވެސް ވިދާޅުވިހެން، ބަރާބަރަށް ރާ ވިއްކާ. އެހެން ހުރިހާ ސަކަރާތެއް ވެސް އެތަންތާގައި [ރިސޯޓުތަކުގައި] ޖަހާ،" މަހުލޫފު ވިދާޅުވި އެވެ.
އޭނާ ވިދާޅުވީ އެހެން ހުރިހާ ކަމަކާ ވެސް ވާހަކަ ދެއްކެން ޖެހޭ ކަމަށާއި މަޝްވަރާކޮށްގެން ގޮތްތައް ހޯދެން ޖެހޭ ކަމަށެވެ.
"އެކަހަލަ ހުރިހާ ކަމެއް. ހަމަ ޔޯގާއާ ތި ހުރިހާ އެއްޗެއްގައި. އަޅުގަނޑު ގަބޫލުކުރަނީ ހަމަ ހަގީގަތުގައި ވެސް އަަޅުގަނޑުމެންގެ މުޖުތަމައުގައި މިހެން ހުރި ހުރިހާ ކަމަކީ މަޝްވަރާކޮށްގެން ގޮތްތައް ހޯދަން ޖެހޭ ކަންތައްތައް. އެ ވާހަކަ ދެއްކެން އެބަ ޖެހޭ އަޅުގަނޑުމެންގެ ސޮސައިޓީގައި،" މަހުލޫފު ވިދާޅުވި އެވެ.
މީގެ ކުރިން މަޖިލީހުގައި ޖާބިރު އެ ވާހަކަ ދެއްކެވި ބައެއް ދުވަސް ދުވަހު އެއީ ދައްކައިގެން ވާނެ ވާހަކައެއް ނޫން ކަމަށް ވިދާޅުވެ، މަޖިލީހުގެ ބައެއް މެމްބަރުން އޭނާއަށް ރައްދު ދެއްވި އެވެ. އޭގެ ތެރޭގައި އެމްޑީޕީގެ ބައެއް މެމްބަރުން ވެސް ހިމެނިވަޑައިގަންނަވަ އެވެ.
