ސައުދީ އަރަބިއްޔާގައި މިހާރު ކުރިއަށްދާ އޭއެފްސީ 17 އަހަރުން ދަށުގެ މުބާރާތުގެ ކޮލިިފިކޭޝަންގައި ރާއްޖޭގެ ޓީމުން ކުޅުނު ދެ ވަނަ މެޗުގައި ރޭ އިންޑިއާ އަތުން 5-0 އިން ބަލިވެއްޖެ އެވެ.
ފަސް ޓީމު ވާދަކުރާ ކޮލިފައިން ގްރޫޕް ޑީގައި ރާއްްޖެ ވަނީ ފުރަތަމަ މެޗުގައި މިދިޔަ ހޮނިހިރު ދުވަހު ކުވެއިތު އަތުން 6-0 އިން ބަލިވެފަ އެވެ. ރޭ އިންޑިއާއާ ދެކޮޅަށް ބަދަލުތަކެއް ގެނެސްގެން ރާއްޖޭން ކުޅުނުއިރު، އިންޑިއާ އިން ވަނީ ފުރަތަމަ ހާފުގައި ދެ ގޯލު ޖަހައިފަ އެވެ. އަނެއް ތިން ގޯލު ޖެހީ ދެ ވަނަ ހާފުގަ އެވެ.
ސައުދީގެ ޕްރިން ސައުދު ބިން ޖަލާވީ ސްޓޭޑިއަމްގައި ރޭ ކުޅުނު މެޗުގައި އިންޑިއާ އިން ލީޑުނެގީ 11 ވަނަ މިނިޓްގައި ވަންލާލް ޕެކާ ގުއެޓޭ ޖެހި ގޯލުންނެވެ. އޭރިއާތެރެއިން ގުއެޓޭ ހުސްކޮށް ހުރެފައި ޖެހި ބޯޅަ ގޯލަށް ވަނީ ރާއްޖޭގެ ހަމްދާން ފައިގައި ޖެހިފަ އެވެ. އިންޑިއާ އިން ލީޑުފުޅާކުރީ މެޗުގެ 25 ވަނަ މިނިޓްގައި ލަލްމިންގްޗުއަންގާ ފަނާއި ޖެހި ގޯލުންނެވެ. އޭރިއާބޭރުން ފަނާއި ޖެހި ޝޮޓް ރާއްޖޭގެ ކެޕްޓަން މުހައްމަދު ޖޫދު އަޝްފާގު ފައިގައި ޖެހިފައި ގޯލަށް ވަނީ ކީޕަރު އަބްދުﷲ ރަޒީފް ބޯމަތިން ގޮހެވެ.
ދެ ވަނަ ހާފުގައި ރާއްޖޭން ކުރިއަށް ޖެހިގެން ކުޅެން ފަށައި، އެޓޭކް ރަނގަޅުކުރި އެވެ. އެކަމަކު، މެޗުގެ 59 ވަނަ މިނިޓްގައި އިންޑިއާ އިން ވަނީ ތިން ވަަަނަ ގޯލު ޖަހައިފަ އެވެ. އޭރިއާތެރެއިން ހުސްކޮށް ލިބުނު ބޯޅައެއް ގޯލަށް ވައްދާލީ އަމަން އެވެ. އިންޑިއާ އިން ވަނީ މެޗުގެ 67 ވަނަ މިނިޓްގައި ހަތަރު ވަނަ ގޯލެއް ވެސް ޖަހައިފަ އެވެ. މި ލަނޑު ޖެހީ ޕެނަލްޓީ އަކުން ބޮބީ ސިންގް ޔެންދްރެމްބަމް އެވެ.
އިންޑިއާގެ ފަހު ގޯލު ޖެހީ މެޗުގެ 71 ވަނަ މިނިޓްގައި ފީނިކްސް އޮއިނަމް އެވެ. ބަދަލަކަށް ކުޅެންއެރި އޮއިނަމް ހާފުގެ މެދެއްހާ ހިސާބުން ޖެހި ބޯޅަ ގޯލަށް ވަނީ ދަނޑީގައި ޖެހިފަ އެވެ.
ގްރޫޕް ޑީގެ އެއް ވަނައިގައި މި ވަގުތު އޮތީ ދެ މެޗުން ވެސް މޮޅުވެގެން ހަ ޕޮއިންޓާ އެކު ކުވެއިތު އެވެ. ދެ ވަނައިގައި އޮތް ސައުދީ އަރަބިއްޔާ އާއި ތިން ވަނައިގައި އޮތް އިންޑިއާ އަށް ވަނީ އެއް މެޗުން ތިން ޕޮއިންޓް ލިބިފަ އެވެ. ހަތަރެއްގައި އޮތް މިޔަންމާ އާއި ފަސް ވަނައިގައި އޮތް ރާއްޖެ އަށް އަދި ޕޮއިންޓެއް ނުލިބެ އެވެ.
މުބާރާތުގައި މާދަމާ ރާއްޖެ ކުޅޭނީ ސައުދީ އަރަބިއްޔާއާ އެެވެ.
