ތުރުކީގެ އިންފްލޭޝަން 24 އަހަރުގެ ތެރޭގައި މަތި ނުވާ މިންވަރަށް އުފުލިއްޖެ އެވެ.
މިހާރު އެ ގައުމުގައި އިންފްލޭޝަންގެ މިންވަރު ހުރީ 83 ޕަސެންޓަށް އުފުލިފަ އެވެ. އަގުތައް އެންމެ ބޮޑަށް އުފުލުނީ ދަތުރުފަތުރު، ކާބޯތަކެތި އަދި ބޯހިޔާވަހިކަމުގެ ދާއިރާއިންނެވެ.
އިގުތިސާދު ކުރިއެރުވުމަށް އިންޓްރެސްޓް ރޭޓް ކުޑަކުރީ މިދިޔަ އަހަރު ރައީސް ތައްޔިބް އުރުދުގާން އެވެ. އާއްމުކޮށް އިންފްލޭޝަން ތިރިކުރަން މަރުކަޒީ ބޭންކުތަކުން އަޅާ ފިޔަވަޅަކީ އިންޓްރެސްޓް ރޭޓް މަތިކުރުމެވެ.
އުރުދުގާން ވިދާޅުވެފައި ވަނީ އިންޓްރެސްޓް ރޭޓަކީ ހުރިހާ "ނުބައިކަމެއްގެ މަންމަ އަދި ބައްޕަ" ކަމަށެވެ. އެމަނިކުފާނުގެ އިގުތިސާދީ ސިޔާސަތުގެ ތެރޭގައި ބޭރު ފައިސާގެ މާކެޓުގައި އަގުތައް ކޮންޓްރޯލް ކުރުން ހިމެނެ އެވެ.
މިދިޔަ އަހަރު އިންޓްރެސްޓް ރޭޓް ކުޑަކުރީ 19 ޕަސެންޓުން 14 ޕަސެންޓަށެވެ. އޭގެ ސަބަބުން ތުރުކީ ލީރާގެ އަގު ވެއްޓުނެވެ. މިހާރު ލީރާގެ އަގަކީ 18.56 އެމެރިކާ ޑޮލަރެވެ.
"މި ގަރުނު ތުރުކީ އަޅުގަނޑުމެން ބިނާކުރާނީ އިންފްލޭޝަން މައްސަލަ ހައްލުކޮށްގެން،" ހޯމަ ދުވަހު ޓީވީ މެދުވެރިކޮށް ދެއްވި ހިތާބެއްގައި އުރުދުގާން ވިދާޅުވި އެވެ.
