މިޔަންމާގެ ކުރީގެ ލީޑަރު އަންގް ސަން ސޫ ކީގެ އެޑްވައިޒަަރުގެ މަގާމުގައި ހުންނެވި އޮސްޓްރޭލިއާގެ ޕްރޮފެސަރެއް މިޔަންމާގައި ތިން އަހަރަށް ޖަލަށް ހުކުމްކޮށްފި އެވެ.
ޝޯން ޓާނެލް ހައްޔަރު ކުރީ ފެބްރުއަރީ 2021 ގައި މިޔަންމާ ސިފައިން ހިންގި ބަގާވާތަށް ފަހު އެވެ. ސޫ ކީ އާއެކު އޭނާއަށް ދައުވާ ކުރީ ދައުލަތުގެ ސިއްރުތަކާ ބެހޭ ގާނޫނާ ހިލާފުވި ކަމަށެވެ. ސޫ ކީ އަދި ޓާނެލް ވެސް ދައުވާއަށް އިންކާރު ކުރައްވަ އެވެ.
އެ މައްސަލައިގައި ޝަރީއަތަށް ފަހު ބުރާސްފަަތި ދުވަހު ސޫ ކީ އާއި ޓާނެލްއަށް ހުކުމް ކުރި އެވެ. އިންސާނީ ހަައްގުތަކާ ބެހޭ ގްރޫޕުތަކުން ވަނީ އެކަމަަށް ފާޑުކިޔައިފަ އެވެ.
އެމްނެސްޓީ އިންޓަނޭޝަނަލްގެ އޮސްޓްރޭލިއާ ގޮފިން ބުނީ އިންސާފުވެރި ޝަރީއަތެއް ނުހިންގާ ކަމަށާއި ގާނޫނީ އެހީ ވެސް ފޯރުކޮށްދީފައި ނުވާ ކަމަށެވެ.
ސޫ ކީ އާއި ޓާނެލްއަށް ވެސް އިއްވީ ތިން އަހަރުގެ ޖަލު ހުކުމެކެވެ. މީގެ ކުރިން އެކި ޝަރީއަތްތަކުގައި ސޫ ކީއަށް 20 އަހަރަށް ވުރެ ދިގު މުއްދަަތެއްގެ ޖަލު ހުކުމް އިއްވާފައިވެ އެވެ.
ސޫ ކީއާ ދެކޮޅަށް އުފުލާފައިވާ ހުރިހާ ދައުވާއެއް ސާބިތުވެއްޖެ ނަމަ، 200 އަހަރުގެ ޖަލު ހުކުމެއް އަންނާނެ އެވެ. ގިނަ ދައުވާތަކުގެ ޝަރީއަތް އަދިވެސް ކުރިއަށް އެބަ އޮތެވެ.
