ޔޫތު މިނިސްޓްރީގެ ބެލުމުގެ ދަށުގައި ހުރި ކުޅިވަރު އިންފްރާސްޓްރަކްޗާތައް ބޭނުންކޮށްގެން ފައިސާ ހޯދުމަށް ގާއިމްކޮށްފައިވާ ޓްރަސްޓް ފަންޑްގެ ދަށުން ދޫކުރާ ތަންތަނުގެ ތެރެއިން ގަލޮޅު ދަނޑުގެ އެކޮމަޑޭޝަން ބްލޮކް ވެސް ބޭނުންކުރަން ވަނީ ހިމަނައިފަ އެވެ.
އެ ގޮތުން ޔޫތު މިނިސްޓްރީން ވަނީ މި ވަގުތު ކުޅިވަރު މުބާރާތެއް ނެތް ކުޅިވަރު އެސޯސިއޭޝަންތަކުގެ މެމްބަރު ކްލަބްތަކަށް ދޫކޮށްފައިވާ ގަލޮޅު ދަނޑުގެ އެކޮމަޑޭޝަންގެ ކޮޓަރިތައް މި މަހުގެ ނިޔަލަށް ހުސްކުރަން އަންގައިފަ އެވެ.
ޔޫތު މިނިސްޓްރީން އެކޮމަޑޭޝަން ބްލޮކް ހުސްކުރަން އެންގީ އެ ވުޒާރާއިން ދާދި ފަހުން އެކުލަވާލި ޓްރަސްޓް ފަންޑަށް ފައިސާ ހޯދުމުގެ ގޮތުން އެކޮމަޑޭޝަން ބްލޮކް ބޭނުންކުރަން ނިންމާފައިވާތީ އެވެ.
ޔޫތު މިނިސްޓްރީން ޓްރަސްޓް ފަންޑަށް ފައިސާ ހޯދުމަށް އެކުލަވާލި އުސޫލުތައް ވަނީ މިދިޔަ މަހު ގެޒެޓްކޮށްފަ އެވެ. އަދި އެނގިފައިވާ ގޮތުގައި އެ އުސޫލުތަކާ އެއްގޮތަށް އަމަލުކުރަން ފަށަން ނިންމާފައިވަނީ އަންނަ މަހުގެ 15 ވަނަ ދުވަހުން ފެށިގެންނެވެ.
ޓްރަސްޓް ފަންޑަކީ މިނިސްޓްރީގެ ބިންތަކާއި އިމާރާތްތަކާއި ވަސީލަތްތަކާއި އަދި މިނިސްޓްރީން ފޯރުކޮށްދޭ ހިދުމަތްތައް އިތުރަށް ފުޅާކޮށް ތަރައްގީ ކުރުމަށްޓަކައި ކުރަންޖެހޭ އެކިއެކި ހަރަދުތައް ކުރުމަށް ފަސޭހަ ކުރުމަށްޓަކައި ގާއިމްކުރި ފަންޑެކެވެ.
ގަލޮޅު ދަނޑުގެ އެކޮމަޑޭޝަން ބްލޮކް: މިއީ ގައުމީ އެސޯސިއޭޝަންތަކުން ކުޅުންތެރިންގެ އެކޮމަޑޭޝަން ހަމަޖައްސަން ބޭނުންކުރަމުން އަންނަ އިމާރާތެއް..-- ފޮޓޯ: އަބްދުﷲ އިޔާން/ އަދަދު
މިދިޔަ އޮގަސްޓް މަހު ކުޅިވަރާ ބެހޭ މިނިސްޓްރީން ގެޒެޓްކުރި ޓްރަސްޓް ފަންޑްގެ އުސޫލުގައިވާގޮތުން ގަލޮޅު ދަނޑުގެ އެކޮމަޑޭޝަން ބްލޮކް ދޭނެ ގޮތްތަކެއް ވަނީ ބަޔާންކޮށްފަ އެވެ. އެ ގޮތުން، ގަލޮޅު އެކޮމަޑޭޝަން ބްލޮކް ގައުމީ މުބާރާތްތަކަށް ދޫކުރާނީ ހިލޭ އެވެ. ކްލަބް މެމްބަރުންގެ އަމިއްލަ މުބާރާތްތަކުގެ އެކޮމަޑޭޝަން ދޫކުރާނީ ދުވާލަކަށް، ކޮންމެ ކުޅުންތެރިއަކަށް 130 ރުފިޔާ އަށެވެ. އަދި އަމިއްލަ ފަރާތަކުން ހިންގާ ހަރަކާތެއްގެ އެކޮމަޑޭޝަން އަށް ކުޅުންތެރިއަކަށް، ދުވާލަކަށް 250 ރުފިޔާ އެވެ.
ޔޫތު މިނިސްޓްރީން އެފްއޭއެމަށް އަންގާފައިވަނީ މި މަހުގެ ނިޔަލަށް ފުޓްބޯޅަ ކްލަބްތަކުގެ ކުޅުންތެރިންނަށް ދޫކޮށްފައިވާ ރޫމުތައް ހުސްކުރުމަށެވެ. އެއީ މިހާރު ފުޓްބޯޅަ ސީޒަން ނިމިފައިވާތީ، މި ވަގުތު ރަސްމީ އެއްވެސް މުބާރާތެއް ކުރިއަށްނުދާތީ އެވެ.
މީގެ ކުރިން ވެސް އޮފް ސީޒަނުގައި ކުުޅުންތެރިން އޮކަމަޑޭޝަން ބްލޮކްގައި ތިބެ އެވެ. އެއީ ކްލަބް ކޮންޓްރެކްޓްގައި ހުންނާތީވެ، ފުޓްބޯލް އެސޯސިއޭޝަން މެދުވެރިކޮށް، އެ ކްލަބަށް ދީފައިވާ އެކޮމަޑޭޝަންގަ އެވެ. އެކަމަކު، ޓްރަސްޓް ފަންޑަށް އެކޮމަޑޭޝަން ބްލޮކް ބޭނުންކުރާތީ، މިހާރު އޮފް ސީޒަނުގައި ކުޅުންތެރިންނަށް ވަނީ އަމިއްލަ އަށް އެކޮމަޑޭޝަން ހަމަޖައްސަން ޖެހިފަ އެވެ.
ޓްރަސްޓް ފަންޑަށް ފައިސާ ހޯދުމުގެ ގޮތުން ދޫކުރާ ތަންތަނުގެ ތެރޭގައި ހެންވޭރު ދަނޑާއި ހެންވޭރު ބޯޅަގޭ ސެމިނާ ރޫމާއި ހުޅުމާލެ އާއި މާލޭ ކުޅިވަރު އެކުވެނި ޓްރެކް، ސޯޝަލް ސެންޓަރު އިންޑޯ ހޯލު، ސޯޝަލް ސެންޓަރު ސެމިނާ ރޫމު، ސޯޝަލް ސެންޓަރު ސްޓޭޖާއި އެހެނިހެން ސަހަރައްދު، ސޯޝަލް ސެންޓަރު އައިސްބާތު، ސޯޝަލް ސެންޓަރުގެ ޕާކިން ސަރަހައްދު، ހުޅުމާލެ ފުޓްބޯޅަ ދަނޑު، ހުޅުމާލެ ފުޓްސަލް ދަނޑު، ހުރާ ކޭމްޕް ސައިޓް އަދި މިނިސްޓްރީގެ ތަންތަނުގައި ކުށްޔަށްދޭ ކެފޭ ރެސްޓޯރަންޓާއި ފިހާރަ ފަދަ ތަންތަން ހިމެނެ އެވެ.
