ޗައިނީސް އިންޓަނޭޝަނަލް އެޑިއުކޭޝަން ފައުންޑޭޝަނާއި (ސީއައިއީއެފް) ވިލާ ކޮލެޖު ގުޅިގެން ރާއްޖޭގައި ޗައިނީސް ލެންގުއޭޖް ލާނިން ސެންޓަރެއް މިއަދު ހުޅުވައިފި އެވެ.
އެސެންޓަރު ހުޅުވުމުގެ ރަސްމިއްޔާތު ޝަރަފުވެރިކޮށްދެއްވީ ޗައިނާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ވަންގް ލީޖިން އެވެ. އެކަމަނާގެ އިތުރުން މިނިސްޓުރީ އޮފް ފޮރިން އެފެއާސްގެ ފޮރިން ސެކެޓުރީ އަހުމަދު ލަތީފު ވެސް މިރަސްމިއްޔާތުގައި ބައިވެރިވެ ވަޑައިގެންނެވި އެވެ.
މިރަސްމިއްޔާތުގައި ވާހަކަފުޅު ދައްކަވަމުން ޗައިނާގެ ސަފީރު ވިދާޅުވީ ދިވެހިރާއްޖެއަކީ ޗައިނާ ފަތުރުވެރިންގެ މެދުގަައި މިއަދުވެސް އެންމެ މަގުބޫލު މަންޒިލު ކަމަށާއި މި ސެންޓަރުގެ ސަބަބުން ޗައިނާގެ ފަތުރުވެރިންނަށް ހިދުމަަތް ދިނުމަގަ ދިވެހީންނަށް ފަސޭހަތަކެއް ވެގެންދާނެ ކަމަށާއި އަދި އެކަމުގެ ސަބަބުން ޗައިނާ މީހުންގެ ސަގާފަތާއި ދިރިއުޅުމުގެ ވައްޓަފާޅިއާ ބެހޭ މައުލޫމާތު ދިވެހީންނަށް ލިބި ދެގައުމުގެ ގުޅުން އިތުރަށް ބަދަހި ވެގެންދާނެ ކަމަށެވެ.
އޭގެ އިތުރުން އެކަމަނާ ވިދާޅުވީ ދިވެހިރާއްޖެއާއި ޗައިނާއަކީ ޒަމާނުއްސުރެ ވަރަށް ގާތް އަވައްޓެރި ދެގައުމު ކަމަށާއި ތައުލީމީ ރޮނގުން ވެސް ދެގައުމުގެ ދެމެދުގައި ވަރުގަދަ ގުޅުމެއް ގާއިމު ކުރެވިފައިވާ ކަމަށެވެ.
އެގޮތުން މިދިޔަ އަހަރު ބެއިޖިން ފޮރިން ސްޓަޑީސް ޔުނިވާސިޓީގައި ދިވެހި ކިޔަވައިދޭ ކޯހެއް ހިންގަން ފަށައިފި. އަޅުގަނޑަށް މައުލޫމާތު ލިބިފައިވާ ގޮތުގައި އެއީ ރާއްޖޭން ބޭރު ގައުމެއްގައި ދިވެހި ކިޔަވައިދޭން ފެށި ފުރަތަމަ ކޯސް.
އެ ސެންޓަރުގެ ސަބަބުން ދެގައުމުގެ ދެމެދުގައި އޮތް ގާތް ގުޅުން އިތުރަށް ވަރުގަދަ ވެގެންދާނެ ކަން ފާހަގަ ކުރައްވަމުން ލީޖިން ވިދާޅުވި އެވެ.
ވިލާ ކޮލެޖުން ދެމުން ގެންދާ ތައުލީމުގެ ތެރެއަށް އިތުރުވެގެން ދިޔަ އެ ސެންޓަރުގައި ކޯސްތައް ހިންގަމުން ދާނީ ޗައިނާގެ ޗަންގް ހައި ޔުނިވާސިޓީއާއި ހުނާން މާސް މީޑިއާ ވޮކޭޝަނަލް އެންޑު ޓެކްނިކަލް ކޮލެޖާއި ވިލާ ކޮލެޖު ގުޅިގެންނެވެ.
އެ ސެންޓަރުން ކުރިއަށް ގެންދިއުމަށް ހަމަޖެހިފައިވާ ކޯސްތަކުގެ ތެރޭގައި އެއާޕޯޓާއި ރިސޯޓު ތަކުގަ ވަޒީފާ އަދާ ކުރާ މީހުންނަށް ހާއްސަ ޓޫރިޒަމް ޗައިނީސްް ކޯހާއި ޗައިނާ ބަހުން ތަފާތު ވިޔަފާރި މުއާމަލާތްތައް ކުރަން ދަސްކޮށްދޭ ކޯސްތަކުގެ އިތުރުން ޗައިނާ ބަހުގެ އާންމު ގަވާއިދާއި ބަހުގެ ހަމަތައް ދަސްކޮށްދޭ އީޒީ ޗައިނީސްގެ ކޯސްތައް ހިމެނެ އެވެ.
ރާއްޖޭގައި ޗައިނާ ބަސް ކިޔަވައިދިނުމަށް ހާއްސަ ސެންޓަރެއް ގާއިމު ކުރުމުގެ އެއްބަސްވުމުގައި ވިލާ ކޮލެޖާއި ސީއައިއެފްއާ ދެމެދު ސޮއި ކުރެވުނީ 2019 ވަނަ އަހަރު އެވެ.
"ވިލާ ކޮލެޖުގައި ޗައިނީސް ލޭންގުއޭޖް ސެންޓަރުގެ ހުޅުވުމުގެ އެއްބަސްވުމުގައި ސޮއި ކުރެވުނީ 2019 ވަނަ އަހަރު، މުޅި ދުނިޔެއަށް ކުރިމަތިވި ކޮވިޑްގެ ވަބާގެ ދެތިން މަހެއް ކުރިން. ނަމަވެސް މިސެންޓަރު ހުޅުވުން މިހާ ލަސްވެގެން މިދައީ ދަތުރުފަތުރު ކުރުމުގައި ހުރި ހުރަސްތަކާ ހުރެ މުޅި ދުނިޔެ ބަންދުވެފައި އޮތުމުން" ޖަލްސާގައި ވާހަކަފުޅު ދައްކަވަމުން ވިލާގެ ވައިސް ރެކްޓާ ޑރ. އަލީ ނަޖީބު ވިދާޅުވި އެވެ.
އިތުރަށް ވާހަކަފުޅު ދައްކަވަމުން އޭނާ ވިދާޅުވީ އެ ސެންޓަރުގެ ސަބަބުން ދިވެހިރާއްޖޭގެ ފަތުރުވެރިކަމުގެ ސިނާއަތަށް ހެޔޮ ބަދަލުތަކެއް އަންނާނެ ކަމަށް ގަބޫލުފުޅު ކުރައްވާ ކަމަށެވެ.
ޗައިނާއަކީ ކޮވިޑުގެ ކުރިން ރާއްޖެއަށް އެންމެ ގިނައިން ޓޫރިސްޓުން އަންނަ ގައުމެވެ. 2019 ވަނަ އަހަރު އެކަނިވެސް ގައުމުން ރާއްޖެއަށް 267،875 ޓޫރިސްޓުން ޒިޔާރަތް ކޮށްފައިވެއެވެ.
