ޓޯޓަލް ފިޓްނެސް ގުރޫޕުން (ޓީއެފްޖީ) އިންތިޒާމު ކޮށްގެން ބާއްވާ "ދަ މޯލްޑިވްސް ލޯންގު ރަން 2022" ގައި ބައިވެރި ވުމުގެ ފުރުސަތު ހުޅުވާލައިފި އެވެ.
2013 ވަނަ އަހަރުން ފެށިގެން ބާއްވަމުން އަންނަ އެ އިވެންޓު، އަށް އަހަރަށްފަހު އަލަށް މިފަހަރު ރީބުރޭންޑު ކޮށްފައިވާއިރު، އެ އިވެންޓު ކުރިއަށް ގެންދާނީ މިއަހަރުގެ ޑިސެމްބަރު މަހުގެ ނުވަވަނަ ދުވަހު ހުޅުމާލޭ ގައެވެ.
ދިގު ދުވުންތައް ދުވާ ދުވުންތެރިންނަށް މެރެތަން އާއި ހާފް މެރެތަން ހާއްސަ ކުރެވިފައި ވާއިރު 10 ކިލޯމީޓަރު ދުވުމާއި ފަސް ކިލޯމީޓަރު ދުވުމުގައި ޓީމެއްގެ ގޮތުގައި ނުވަތަ އާއިލާއެއްގެ ގޮތުގައި ވެސް ބައިވެރިވެވޭނެ އެވެ. މީގެ އިތުރުން އެކަނި ދުވަން ބޭނުންވާ ފަރާތްތަކަށް އެފުރުސަތު ވެސް އޮންނާނެ އެވެ.
ހަތަރު އިވެންޓަކަށް ބަހާލައިގެން ކުރިއަށް ގެންދާ މިއަހަރުގެ ލޯންގު ރަން ފެށުމަށް ހަމަޖެހިފައި ވަނީ ޑިސެމްބަރު ނުވަވަނަ ދުވަހުގެ ރޭ ދަންވަރު 12:20 ގައެވެ. ގާތްގަނޑަކަށް ހަތް ގަޑިއިރަށް ދިގުދެމިގެންދާ އެ އިވެންޓަކީ ރާއްޖޭގައި ބާއްވާ އެންމެ ދިގު ދުވުމެވެ.
ދުވުން ނިންމާ ރޮނގު ހުރަސްކުރާ ކޮންމެ ބައިވެރިއަކަށް މެޑަލް ލިބިގެންދާ ގޮތަށް 2013 ވަނަ އަހަރުން ފެށިގެން ދުވުމުގެ ތަފާތު އެކި އިވެންޓުތައް ވަނީ ޓީއެފްޖީން ކުރިއަށް ގެންގޮސްފަ އެވެ. އެގޮތުން މިއަހަރު ޑިސެމްބަރު މަހު ބޭއްވިގެންދާ "ދަ މޯލްޑިވްސް ލޯންގު ރަން 2022" އަކީ ޓީއެފްޖީން ބާއްވާ 31 ވަނަ ދުވުމުގެ ހަރަކާތެވެ.
