މިދިޔަ ޖުލައި މަހު އަވަހާރަކޮށްލި ޖަޕާނުގެ ކުރީގެ ބޮޑު ވަޒީރު ޝިންޒޯ އަބޭގެ ހަނދާން އާކޮށް، ޖަޕާނާއި ބޭރުގެ އިއްޒަތްތެރިން ބައިވެރިވެ ރަސްމީ ޖަނާޒާ ބާއްވައިފި އެވެ.
އަބޭގެ ހަޑިގަނޑު އަންދާލުމަށް ފަހު އަޅިތައް ހިފައިގެން ޖަނާޒާއަށް މޮޓޯކޭޑުގައި ވަޑައިގެންނެވީ އަނބިކަނބަލުން އަކީ އެވެ. ޖަނާޒާ އޮތީ ޓޯކިޔޯގެ ބުޑޮކަން ފައްޅީގަ އެވެ.
ޖަނާޒާ ފެށުމުގެ ގޮތުން 19 ބަޑީގެ ސަލާމެއް އެރުވި އެވެ. ބުޑޮކަަންގެ ބޭރުގައި އެތައް ހާސް ސަޕޯޓަރުން ޖަމާވެފައި އޮތެވެ. އަދި ޖަނާޒާއާ ދެކޮޅު މީހުންގެ ކުދި މުޒާހަރާތަކެއް ވެސް އޮތެވެ.
ސަޕޯޓަރުން ކިޔު ހަދާފައި. -- ފޮޓޯ: އީޕީއޭ
އަބޭއަކީ އެންމެ ގިނަ ދުވަހު ޖަޕާނުގެ ބޮޑު ވަޒީރުކަން ކުރެއްވި ލީޑަރެވެ. އެމަނިކުފާނު އަވަހާރަކޮށްލީ ކެމްޕެއިން އެއްވުމެއްގެ ތެރެއިން މީހަކު ބަޑިން ދިން ހަމަލާއެއްގަ އެވެ.
އެމަނިކުފާނު އަވަހާރަވުމުން ގިނަ ބަޔަކު ހިތާމަ ފާޅުކުރި ނަމަވެސް، ދައުލަތުގެ ބަޖެޓުން ފައިސާތަކެއް ހަރަދުކޮށްގެން ރަސްމީ ޖަނާޒާ ބޭއްވުމަށް ގިނަ މީހުން ދެކޮޅެވެ.
ހިޔާލު ހޯދުމުގެ ވޯޓުތަކުން ދައްކާ ގޮތުގައި ޖަޕާނުގެ 60 ޕަސެންޓު މީހުން ޖަނާޒާ ބޭއްވުމާ ދެކޮޅެވެ. މިއީ ދެ ވަނަ ބޮޑު ހަނގުރާމައަށް ފަހު ޖަޕާނުގައި ރަސްމީ ޖަނާޒާއެއް ބޭއްވި ދެ ވަނަ ބޮޑު ވަޒީރެވެ.
އިދިކޮޅު ޕާޓީތަކުގެ ބައެއް ޕާލިމެންޓް މެމްބަރުން ވަނީ ޖަނާޒާ ބޮއިކޮޓްކޮށްފަ އެވެ. ބައެއް މީހުން ހިތްހަމަނުޖެހުނީ ޕާލިމެންޓުގެ ރުހުން ނުހޯދައި ބޮޑު ވަޒީރު ފުމިއޯ ކިޝީޑާ އަމިއްލަފުޅަށް ޖަނާޒާ ބާއްވަން ނިންމެވުމުންނެވެ.
ޖަނާޒާއާ ދެކޮޅަށް މުޒާހަރާ ކުރަނީ. -- ފޮޓޯ: ގެޓީ
އޭގެ އިތުރުން ޖަނާޒާއަށް ހޭދަވާ ފައިސާއާ މެދު ވެސް ބައެއް މީހުން ކަންބޮޑުވެ އެވެ. ބެލެވޭ ގޮތުގައި ޖުމްލަ 12 މިލިއަން ޑޮލަރު ހޭދަވާނެ އެވެ.
ޖަނާޒާގަައި 4،300 މެހެމާނުން ބައިވެރިވި އިރު، އޭގެ ތެރޭގައި 700 ބޭރުގެ އިއްޒަތްތެރިން ހިމެނެ އެވެ. އެގޮތުން އެމެރިކާގެ ނައިބު ރައީސް ކަމަލާ ހެރިސް، އޮސްޓްރޭލިއާގެ ބޮޑު ވަޒީރު އެންތަނީ އަލްބަނީޒް އަދި އިންޑިއާގެ ބޮޑު ވަޒީރު ނަރެންދްރަ މޯދީ ހިމެނެ އެވެ.
އަބޭގެ ވެރިކަމުގައި އެމެރިކާއާ ގުޅުން ބަދަހިކޮށް، ކުއޮޑް ގްރޫޕް ވަރުގަދަ ކުރި އެވެ. ކުއޮޑްގައި ހިމެނޭ ގައުމުތަކަކީ ޖަޕާން، އެމެރިކާ، އޮސްޓްރޭލިއާ އަދި އިންޑިއާ އެވެ.
ޖަޕާނު އެމްޕެރާ އަދި އެމަނިކުފާނުގެ އަނބިކަނބަލުން ޖަނާޒާގައި ބައިވެރިވެވަޑައިނުގަންނަވަ އެވެ. ނަމަވެސް ވަލީ އަހުދު އަމީރު އަކިޝީނޯ އާއި އެމަނިކުފާނުގެ ބައިވެރިވެވަޑައިގެންނެވި އެވެ.
