ޖަޕާނުގެ ކުރީގެ ބޮޑު ވަޒީރު ޝިންޒޯ އަބޭއަށް ދައުލަތުގެ ފަރާތުން ރަސްމީ ޖަނާޒާއެއް ބާއްވަން އުޅޭތީ ނުރުހުން ފާޅުކުރުމުގެ ގޮތުން މީހަކު އަމިއްލައަށް ގައިގައި ރޯކޮށްލައިފި އެވެ.
ޝިންޒޯ އަބޭ އަވަހާރަވީ މިދިޔަަ ޖުލައި މަހު މީހަކު ބަޑިން ހަމަލާ ދިނުމުންނެވެ. ސެޕްޓެމްބަރު 27 ގައި ރަސްމީ ޖަނާޒާ ބާއްވަން ތައްޔާރުވާ އިރު، އެތައް ސަތޭކަ ބޭރުގެ އިއްޒަތްތެރިން ބައިވެރިވާނެ އެވެ.
އެ ޖަނާޒާއާ ދެކޮޅަށް ބުދަ ދުވަހު ޓޯކިޔޯގައި ބޮޑު ވަޒީރުގެ އޮފީސް ކައިރީގައި މީހަކު އަމިއްލައަށް ގައިގައި ރޯކުރުމުން ފުލުހުންނަށް ރިޕޯޓު ކުރީ މަަންޒަރު ދުށް ފަރާތްތަކުންނެވެ.
ޖަޕާނުގެ ނޫސްތަކުން ބުނީ ފުލުހުން ގޮސް، އަލިފާންގަނޑު ނިއްވާލައި، ރޯކުރި މީހާ ހޮސްޕިޓަލަށް ގެންދިޔައިރު ވެސް އޭނާގެ ހޭހުރި ކަމަށެވެ.
އޭނާއަށް ލިބުނު ޒަހަމްތަކުގެ ތަފްސީލާއި މިހާރުގެ ހާލަތު ސާފެއް ނޫނެވެ. ޖަޕާނުގެ ނޫސްތަކުން ބުނީ ބެލެވެނީ އެއީ އުމުރުން 70 އިން މަތީގެ މީހެއް ކަމަށެވެ.
އެ ހާދިސާއާ ގުޅިގެން ޖަޕާން ސަރުކާރުން އަދި ވަކި އެއްޗެއް ނުބުނެ އެވެ. އެހެން ނަމަވެސް އަބޭއަށް ދަައުލަތުގެ ހަރަދުގައި ރަސްމީ ޖަނާޒާ ބޭއްވުމާ ވަރަށް ގިނަ އާއްމުން ދެކޮޅެވެ.
އެގޮތުން އެ ޖަނާޒާއަަށް ދައުލަތުން ބޮޑު ހޭދަަތަކެއް ކުރަން ޖެހޭނެތީ އާއްމުން ހިތްހަމަނުޖެހެ އެވެ. ދައުލަތުގެ ފަރާތުން ޖަނާޒާ ބޭއްވުމަކީ ޖަޕާނުގައި އާއްމުކޮށް ކުރާ ކަމެއް ނޫނެވެ.
ރިޕޯޓުތައް ބުނާ ގޮތުން އަބޭގެ ޖަނާޒާއަށް ދަައުލަތުން 11.4 މިލިއަން ޑޮލަރު ހޭދަވާނެ ކަމަށް ބެލެވެ އެވެ. ޖަޕާނުގެ އެއް މައި އިދިކޮޅު ޕާޓީ ކޮންސްޓިޓިއުޝަނަލް ޑިމޮކްރެޓިކް ޕާޓީއިން ބުނީ ޖަނާޒާ ބޮއިކޮޓް ކުރާނެ ކަމަށެވެ.
