ޖަޕާނަށް އެރި ބާރުގަދަ ތޫފާން ނަންމަޑޯލްގައި މިހާތަނަށް ހަތަރު މީހުން މަރުވެ 100 އަށް ވުރެ ގިނަ މީހުންނަށް އަަނިޔާވެއްޖެ އެވެ.
ތޫފާން އެރީ މިދިޔަ އާދީއްތަ ދުވަހު ދެކުނު ކިޔޫޝޫ ރަށަށެވެ. އަންގާރަ ދުވަހާ ހަމައަށް ދިޔަ އިރު ވެސް، 140،000 ގެއިން ހުރީ ކަރަންޓު ކެނޑިފަ އެވެ.
ތޫފާނުގެ މިސްރާބު ކަނޑާ ދިމާލަށް ހުރި އިރު، އޭގެ ބާރު ދަށްވެފައިވާ ކަމަށް މޫސުމާ ބެހޭ އިދާރާއިން ބުނެ އެވެ. އެކަމަކު ފެންބޮޑުވުމާއި ބިންގަނޑު ކަނޑައިގެން ދިޔުމުގެ ފުރުސަަތު އަދިވެސް އެބަަ އޮތެވެ.
ތޫފާން ނަންމަޑޯލްއާ އެކު ގަޑިއަކު 234 ކިލޯމީޓަރު ބާރުމިނުގައި ވައިޖެހެމުންދާ އިރު، ބައެއް ހިސާބުތަކަށް 24 ގަޑިއިރުގެ ތެރޭގައި 400 މިލިމީޓަރުގެ ވާރޭވެހިފައިވެ އެވެ.
ވެރިރަށް ޓޯކިޔޯއަށް ވެސް ބޯކޮށް ވާރޭވެހި ދަތުރުފަތުރުގެ ނިޒާމަށް ބުރޫއެރި އެވެ. ބުލެޓް ރޭލާއި ފެރީތަކާއި ފްލައިޓްތައް ކެންސަލްކޮށް، ފިހާރަ އާއި ވިޔަފާރިތައް ވެސް ބަންދުކުރި އެވެ.
ޕާނުގެ މޫސުމާ ބެހޭ އިދާރާއިން ބުނީ މިއީ ވަރަށް ބާރުގަދަ ތޫފާނެއް ކަމަށެވެ. އެގޮތުން 2018 ގައި 14 މީހުން މަަރުވި ތޫފާން ޖޭބީ އާއި 2019 ގައި މުޅި ޖަޕާނުން ކަރަންޓު ކެނޑެން މަގުފަހިވި ތޫފާން ހަގިބިސްއަށް ވުރެ ވެސް މި ތޫފާން ބާރުގަދަ ކަމަށް ބެލެވެ އެވެ.
