ބާރުގަދަ ތޫފާން ނަންމަޑޯލްގެ ނުރައްކަލުން ސަލާމަތްވުމަށް ޖަޕާނުގައި ނުވަ މިލިއަން މީހުން ރައްކާތެރި ހިސާބުތަކަށް ބަދަލު ވާން އަންގައިފި އެވެ.
ތޫފާނުގެ ސަބަބުން މިހާތަނަށް ދެ މީހުން މަރުވެ، 90 މީހުންނަށް ޒަހަމްވެފައިވެ އެވެ. އާދީއްތަ ދުވަހު ތޫފާން އެރީ އެންމެ ދެކުނުގައި އޮންނަ ކިޔޫޝޫ އަށެވެ. ކުރިއަށް އޮތް ދުވަސްތަކުގައި ޖަޕާނުގެ އެންމެ ބޮޑު ރަށް ހޮންޝޫއަށް ތޫފާން ފޯރާނެ ކަމަށް ބެލެވެ އެވެ.
އެތައް ހާސް ބަޔަކު ވަގުތީ ހިޔާތަކަށް ބަދަލުވެފައިވާ އިރު، 350،000 ގެއިން ކަރަންޓުން ކެނޑިފައިވެ އެވެ. ވިޔަފާރި އާއި ދަތުރުފަތުރަށް ބުރޫ އަރާފައިވާ އިރު، ފެންބޮޑުވެ ބިންގަނޑު ކަނޑައިގެން ދާނެ ކަމަށް ދަނީ ތައްޔާރުވަމުންނެވެ.
ތޫފާން ނަންމަޑޯލްއާ އެކު ގަޑިއަކު 234 ކިލޯމީޓަރު ބާރުމިނުގައި ވައިޖެހެމުންދާ އިރު، ބައެއް ހިސާބުތަކަށް 24 ގަޑިއިރުގެ ތެރޭގައި 400 މިލިމީޓަރުގެ ވާރޭވެހިފައިވެ އެވެ.
ހޮންޝޫއަށް ތޫފާން ފޯރައި، ބުދަ ދުވަހުގެ ވަގުތެއްގައި ތޫފާނުގެ އަސަރު ކުޑަ ވާން ފަށާނެ ކަމަށް ބެލެވެ އެވެ. ވެރިރަށް ޓޯކިޔޯއަށް ވެސް ދަނީ ބޯކޮށް ވާރޭވެހެމުންނެވެ.
ޖަޕާނުން ނެރޭ އެންމެ މަތީ އިންޒާރު ފަސް ސަރަހައްދަކަށް ވަނީ ނެރިފަ އެވެ. ޖަޕާނުގެ މޫސުމާ ބެހޭ އިދާރާއިން ބުނީ މިއީ ވަރަށް ބާރުގަދަ ތޫފާނެއް ކަމަށެވެ.
އެގޮތުން 2018 ގައި 14 މީހުން މަަރުވި ތޫފާން ޖޭބީ އާއި 2019 ގައި މުޅި ޖަޕާނުން ކަރަންޓު ކެނޑެން މަގުފަހިވި ތޫފާން ހަގިބިސްއަށް ވުރެ ވެސް މި ތޫފާން ބާރުގަދަ ކަމަށް ބެލެވެ އެވެ.
