ރައްކާތެރިކަމުގެ ފިޔަވަޅެއް ނެތި އުސް އިމާރާތްތަކަށް އެރުމުގައި މަގުބޫލްކަން ހޯދާފައިވާ ފްރާންސްގެ "ސްޕައިޑާމޭން" 60 ވަނަ އުފަން ދުވަސް ފާހަގަކުރަން 48 ބުރީގެ ޓަވަރަކަށް އަރައިފި އެވެ.
އެލެއިން ރޮބަޓް އެރީ ޕެރިހުގައި ހުންނަ ޓުއާ ޓޯޓަލް އެނާޖީޒް ޓަވަރަށެވެ. އެކަން ކުރުމަށް އޭނާ ވާގަނޑެއް ވެސް އަދި ރައްކާތެރިކަމަށް އެހެން ސާމާނެއް ވެސް ބޭނުމެއް ނުކުރެ އެވެ.
"އަހަރެން މީހުންނަށް ދޭން ބޭނުންވާ މެސެޖަކީ 60 އަހަރު ފުރުމަކީ މާ ބޮޑު ކަމެއް ނޫނޭ. ފަސްދޮޅަސް އަހަރުވިޔަސް ކުޅިވަރު ކުޅެވޭނެ، ހަރަކާތްތެރިކޮށް އުޅެވޭނެ، އުފާވާ ހުރިހާ ކަމެއް ކުރެވޭނެ،" ރޮއިޓާޒްއަށް އޭނާ ބުންޏެވެ.
ރިޕޯޓުތައް ބުނާ ގޮތުން ޓަވަރުގެ އެންމެ މައްޗަށް އެރުމާ އެކު ފުލުހުން އޭނާ ހައްޔަރު ކުރި އެވެ.
އެލެއިން ރޮބަޓް ވަނީ މީގެ ކުރިން އެތައް ފަހަރަކު ޓުއާ ޓޯޓަލް އެނާޖީޒް ޓަވަރަށް އަރާފަ އެވެ. މި ފަހަރު އެންމެ އުހާ ހަމައަށް ފޯރުވުމަށް ނެގީ 60 މިނެޓެވެ.
އޭނާ ބުނީ އުމުރުން 60 އަހަރުވުމުން އެ ޓަވަރަށް އަރަން ލަނޑުދަނޑި ކަނޑައެޅީ މީގެ އެތައް އަހަރެއް ކުރިން ކަަމަށެވެ.
އެލެއިން ރޮބަޓް ވަނީ ގިނަ އަދަދެއްގެ އުސް އިމާާރާތްތަކަށް މީގެ ކުރިން އަރައިފަަ އެވެ. އެގޮތުން ދުނިޔޭގެ އެންމެ އުސް އިމާރާތް، ޑުބާއީގެ ބުރްޖް ހަލީފާވެސް ހިމެނެ އެވެ.
އޭނާ އާއްމުކޮށް އެކަން ކުރަނީ ކުރިން އެންގުމަކާ ނުލައި އަދި ހުއްދަ ނުހޯދަ އެވެ. އެހެންވެ، ވަރަށް ގިނަ ފަހަރު އިމާރާތަކަށް އަރައި ނިމުމާ އެކު ހައްޔަރުކޮށްފައިވެ އެވެ.
