ޖަޕާނަށް މިހާތަނަށް ކުރިމަތިވި އެންމެ ބާރުގަދަ އެއް ތޫފާނު ކަމަށް ބެލެވޭ ނަންމަޑޯލް އެ ގައުމުގެ އެންމެ ދެކުނުގައި އޮންނަ ކިޔޫޝޫ ރަށަށް އަރައިފި އެވެ.
ތޫފާން ނަންމަޑޯލްއާ އެކު ގަޑިއަކު 180 ކިލޯމީޓަރު ބާރުމިނުގައި ވައިޖެހެމުންދާ އިރު، މިއަދާއި މިރޭ ބައެއް ހިސާބުތަަކަށް 500 މިލިމީޓަރުގެ ވާރޭ ވެހޭނެ ކަމަށް ބެލެވެ އެވެ.
ހަތަރު މިލިއަނަށް ވުރެ ގިނަ މީހުން ރައްކާތެރި ހިސާބުތަކަށް ބަދަލުވާން އަންގާފައިވެ އެވެ.
ބިންގަނޑު ކަނޑައިގެން ގޮސް ފެންބޮޑުވެދާނެކަމުގެ އިންޒާރު ދިނުމާ އެކު ރޭލާއި ފެރީ އަދި ފްލައިޓް ދަަތުރުތައް ވަނީ ކެންސަލްކޮށްފަ އެވެ.
އާދީއްތަ ދުވަހުގެ ހެނދުނު ތޫފާނު އެންމެ ފުރަތަމަ އެރީ ކިޔޫޝޫގައި އޮންނަ ކަގޮޝިމާ ސިޓީއަށެވެ. ކިޔޫޝޫއަކީ ޖަޕާނުގެ އެންމެ ދެކުނުގައި އޮންނަ ރަށެވެ. އެ ތަނުގައި 13 މިލިއަން މީހުން ދިރިއުޅެ އެވެ.
މޫސުމާ ބެހޭ އިދާރާއިން ބުނީ ބޯކޮށް ވާރޭވެހި އުދަ އެރުމުގެ އިތުރުން އިމާާރާތްތައް ވެއްޓުމުގެ ނުރައްކާ އޮންނަ މިންވަރަށް ވަައިޖެހޭނެ ކަމަށެވެ.
ތޫފާނުގެ މިސްރާބު މިހާރު ހުރީ ކިޔޫޝޫގެ އުތުރަށެވެ. ކުރިއަށް އޮތް ދުވަަސްތަކުގައި ޖަޕާނުގެ މެދުތެރެއިން ގޮސް، ޓޯކިޔޯއާ ހަމައަށް ތޫފާނު ފޯރާނެ ކަމަށް ބެލެވެ އެވެ.
ތޫފާނު އެރުމަށް ފަހު ވެސް އޭގެ ބާރު ދަށް ވާނެ ކަމަށް ނުބެލެވެ އެވެ. ޖަޕާނުގެ މޫސުމާ ބެހޭ އިދާރާއިން ބުނީ މިއީ ވަރަށް ބާރުގަދަ ތޫފާނެއް ކަމަށެވެ.
އެގޮތުން 2018 ގައި 14 މީހުން މަަރުވި ތޫފާން ޖޭބީ އާއި 2019 ގައި މުޅި ޖަޕާނުން ކަރަންޓު ކެނޑެން މަގުފަހިވި ތޫފާން ހަގިބިސްއަށް ވުރެ ވެސް މި ތޫފާން ބާރުގަދަ ކަމަށް ބެލެވެ އެވެ.
