ބާރުގަދަ ތޫފާން ނަންމަޑޯލްއަށް ތައްޔާރުވުމުގެ ގޮތުން ޖަޕާނުގައި އެތައް ހާސް ބަޔަކު ރައްކާތެރި ހިސާބުތަކަށް ބަދަލުކޮށްފި އެވެ.
ތޫފާން އެންމެ ފުރަތަމަ އަރާނެ ކަމަށް ބެލެވެނީ އާދީއްތަ ދުވަހު ކިޔޫޝޫ ރަށަށެވެ. ގަޑިއަކު 270 ކިލޯމީޓަަރު ބާރުމިނުގައި ވައިޖެހި، ބައެއް ހިސާބުތަކަަށް 500 މިލިމީޓަަރުގެ ވާރޭ ވެހޭނެ ކަމަށް ލަފާާކުރެވެ އެވެ.
ކިޔޫޝޫއަށް ހާއްސަ އެލާޓެއް ނެރިފައިވާ އިރު، ބިންގަނޑު ކަނޑައިގެން ގޮސް ފެންބޮޑުވެދާނެކަމުގެ އިންޒާރު ވެސް ދީފައިވެ އެވެ. އެ ތަނުގެ ރޭލު އަދި ފްލައިޓް ދަަތުރުތައް ވަނީ ކެންސަލްކޮށްފަ އެވެ.
ކިޔޫޝޫއަކީ ޖަޕާނުގެ އެންމެ ދެކުނުގައި އޮންނަ ރަށެވެ. އެ ތަނުގައި 13 މިލިއަން މީހުން ދިރިއުޅެ އެވެ. ތޫފާން އެރުމަށް ފަހު މިސްރާބް ހުންނާނީ އިރުއުތުރުން ޖަޕާނުގެ މެދުތެރެއިން ޓޯކިޔޯއާ ދިމާލަށް ކަމަށް ބެލެވެ އެވެ.
ތޫފާނު އެރުމަށް ފަހު ވެސް އޭގެ ބާރު ދަށް ވާނެ ކަމަށް ނުބެލެވެ އެވެ. ޖަޕާނުގެ މޫސުމާ ބެހޭ އިދާރާއިން ބުނީ މިއީ ވަރަށް ބާރުގަދަ ތޫފާނެއް ކަމަށެވެ.
އެގޮތުން 2018 ގައި 14 މީހުން މަަރުވި ތޫފާން ޖޭބީ އާއި 2019 ގައި މުޅި ޖަޕާނުން ކަރަންޓު ކެނޑެން މަގުފަހިވި ތޫފާން ހަގިބިސްއަށް ވުރެ ވެސް މި ތޫފާން ބާރުގަދަ ކަމަށް ބެލެވެ އެވެ.
