އިންޑިއާގެ މުމްބާއީގައި ބާއްވާ މަހަރާޝްތުރާ އިންޓަނޭޝަނަލް ޗެލެންޖު ބެޑްމިންޓަން މުބާރާތުގައި ވާދަކުރުމަށް ރާއްޖޭގެ ރިވައިވަލް ސްޕޯޓްސްގެ ޓީމެއް އިންޑިއާ އަށް ހިނގައްޖެ އެވެ.
މި މަހުގެ 13-18 އަށް މުމްބާއީގައި އޮންނަ މި މުބާރާތުގައި ދުނިޔޭގެ 12 ގައުމަކުން 560 ކުޅުންތެރިން ވާދަކުރާނެ އެވެ. މި މުބާރާތުގައި ރާއްޖޭގެ އިތުރުން ދެން ވާދަކުރަނީ އިންޑިއާ، ޖަޕާން، މެލޭޝިއާ، އުގެންޑާ، ޒެމްބިއާ، ޒިމްބާބްވޭ، އެމެރިކާ، ކެނެޑާ، ތައިލެންޑް، ޔޫއޭއީ އަދި ލަންކާގެ ކުޅުންތެރިންނެވެ. އިންޑިއާ އިން އެކަނިވެސް 350 ކުޅުންތެރިން މި މުބާރާތުގައި ވާދަކުރާނެ އެވެ.
ރާއްޖެއިން ވާދަކުރާ ރިވައިވަލް ސްޕޯޓްސް ކުލަބުގައި ހިމެނެނީ ކުލަބުގެ އަހުމަދު ތޯއިފް މުހައްމަދު، ޒަޔާން ޝަހީދު ޒަކީ، ރިޝްވާން ޝިޔާމް އަދި ހައިޝަމް އިބްރާހިމް އެވެ. މި ޓީމާ އެކު ކޯޗެއްގެ ގޮތުގައި ބައިވެރިވާނީ ކުލަބުގެ ހެޑް ކޯޗު ނަޝްފާން މުހައްމަދު އެވެ.
ގައުމީ ޓީމުގެ އައިމިނަތު ނަބީހާ (ނަބީ) އާއި ފާތިމަތު ނަބާހާ (ނަބާ) ވެސް މި ފަހަރުގެ މަހަރާޝްތުރާ ޗެލެންޖްގައި ވާދަކުރެ އެވެ.
2019 ވަނަ އަހަރުގެ އިންޑިއަން އޯޝަން އައިލެންޑް ގޭމްސް އަށް ފަހު ނަބާ އާއި ނަބީ މެޑަލްތައް ދައްކާލަނީ
މި މުބާރާތުގައި ވާދަކުރާ ކުޅުންތެރިންގެ ތެރެއިން ތޯއިފް އަކީ ރާއްޖޭގެ ގައުމީ ޗެމްޕިއަނެވެ. ދާދި ފަހުން ރިވައިވަލް އިން ވަނީ ތޯއިފް އަށް އެއް އަހަރު ދުވަހުގެ ޓްރެއިނިން ސްކޮލާޝިޕެއް ދީފަ އެވެ. މި ސްކޮލާޝިޕްގެ ދަށުން އިންޑިއާގެ ހައިޕާފޯމަންސް ޓްރެއިނިން ސެންޓަރެއްގައި ތޯއިފް ތަމްރީން ހަދާނެ އެވެ. އޭނާ ތަމްރީންތަކާ ގުޅޭނީ މަހަރާޝްތްރާ އިންޓަނޭޝަނަލް ޗެލެންޖަށް ފަހު ގަ އެވެ.
ޗެލެންޖުގައި ވާދަކުރާ އެހެން ކުޅުންތެރިންނަށް ބަލާއިރު ޒަޔާން އާއި ރިޝްވާން އަކީ މީގެ މަހެއްހާ ދުވަސްކުރިން ނިމުނު ކޮމަންވެލްތު ގޭމްސްގައި ވާދަކުރި ދެ ކުޅުންތެރިންނެވެ. އެ މުބާރާތުގައި ދެ ކުޅުންތެރިންވެސް ރަނގަޅު ކުޅުމެއް ދެއްކި އެވެ.
ހައިޝަމް އަކީ ރިވައިވަލްގެ ޒުވާން ކުޅުންތެރިންގެ ތެރެއިން އެންމެ ބާރަށް ކުރިއަރަމުން އަންނަ ތަރި އެވެ. އޭނާ އަށް ބައިނަލްއަގްވާމީ މުބާރާތްތަކުން ގިނަ ފުރުސަތުތައް ހޯދައިދިނުމަށް ކުލަބުން އަންނަނީ މަސައްކަތްކުރަމުންނެވެ. ތަމްރީންތަކުގައިވެސް އޭނާގެ ފަރާތުން ރަނގަޅު ކުރިއެރުމެއް ފެންނަކަން ފާހަގަކޮށްލެވެ އެވެ.
މަހަރާޝްތުރާ އިންޓަނޭޝަނަލް ޗެލެންޖުގައި ދުނިޔޭގެ ނިސްބަތުން ވަރުގަދަ ކުޅުންތެރިން ވާދަކުރާނެ އެވެ. އޭގެ ތެރެއިން ދުނިޔޭގެ ރޭންކިންގެ ގަދަ 100 ގައި ހިމެނޭ ކުޅުންތެރިންވެސް ވާދަކުރާނެ އެވެ. ފަސް އިވެންޓެއް މި މުބާރާތުގައި ކުރިއަށްދާއިރު، އިނާމް ފައިސާގެ ގޮތުގައި 15 ހާސް ޑޮލަރުގެ ފައިސާގެ އިނާމެއް ދިނުމަށް ވެސް ވަނީ ހަމަޖެހިފަ އެވެ.
މަހަރާޝްތުރަ ޗެލެންޖްގެ ކޮލިފައިންގައި ބައެއް ކުޅުންތެރިން ވާދަކުރާއިރު، ޒަޔާން އާއި ނަބާހާ އަދި ނަބީހާ އަށް ވަނީ ސިންގަލްސްގެ މެއިން ޑްރޯ އިން ފުރުސަތު ލިބިފަ އެވެ. އަދި ނަބާ އާއި ނަބީގެ ޕެއާ އިން އަންހެން ޑަބަލްސްގައި ވާދަކުރާނީ މެއިން ޑްރޯގަ އެވެ. މިދިޔަ މަހު ނަބާ އާއި ނަބީގެ ޕެއާ އިން ވަނީ ޖަޕާންގެ ޓޯކިޔޯގައި ކުރިއަށްދިޔަ ވޯލްޑް ޗެމްޕިއަންޝިޕްގައި ވެސް ވާދަކޮށްފަ އެވެ.
