މެޑްރިޑް (ސެޕްޓެމްބަރު 11) - ސްޕެނިޝް ލީގުގައި މިރޭ ފަހަތުން އަރައި 4-1 އިން މަޔޯކާ ބަލިކޮށް ރެއާލް މެޑްރިޑުން ކުޅުނު ފަސް ވަނަ މެޗުން ވެސް މޮޅުވެ ލީގުގެ އެއް ވަނަ އަށް ޖެހިލައިފި އެވެ.
ރެެއާލް މި މެޗަށް ނުކުތްއިރު، އެއް ވަނައިގައި އޮތީ ރޭ ކުޅުނު މެޗުން މޮޅުވެގެން ބާސެލޯނާ އެވެ. ރެއާލް އެއް ވަނަ އަށް ޖެހިލީ ފަސް މެޗުން 15 ޕޮއިންޓާ އެކު އެވެ. ދެ ވަނައިގައި އޮތް ބާސެލޯނާ އަށް ވަނީ ފަސް މެޗުން 13 ޕޮއިންޓް ލިބިފަ އެވެ.
ރެއާލަކީ ޔޫރަޕްގެ ވަރުގަދަ ފަސް ލީގުގެ ތެރެއިން ލީގުގައި މިހާތަނަށް ކުޅުނު ހުރިހާ މެޗަކުން މޮޅުވެ، ފުރިހަމަ ރެކޯޑަކާ އެކު އޮތް ހަމައެކަނި ޓީމެވެ.
ސަންޓިއާގޯ ބާނަބޭއުގައި މިރޭ ރެއާލް ކުޅުނު މެޗަށް އެ ޓީމުން ނުކުތީ އަނިޔާގެ ސަބަބުން ޓީމުގެ ކެޕްޓަން، ކަރިމް ބެންޒެމާ އަށް ނުކުޅެވޭއިރު، އެޑަން ހަޒާޑް ފުރަތަމަ އެގާރައިގައި ހިމަނައިގެންނެވެ. މި މެޗުގައި ފުރަތަމަ ލީޑުނެގީ މަޔޯކާ އިންނެވެ. މެޗުގެ 35 ވަނަ މިނިޓްގައި މަޔޯކާ އަށް ކުޅޭ ދެކުނު ކޮރެއާގެ ފޯވާޑް، ލީ ކަންގް-އިން ނެގި ހިލޭ ޖެހުމަކުން އެ ޓީމުގެ ކުރިއަށް ކުޅޭ ވެދާތު މުރީކީ ވަނީ ބޮލުން ގޯލަށް ބޯޅަ ފޮނުވާލައިފަ އެވެ.
މަޔޯކާގެ ކީޕަރު ރަޖްކޮވިޗް (ކ) ކައިރިން ބޯޅަ ހިފައިގެންދާން ރެއާލްގެ ވިނީ މަސައްކަތް ކުރަނީ.--- ފޮޓޯ: އޭއެފްޕީ
ރެއާލަށް އެއްވަރުކޮށްދިނީ ފުރަތަމަ ހާފުގެ އިތުރު ވަގުތުގައި ފެޑޭ ވަލްވޭޑޭ ޖެހި މޮޅު ގޯލުންނެވެ. އަމިއްލަ ހާފުގެ ތެރެއިން ބޯޅަ ހިފައިގެން ގޮސް ވަލްވޭޑޭ އޭރިއާބޭރުން ޖެހި ޝޮޓް އަމާޒުވީ ގޯލުގެ މަތީ ކަނަށެވެ. މިއީ އިންޑިވިޖުއަލީ ބަލާއިރު މޮޅު ގޯލެކެވެ. ރެއާލުން ލީޑުނެގީ މެޗުގެ 72 ވަނަ މިނިޓްގައި ވިނީޝިއުސް ޖޫނިއާ (ވިނީ) ޖެހި ގޯލުންނެވެ. ރޮޑްރީގޯ ހުސްކޮށްލާފައި ދިން ބޯޅަ އޭރިއާތެރެއިން ވިނީ ވަނީ ހަމަޖެހިލާފައި ގޯލަށް ފޮނުވާލައިފަ އެވެ.
މެޗު ފަހުކޮޅުގައި ރެއާލުން އިތުރު ދެ ގޯލު ޖެހި އެވެ. އެ ގޮތުން މެޗުގެ 89 ވަނަ މިނިޓްގައި މަޔޯކާގެ އޭރިއާތެރެއިން ކުޅުންތެރިއަކު ކައިރިން .ނައްޓާލުމަށް ފަހު ރޮޑްރީގޯ ވަނީ ރެއާލްގެ ތިން ވަނަ ގޯލު ޖަހައިފަ އެވެ.
އިތުރު ވަގުތުގައި ރެއާލްގެ ހަތަރު ވަނަ ގޯލު ޖެހީ އެންޓޯނިއޯ ރޫޑިގާ އެވެ. ރޫޑިގާ އަކީ ޝޮކްރްޑަން މުސްތާފީ އަށް ފަހު ޔޫރަޕްގެ ވަރުގަދަ ފަސް ލީގުގެ ތެެރެއިން ހަތަރު ލީގުގައި ލަނޑު ޖެހި ޖަރުމަނުގެ ދެ ވަނަ ކުޅުންތެރިޔާ އެވެ. ރޫޑިގާ މި ގޯލު ޖެހީ ޓޯނީ ކްރޫސް ނެގި ހިލޭ ޖެހުމަކަށް ހުސްކޮށް އަރައި ވޮލީ އަކުންނެވެ.
މި މެޗުގައި ބަދަލަކަށް ކުޅެން އަރަން ރެއާލްގެ ވިންގް، އަސެންސިއޯ ވޯމްއަޕް ކުރި ނަމަވެސް ރެއާލްގެ ކޯޗު ކާލޯ އަންޗެލޮޓީ ނިންމީ އަސެންސިއޯ ކުޅެން ނޭރުވުމަށެވެ. އެ ނިންމުމާ މެދު އަސެންސިއޯ ބެންޗުގައި އިނދެ ވަރަށް ބޮޑަށް ހިތްހަމަ ނުޖެހުން ފާޅުކުރި އެވެ. މެޗަށް ފަހު އޮތް ނޫސްވެރިންގެ ބައްދަލުވުމުގައި އަންޗެލޮޓީ ބުނީ ބެންޗުގައި ހިނގާދިޔަ ކަންތައްތައް ކްލަބުން ބަލާނެ ކަމަށެވެ.
