އައްޑޫ ސިޓީ މީދޫގައި އެ އަތޮޅު ބަހުރުވައިން ހުތުބާ ކިޔާފައިވާ މުދިމު ސަސްޕެންޑް ކުރީ ހުތުބާއަށް އުނި އިތުރު ގެނެސްގެން ކަމަށް އިސްލާމިކް މިނިސްޓްރީން ބުނެފި އެވެ.
އިސްލާމިކް މިނިސްޓްރީން ބުނީ މީދޫގެ މުދިމު މުހައްމަދު ރަޝީދަށް ހުކުރު ކުރުން މަނާ ކުރުމަށް އައްޑޫގައި އޮންނަ ހުތުބާ ކޮމިޓީން ނިންމީ ފާސްކޮށްފައިވާ އުސޫލާ ހިލާފަށް ހުކުރު ހުތުބާ ކިޔައިގެން ކަމަށެވެ.
"ހުތުބާއަށް އުނި އިތުރު ގެނައުމަކީ މަނާ ކަމެއް، މާދަމާ އެމައްސަލަ ނިންމުމަށްފަހު އައްޑޫގައި އޮންނަ ހުތުބާ ކޮމިޓީގެ ރިޕޯޓް މިނިސްޓްރީއަށް ލިބޭނެކަމަށް ބެލެވޭ،" އިސްލާމިކް މިނިސްޓްރީން ބުނެފައިވެ އެވެ.
ސ. މީދޫ މަސްޖިދުލް މަޖުދުއްދީނުގައި މުދިމުކަން ކުރާ މުހައްމަދު ރަޝީދު، މިދިޔަ ހުކުރު ދުވަހު ހުތުބާ ދީފައިވަނީ އައްޑޫ ބަހުރުވައިން ކަމަށް މި ނޫހާ ވާހަކަ ދެއްކި އެ ރަށު ބައެއް މީހުން ވަނީ ބުނެފަ އެވެ.
އެނގިފައިވާ ގޮތުގައި އައްޑޫ ބަހުރުވައަށް ހުތުބާ ބަދަލުކޮށްގެން ކިޔަމުން ދިޔައިރު، ބައެއް ލަފުޒުތައް އާދައިގެ ދަރަޖައިގައި ކިޔާފައިވާތީ މީހުންގެ ޝަކުވާ އިސްލާމިކް މިނިސްޓްރީ އަށް ހުށަހަޅާފައިވެ އެވެ.
