ދަތިކުރުމުގެ ފިޔަވަޅުތަކާ ހެދި ރަޝިއާގެ ސިފައިންނަށް ހަތިޔާރު ލިބުން ދަތިވެފައި ވާތީ އުތުރު ކޮރެއާއިން ހަތިޔާރު ފޯރުކޮށްދެމުންދާ ކަމަށް އެމެރިކާގެ ނޫސްތަކުން ރިޕޯޓުކޮށްފި އެވެ.
މިހާރު އާއްމުކޮށްފައިވާ ސިއްރު ލިޔުންތަކަކާ ހަވާލާދީ ނިއު ޔޯކް ޓައިމްސްއިން ބުނީ ރަޝިއާއިން ވަަނީ އެތައް މިލިއަން ރޮކެޓާއި އާޓިލެރީ ޝެލް އުތުރު ކޮރެއާއިން ގަނެފައި ކަމަށެވެ.
ޔޫކްރެއިން ހަނގުރާމަ ދިގުލައިގެން ދާތީ ރަޝިއާއިން އިތުރު ހަތިޔާރު ހޯދަން އުތުރު ކޮރެއާއަށް ބަރޯސާ ވާނެ ކަމަށް އެމެރިކާގެ އޮފިޝަލަކު ވިދާޅުވި އެވެ.
ރިޕޯޓުތައް ބުނާ ގޮތުން އިރާންގެ ޑްރޯންތަކުގެ ފުރަތަމަ ޝިޕްމަންޓް ވެސް މިދިޔަ ހަފްތާގައި ރަޝިއާއަށް ލިބުނެވެ.
ހުޅަނގުގެ ދަތިކުރުމުގެ ފިޔަވަޅުތައް އަޅާފައިވާ އިރާނާއި އުތުރު ކޮރެއާއިން ދަނީ ޔޫކްރެއިން ހަނގުރާމައާ ދިމާކޮށް ރަޝިއާއާ ގުޅުން ވަރުގަދަ ކުރަމުންނެވެ.
ފިންލޭންޑްގެ ތިންކް ޓޭންކް ސެންޓާ ފޯ ރިސާޗް އޮން އެނާޖީ އެންޑް ކްލީން އެއާއިން ބުނީ ދަތިކުރުމުގެ ފިޔަވަޅުތަކުގެ ސަބަަބުން ހަކަތަ އެކްސްޕޯޓްކޮށްގެން ރަޝިއާއިން ހޯދާ އާމްދަަނީއަށް ގެއްލުމެއް ނުލިބެ އެވެ.
ޔޫކްރެއިން ހަނގުރާމަ ފެށި ފަހުން ތެލާއި ގޭހުގެ އަގު އުފުލުމުން ފާއިތުވި ހަ މަހުގެ ތެރޭގައި ރަޝިއާއަށް އެ ތަަކެތީގެ އެކްސްޕޯޓުން 158 މިލިއަން ޔޫރޯ ލިބިފައިވާ ކަމަށް ބެލެވެ އެވެ.
އެހެން ނަމަވެސް އެމެރިކާ އާއި ހުޅަނގުގެ ގައުމުތަކުން ގަަބޫލުކުރާ ގޮތުގައި ފިޔަވަޅުތަކުގެ ސަބަބުން ރަޝިއާގެ ސިފައިންނަށް ހަތިޔާރު ސަޕްލައި ކުރުމުގައި ގޮންޖެހުންތައް އެބަ ހުއްޓެވެ.
