ދެހާސްތިރީސްތިންވަނަ އަހަރުގެ ރިޔާސީ އިންތިހާބު ކާމިޔާބުކޮށް ވެރިކަމަށް އައުމަށް ކަނޑައަޅައި، އަދާލަތު ޕާޓީން ކުރިއަށް އޮތް 10 އަހަރު މަސައްކަތް ކުރާނެ ގޮތުގެ ސްޓްރެޓެޖިކް ޕްލޭނެއް ފާސްކޮށްފި އެވެ.
މިހާރު ވެރިކަން ކުރާ ކޯލިޝަންގައި ވެސް ހިމެނޭ އަދާލަތު ޕާޓީން މި ޕްލޭން ފާސްކުރީ ރޭ ބޭއްވި އެ ޕާޓީގެ މަޝްވަރާ މަޖިލީހުގެ ބައްދަލުވުމުގަ އެވެ.
"މާތްﷲ އިރާދަކުރެއްވިއްޔާ 2033 ވަނަ އަހަރު ރާއްޖޭގެ ރައީސްކަން ކުރައްވާނީ އަދާލަތު ޕާޓީގެ ބޭފުޅެއް،" ބައްދަލުވުމުގެ ނިންމުން ހިއްސާކުރައްވައި އަދާލަތު ޕާޓީގެ ރައީސް އަދި ހޯމް މިނިސްޓަރު އިމްރާން އަބްދުﷲ ކުރެއްވި ޓްވީޓެއްގައިވެ އެވެ.
އަދާލަތު ޕާޓީގެ ތަރުޖަމާނު އަދި ހޯމް މިނިސްޓްރީގެ ސްޓޭޓް މިނިސްޓަރު އަލީ ނަޒީރު ވެސް މި ނޫހަށް ވިދާޅުވި ގޮތުގައި ކުރިއަށް އޮތް 10 އަހަރުގެ ޕްލޭނުގައި އެންމެ މުހިންމު ކަމަކީ އެ ޕާޓީގެ ވެރިކަމެއް ހަމަޖެއްސުން ކަމަށެވެ.
މީގެ އިތުރުން ސްޓްރެޓެޖިކް ޕްލޭންގައި މައިގަނޑު އަށް ދާއިރާއަކުން ޕާޓީގެ ހަރަކާތްތައް ކުރިއަށް ގެންދަން ރާވާފައިވާ ކަމަށް ނަޒީރު ވިދާޅުވި އެވެ.
"އެއީ އެތެރޭގެ ހިންގުން، ގޮފި އަދި ދާއިރާތައް، ޕަބްލިކް ރިލޭޝަންސް، ޕާޓީގެ ސިޔާސަތު، އިންތިހާބުތައް، ޕާޓީގެ މާލިއްޔަތުގެ ކަންކަން، ދާޚިލީ އަދި ޚާރިޖީ ގުޅުންތައް، އަދި ޕާޓީގެ މެމްބާޝިޕް އިތުރުކުރުން،" ނަޒީރު ކިޔައިދެއްވި އެވެ.
2033 ވަނަ އަހަރުގެ ރިޔާސީ އިންތިހާބުގައި ވާދަކުރުމަށް އަދާލަތު ޕާޓީން ޕްލޭނެއް ފާސްކުރިއިރު މިހާތަނަށް އެ ޕާޓީން ރިޔާސީ އިންތިހާބުގައި ވާދަކޮށްފައެއް ނުވެ އެވެ. އޭގެ ބަދަލުގައި އެހެން ޕާޓީއެއްގެ ރިޔާސީ ކެންޑިޑޭޓަކަށް ތާއީދު ކުރީ އެވެ.
އާ ގާނޫނުއަސާސީގެ ދަށުން މިހާތަނަށް ރާއްޖޭގައި ތިން ރިޔާސީ އިންތިހާބު ބޭއްވިއިރު، އެއިން ކޮންމެ އިންތިހާބެއް ކާމިޔާބުވީ ކޯލިޝަނެއްގެ ތާއީދު އޮތް ރިޔާސީ ކެންޑިޑޭޓެކެވެ. މި ފަހަރު ފިޔަވައި ކުރީ ދެ ފަހަރު ވެރިކަމުގެ ދައުރުގެ މެދު ތެރެއިން ކޯލިޝަން ރޫޅިގެން ގޮސްފައިވެ އެވެ.
މިއިން ކޮންމެ ކޯލިޝަނެއްގައި ވެސް އަދާލަތު ޕާޓީގެ ބައިވެރިވުން އޮވެ އެވެ. މިހާރު ވެރިކަން ކުރާ ކޯލިޝަންގެ ބައިވެރިޔެއްގެ ގޮތުގައި އަދާލަތު ޕާޓީ އޮތް އިރު، އެ ޕާޓީ ތަމްސީލް ކުރާ ދެ ބޭފުޅަކު ރައީސް އިބްރާހީމް މުހައްމަދު ސޯލިހްގެ ވަޒީރުންގެ މަޖިލީހުގައި ތިއްބަވަ އެވެ.
