ދައުލަތަށް ގިނަ ދުވަހު ހިދުމަތް ކުރެއްވި އުމަރު ޒާހިރުގެ ހަނދާނުގައި، ނޫސްވެރިޔާ މުހައްމަދު ޖަމީލު ލިޔުއްވާފައިވާ ފޮތް "ނަމޫނާ ޝަހްސިއްޔަތެއް" ރޭ ނެރެފި އެވެ.
ދައުލަތަށް ގިނަ ދުވަހު ހިދުމަތް ކުރެއްވި އުމަރު ޒާހިރުގެ ހަނދާނުގައި މައުމޫން ފައުންޑޭޝަންގެ ފަރާތުން ފޮތެއް ނެރުނީ ރޭ ޝީ ބިލްޑިންގައި ބޭއްވި ހާއްސަ ރަސްމިއްޔާތެއްގަ އެވެ. ރަސްމިއްޔާތުގައި އެ ފޮތް ނެރެދެއްވީ ނައިބު ރައީސް ފައިސަލް ނަސީމްގެ އިތުރުން ރައީސް މައުމޫން އަބްދުލްގައްޔޫމެވެ.
އެ ރަސްމިއްޔާތުގައި ވާހަކަދައްކަވަމުން ނައިބު ރައީސް ފައިސަލް ވިދާޅުވީ އުމަރު ޒާހިރުގެ ހަޔާތްޕުޅަށް އަދި ކުރެއްވި ހިދުމަތްތަކުގެ މައްޗަށް ލިޔުއްވާފައިވާ ފޮތް ނެރެދެއްވުމުގެ ފުރުސަތު ލިބިވަޑައިގެންނެވުމަކީ ލިބުނު ވަރަށް ބޮޑު ޝަރަފެއް ކަމަށެވެ. ފައިސަލް ވިދާޅުވީ މިއަދު އުމަރު ޒާހިރު ނެތް ނަމަވެސް އެމަނިކުފާނުގެ ހަނދާންތަކާއިި ކުރެއްވި ހިދުމަތްތަކާއި ވިދާޅުވެފައިވާ ބަސްފުޅުތައް ހަނދާނުން ފޮހެވިގެން ނުދާ ކަމަށާއި، ތާ އަބަދަށް ދެމިގެން ދާނެ ކަމަށް އުއްމީދު ކުރައްވާ ކަމަށެވެ.
"އުމަރު ޒާހިރުގެ ހަޔާތްޕުޅުން އަޅުގަނޑުމެންނަށް ދަސްކުރެވޭނެ ގިނަގުނަ ފިލާވަޅުތަކެއް އެބަހުރި،" ފައިސަލް ވިދާޅުވި އެވެ.
އުމަރު ޒާހިރުގެ ހަޔާތްޕުޅަށް ފޮތެއް ނެރެދެއްވުމަށްފަހު، އެ ރަސްމިއޔްާތުގައި ނައިބު ރައީސް، ފައިސަލް ނަސީމް ވާހަކަދައްކަވަނީ -- ފޮޓޯ: ރައީސް އޮފީސް
އޭނާ ވިދާޅުވި މިއަދު އަޅުގަނޑުމެންގެ ތެރެއިން ނެތިގެންދާ ކަންތައްތަކަކީ ކޮބަކަން އެނގޭ ކަމަށާއި، އެ ކަންތައްތަކަށް އަލިއަޅުވާލާ ނަމަ، އުމަރު ޒާހިރުގެ ހަޔާތްޕުޅުގައި އެއިން ކޮންމެ ކަމެއް ވަރަށް ފުރިހަމައަށް ކުރެއްވި ކަމަށެވެ. ސްކޫލުގެ ނާޒިރުކަން ކުރެއްވި ދުވަސްވަރުގެ މިސާލު ނަންގަވާ ފައިސަލް ވިދާޅުވީ އުމަރު ޒާހިރު ވަނީ ވަރަށް ރަނގަޅަށް ދަރިން ތަރުބިއްޔަތު ކުރައްވާފައިވާ ކަމަށެވެ.
"އެއީ ކޮންމެހެން މާ ރީތި ސްކޫލަކަށް، މާ ރީތި ބިލްޑިންއަކަށް އެއްވެސް ހާލެއްގައި ވެގެނެއް ނޫން. ސްކޫލެއްގައި ދަރިން ތަރުބިއްޔަތު ވަނީ އަދި ރިވެތި ސިފަތައް ކުދިން ގައިގައި އަށަގަންނަނީ އެ ސްކޫލެއް ހަދާފައި ހުންނަ ގޮތަކުންނެއް ނޫން. ޖަހާފައި ހުންނަ މުއްޓަކުނެއް ނޫން. ފުރާޅުގައި ޖަހާފައި ހުންނަ ކުލައިގެ ޓިނަކުން ނޫން. ނަމަވެސް އެ ސްކޫލުގެ ލީޑަރެއްގެ ގައިގައި ހުންނަ މުހިންމު ސިފަތަކެއްގެ ސަބަބުން،" ފައިސަލް ވިދާޅުވި އެވެ.
އުމަރު ޒާހިރުގެ ހަޔާތަށް އިތުރަށް އަލިއަޅުއްވާލައްވަމުން ފައިސަލް ވިދާޅުވީ އުމަރު ޒާހިރު ބައެއް ކަންތައްތައް ކުރައްވަން އުޅުއްވުމުން އެކަން ނުކުރެވޭނެ ކަމަށް ބުނެ، ބައެއް މީހުން ޖޯކު ޖެހި ކަމަށެވެ. އުމަރު ޒާހިރުގެ ފުށުން އެންމެ ބޮޑަށް ފާހަގަކުރެވޭ، އެންމެ ރަނގަޅު ސިފައަކީ ކަމަށް ކަމޭ ހިތައި، ކުރައްވަން އުޅުއްވާ ކޮންމެ މަސައްކަތެއް ވަރަށް ރަނގަޅަށް ކުރެއްވުން ކަމަށެވެ.
ފައިސަލް އިތުރަށް ވިދާޅުވީ، ސްކޫލުތަކުގައި ވެސް އުމަރު ޒާހިރުގެ ވާހަކަދައްކަން ޖެހޭ ކަމަށާއި، ޒުވާނުން މޯޓިވޭޓްކޮށް ހިތްވަރު ދިނުމުގެ ގޮތުން ވެސް އެ ވާހަކަދައްކަން ޖެހޭ ކަމަށެވެ. އޭނާ ވަނީ އުމަރު ޒާހިރު ސިފަ ކުރެއްވެނީ މި ޖީލުގެ ޝަހްސިއްޔަތުގެ ގޮތުގައި ކަމަށެވެ.
އުމަރު ޒާހިރުގެ ހަޔާތްޕުޅަށް ފޮތެއް ނެރެދެއްވުމަށްފަހު، އެ ރަސްމިއޔްާތުގައި ކުރީގެ ރައީސް، މައުމޫން އަބްދުލްގައްޔޫމް ވާހަކަދައްކަވަނީ -- ފޮޓޯ: ރައީސް އޮފީސް
އެ ފޮތް ނެރެދެއްވުމަށްފަހު ރައީސް މައުމޫނުވެސް ވަނީ އެ ރަސްމިއްޔާތުގައި ވާހަކަދައްކަވާފަ އެވެ. މައުމޫންގެ ވާހަކަ ފައްޓަވަމުން ވެސް ވިދާޅުވީ މިއަދު އުމަރު ޒާހިރު ދުނިޔޭގައި ހުންނެވި ނަމަ ހުންނަވާނީ މަގުމަތީގައި ކަމަށާއި، އެހީ ބޭނުންވަނީ ކޮންތަނަކަށްތޯ އާއި ފެންބޮޑުވެފައި އޮތީ ކޮންތަނެއްގައިތޯ ބެއްލެވުމަށް ކަމަށެވެ. އަދި އުމަރު ޒާހިރުގެ ހަޔާތްޕުޅުން ލިބިވަޑައިގަންނަވާ އިބްރަތަކީ ގައުމަށް ބޭނުންވާ ކަންކަން ކޮށްދެއްވުމުގައި 24 ގަޑިއިރު ހުންނެވުން ކަމަށް ވިދާޅުވި އެވެ.
އޭގެ އިތުރުން، އުމަރު ޒާހިރަކީ މައުމޫން ފައުންޑޭޝަނުގެ އެއް ތަނބުކަން ފާހަގަކުރައްވާ މައުމޫން ވިދާޅުވީ މައުމޫން ފައުންޑޭޝަނުގެ ކޮންމެ ކަމެއްގައި ބައިވެރިވެ ވަޑައިގެން މަޝްވަރާ ދެއްވާ، އެހީދެއްވި ކަމަށެވެ.
އުމަރު ޒާހިރު އަވަހާރަވީ ކޮވިޑް ބަލީގައި ދަރުމަވަންތަ ހޮސްޕިޓަލުގައި ފަރުވާ ހޯއްދަވަމުން އަންނަނިކޮށް މިދިޔަ ޑިސެމްބަރު 20، 2021 ގަ އެވެ. އަވަހާރަވިއިރު އުމުރުފުޅަކީ 85 އަހަރެވެ.
