ޖަލްބޫޓް މެރިން ސާވިސަސްއިން ހުޅުވާލި އިންޓާންޝިޕް ޕްރޮގްރާމުގެ ފުރަތަމަ ބެޗު 15 ޒުވާނުންނާ އެކީ އަންގާރަ ދުވަހު ފަށައިފި އެވެ.
މިއީ މެރިން އޮޕަރޭޝަންސް ދާއިރާއިން ތަމްރީނުވާން ޝައުގުވެރިކަން ހުރި ދިވެހިންނަށް އަމާޒުކޮށްގެން ޖަލްބޫޓް އިން ހިންގާ އިންޓާންޝިޕް ޕްރޮގްރާމެކެވެ.
މޯލްޑިވްސް ޕޮލިޓެކްނިކްގައި ބޭއްވި ހަފުލާއެއްގައި ޖަލްބޫޓްގެ އިންޓާންޝިޕް ޕްރޮގްރާމް ފައްޓަވައިދެއްވީ ހަޔާ އެޑިޔުކޭޝަން މިނިސްޓަރު ޑރ. އިބްރާހިމް ހަސަން އެވެ.
ހަފްލާގެ ބައިވެރިންނާ މުހާތަބު ކުރައްވައި ގައުމު ބިނާކުރުމާއި، އިންސާނީ ވަސީލަތް ތަރައްގީކުރުމުގައި ޕްރައިވެޓް ސެކްޓާގެ ބައިވެރިވުމުގެ މުހިއްމުކަމުގެ މައްޗަށް މިނިސްޓަރު އަލިއަޅުއްވާލެއްވި އެވެ. އަދި މިފަދަ ފުރުސަތަކީ މަދުން ނުލިބޭނެ ފުރުސަތެއްކަން ފާހަގަކޮށް މިފުރުސަތު ދޫކޮށް ނުލުމަށް އިންޓާނުންނަށް ހަނދާންކޮށްދިނެވެ.
ޖަލްބޫޓުގެ މި އިސްނެގުމަށް މަރުހަބާ ކިޔަމުން މިނިސްޓަރު ވަނީ އަދި މި ޒުވާންނަށް މިފަދަ ފުރުސަތެއް ހޯއްދަވައިދެއްވިކަމަށްޓަކައި ޝުކުރުދަންނަވާފަ އެވެ.
ހަ މަސް ދުވަހުގެ މުއްދަތަށް ކުރިޔަށް ގެންދާ މި ޕްރޮގްރާމުގެ ބައިވެރިންނަށް ޖަލްބޫޓް އިން މަސައްކަތްކުރާ ދާއިރާތަކުގެ ތެރެއިން ވޯޓާ ސްޕޯޓްސް، ޑައިވިން، އެކްސްކާޝަން، މެރީނާ އޮޕަރޭޝަންސް، ޓްރާންސްޕޯޓް، އެޑްމިން، ފައިނޭންސް އަދި މާކެޓިން ދާއިރާއިން ތަމްރީންވުމުގެ ފުރުސަތު ލިބޭނެ އެވެ.
އިންޓާންޝިޕް ނިންމާ ޒުވާނުންނަށް އިންޓާންޝިޕް ނިންމިކަމުގެ ލިޔުން އަދި ރިފަރެންސް ލެޓާ ދެވޭނެ އެވެ. މީގެ އިތުރުން އިންޓާރންޝިޕް ނިންމާ ޒުވާނުންނަށް ޖަލްބޫޓް އިން ވަޒީފާގެ ފަހި ފުރުސަތުތައް ވެސް ލިބޭނެ އެވެ. އިންޓާންޝިޕްގެ މުއްދަތުގައި އެލަވަންސެއް ވެސް ލިބޭނެ އެވެ.
ޖަލްބޫޓް މެރިން ސާވިސް ޕްރައިވެޓް ލިމިޓެޑަކީ ޔުނައިޓެޑް އަރަބް އެމިރެޓްސްގެ ޖަލްބޫޓް ހޯލްޑިން އެލްއެލްސީގެ ސަބްސިޑިއަރީ ކުންފުންޏެކެވެ.
ޖަލްބޫޓް މެރިން ސާރވިސަސް ހާއްސަވެފައިވަނީ ކަނޑުދަތުރާއި މެރީނާ މެނޭޖްމަންޓާއި ވޯޓާ ސްޕޯޓްސްގެ އިތުރުން ބޯޓް ބިލްޑިން އާއި ޗާޓާގެ ހިދުމަތަށެވެ. ޖަލްބޫޓްއިން މިހާރު ވެސް ރާއްޖޭގެ ބޮޑެތި ރިސޯޓްތަކަށް ދަތުރުފަތުރާއި ވޯޓާ ސްޕޯޓްސްގެ ހިދުމަތް ފޯރުކޮށްދެ އެވެ.
