ރައްޔިތުންގެ މަޖިލީހުގެ ރައީސް މުހައްމަދު ނަޝީދާއި ފޮރިން މިނިސްޓަރު އަބްދުﷲ ޝާހިދު އިންޑިއާއަށް ކުރައްވާ ދަތުރުގެ ތެރެއިން، އިންޑިއާ ސަރުކާރުގެ އިސް ބޭފުޅުންނާ ބައްދަލުކުރައްވަން ފަށައިފި އެވެ.
ޝާހިދުގެ ދަތުރަކީ އދ. ގެ އާންމު މަޖިލީހުގެ ރައީސްގެ ހައިސިއްޔަތުން ކުރައްވާ ރަސްމީ ދަތުރެގަ އެވެ. ނަޝީދު އިންޑިއާއަށް ވަޑައިގަތީ ނުރަސްމީ ދަތުރެއްގަ އެވެ.
ނަޝީދާއި ޝާހިދު އެކީގައި މިހާރު ވަނީ އިންޑިއާގެ އެކްސްޓާނަލް އެފެއާޒް (ފޮރިން) މިނިސްޓަރު ސުބްރަމަންޔަމް ޖައިޝަންކަރްއާއި އެ މިނިސްޓްރީގެ އެހެން ބައެއް ބޭފުޅުންނާ ބައްދަލު ކުރައްވައިފަ އެވެ.
މި ބައްދަލުވުންތަކުގެ ތަފްސީލެއް އަދި ނުދެ އެވެ.
ފޮރިން މިިނިސްޓްރީން ބުނެފައިވާ ގޮތުގައި ޝާހިދުގެ ދަތުރުފުޅުގެ ތެރެއިން އިންޑިއާގެ ނައިބު ރައީސް ޖަގްދީފު ދަންކަރު އާއި ފޮރިން ސެކްރެޓަރީ ވިނޭ ކުވާޓްރާއާ ބައްދަލު ކުރައްވާނެ އެވެ.
ނަޝީދާއި ޝާހިދު އެކީގައި އިންޑިއާގެ ފޮރިން މިނިސްޓަރާ ބައްދަލުކުރެއްވިއިރު، އެމްޑީޕީގެ އެތެރޭގައި ވަނީ ހިޔާލުތަފާތުވުންތައް ބޮޑުވެފަ އެވެ.
ދާދި ފަހުން ނަޝީދު ވަނީ 2018 ވަނަ އަހަރުގެ ރިޔާސީ އިންތިހާބުގައި ވާދަކުރެއްވުމުގެ ޝައުގުވެރިކަން ޝާހިދު ވެސް އޮތް ކަން ހާމަކުރައްވައިފަ އެވެ.
ނަމަވެސް ޝާހިދު މަޑުކުރައްވާފައި، ރައީސް އިބްރާހީމް މުހައްމަދު ސޯލިހް ނުކުންނަވަން ފުރުސަތު ދެއްވަން އެންގެވި ކަމަށް ނަޝީދު ވިދާޅުވެފައިވެ އެވެ.
އަންނަ އަހަރު ބާއްވާ ރިޔާސީ އިންތިހާބުގައި ވާދަކުރައްވާނެ އެމްޑީޕީގެ ރިޔާސީ ކެންޑިޑޭޓަކު ކަނޑައަޅާނީ އެ ޕާޓީގެ އެތެރޭގެ ޕްރައިމަރީއަކުންނެވެ.
އެ ޕްރައިމަރީގައި ވާދަކުރެއްވުމުގެ ޝައުގުވެރިކަން ރައީސް ސޯލިހު ފާޅުކުރައްވާފައިވާއިރު، ނަޝީދު ވެސް ވަނީ ޕްރައިމަރީގައި ވާދަކުރައްވާނެ ކަމަށް އިއުލާން ކުރައްވައިފަ އެވެ.
އެކަމަކު ތިންވަނަ ބޭފުޅަކާ މެދު ވިސްނަވަން ވެސް ރަނގަޅު ކަމަށް ނަޝީދު ވިދާޅުވެފައިވެ އެވެ. އެހެން ވިދާޅުވީ ވެސް ޝާހިދުގެ ނަން ފާހަގަ ކުރެއްވުމަށްފަހުގަ އެވެ.
