އިންސާފު ހޯދުމަށްކަމަށް ބުނެ ޖިނާއީ މައްސަލަތަކުގައި ތުހުމަތު ކުރެވޭ މީހުންނާމެދު ގާނޫނުތަކާ ހިލާފު އަނިޔާވެރި އަމަލުތައް ހިނގުން ހުއްޓާލުމަށް ފުލުހުން އިލްތިމާސްކޮށްފި އެވެ.
އެ މުއައްސަސާ ގެ ކަންބޮޑުވުން ޓުވިޓާގައި ހިއްސާކުރަމުން ބުނެފައިވަނީ، ކުށްތަކުގައި ތުހުމަތުވާ މީހުންނާ މެދު ކޯޓުތަކާއި ގާނޫނު ތަކުގެ ބޭރުން، ރައްޔިތުން އަމިއްލައަށް ނިޔާ ކަނޑައަޅައި އަދަބު ދިނުމަކީ މުޖުތަމައުގެ މަސްލަހަތު ގެއްލި ހިނގައިދާނެ ކަމެއް ކަމަށެވެ. އެހެންކަމުން އެފަދަ އަމަލުތަކުން ދުރުވުމަށް ވަނީ އިލްތިމާސްކޮށްފަ އެވެ.
އިންސާފުގެ ނަމުގައި އަމިއްލަ އަށް ގޮތް ކަނޑައަޅައި އަނިޔާވެރިވުމަކީ ކުށެކެވެ. އެފަދަ މިފަދަ ކުށްތައް ކުރާ ފަރާތްތަކުގެ މައްސަލަ ތަހުގީގުކޮށް ގަނޫނީ ފިޔަވަޅު އަޅާނެ ވާހަކަ ވެސް އެ މުއައްސަސާއިން ވަނީ ބުނެފަ އެވެ.
މި ފަހަކަށް އައިސް ކުށްތަކުގައި، ހާއްސަކޮށް ޖިނާއީ ކުށްތަކުގައި ތުހުމަތުވާ މީހުންނަށް، ރައްޔިތުން ނިކުމެ އެކި ވަރުގެ އަދަބު ދިނުމާއި ވަކި ހަމަލާތައް ދޭ ހާދިސާތައް ހިނގާ މިންވަރު ވަނީ އިތުރުވެފަ އެވެ. ހާއްސަކޮށް ރޭޕް އާއި ޖިންސީ ގޯނާގެ މައްސަލަތަކުގައި ތުހުމަތު ކުރެވޭ މީހުން މީގެ ތެރޭގައި ހިމެނެ އެވެ.
