ޖަޕާނުން އާ ނިޔުކްލިއާ ޕްލާންޓުތައް ގާއިމުކުރުމާ މެދު ވިސްނަން ޖެހޭ ކަމަށް ބޮޑު ވަޒީރު ފުމިއޯ ކިޝީޑާ ވިދާޅުވެއްޖެ އެވެ.
ޖަޕާނުގެ ނިޔުކްލިއާ ޕްލާންޓުތައް ހިންގުން މެދުކަނޑާލީ 2011 ވަނަ އަހަރުގެ ފުކުޝިމާ ކާރިސާއާ ގުޅިގެންނެވެ. އެހެންކަމުން އާ ޕްލާންޓުތައް ގާއިމްކުރުން ވާނީ ސިޔާސަަތަށް ގެންނަ ބޮޑު ބަދަލަކަށެވެ.
ކިޝީޑާ ވިދާޅުވީ ޔޫކްރެއިން ހަނގުރާމަ އާއި ހަކަތައިގެ އަގުތައް އުފުލެމުން ދިޔުމާ އެކު ހަކަތަ ލިބޭނެ އިތުރު ގޮތްތައް ހޯދުމުގެ މުހިއްމުކަން ފާހަގަވަމުންދާ ކަމަށެވެ.
އޭގެ އިތުރުން 2050 ވަނަ އަހަރުގެ ކުރިން ކާބަން ނިޔުޓްރަލްވުމަށް ޖަޕާނުން ކަނޑައަޅާފައިވާ ލަނޑުދަނޑިއަށް ވާސިލްވުމަށް ވެސް ނިޔުކްލިއާ ހަކަތަ ބޭނުން ކުރަން ޖެހިދާނެ ކަމަށް ވިދާޅުވި އެވެ.
ހަކަތައިގެ ސިޔާސަތާ ބެހޭ ބައްދަލުވުމެއްގައި ކިޝީޑާ ވިދާޅުވީ އާ ނިޔުކްލިއާ ރިއެކްޓަރުތައް ގާއިމްކުރުމުގެ އިތުރުން، މިހާރު ހުރި ޕްލާންޓުތައް އަލުން ބޭނުންކުރަން ފެށުމަށް ވެސް ސަރުކާރުން ވިސްނާނެ ކަމަށެވެ.
ޖަޕާނަށް 2011 ވަނަ އަހަރު ނިޔުކްލިއާ ކާރިސާއެއް ދިމާވީ ބާރުގަދަ ބިންހެލުމަކާ އެކު އެރި ސުނާމީގައި ފުކުޝިމާ ނިޔުކްލިއާ ޕްލާންޓުގެ ރިއެކްޓަރުތަކުގައި ފެންބޮޑުވުމުންނެވެ.
އޭގެ ސަބަބުން ރޭޑިއޭޝަން ލީކުވެ، 150،000 އަށް ވުރެ ގިނަ މީހުން އެހެން ހިސާބުތަކަށް ބަދަލުވާން ޖެހުނެވެ.
ޖަޕާނުގައި އޮޕަރޭޓް ކުރެވޭ 50 ރިއެކްޓަރު ހުރި އިރު، އެ ކާރިސާއަށް ފަހު 46 ރިއެކްޓަރުގެ އޮޕަރޭޝަން މެދުކަނޑާލި ކަމަށް އިންޓަނޭޝަނަލް އެޓޮމިކް އެނާޖީ އެޖެންސީ (އައިއޭއީއޭ) އިން ބުންޏެވެ.
އެޕްރީލް 2021 އާ ހަމައަށް، ނުވަ ރިއެކްޓަރު އަލުން އޮޕަރޭޓް ކުރަަން ފަށާފައިވާ އިރު، 14 ރިއެކްޓަރު އޮޕަރޭޝަނަށް ތައްޔާރުވުމުގެ މަސައްކަތް ދަނީ ކުރަމުންނެވެ.
