ފާއިތުވި 50 އަހަރުގެ ތެރޭގައި ފުރަތަމަ ފަހަރަށް ޖަޕާނުން އެ ގައުމުގެ ވިސާ ފީ ފަސް ގުނައަށް ބޮޑުކޮށްފި އެވެ.
އަންނަ ޖުލައި މަހުގެ އެއްވަނަ ދުވަހުން ފެށިގެން، އެއް ފަހަރު އެތެރެވުމަށް ދޫކުރާ "ސިންގަލް އެންޓްރީ" ވިސާގެ ފީ މިހާރު ހުރި 3،000 ޔެން (18.69 ޑޮލަރު) އިން 15,000 ޔެން އަށް ވަނީ ބޮޑުކޮށްފަ އެވެ. އަދި އެކި ފަހަރު މަތިން އެތެރެވުމަށް ދޫކުރާ "މަލްޓިޕަލް އެންޓްރީ" ވިސާގެ ފީ 6,000 ޔެން އިން 30,000 ޔެން އަށް ވަނީ ބޮޑުކޮށްފަ އެވެ.
މިއީ 1978 ވަނަ އަހަރަށް ފަހު ވިސާގެ ފީއަށް ބަދަލެއް ގެނައި ފުރަތަމަ ފަހަރު ކަމަށްވާއިރު، މި ބަދަލު ގެނައީ އިންފްލޭޝަނަށް އައި ބަދަލުތަކާއި ބޭރު ފައިސާގެ މާރުކޭޓަށް އަންނަ ލޮޅުންތަކާ ގުޅިގެން ކަމަށް ޖަޕާނުގެ ފޮރިން މިނިސްޓަރު ތޮޝިމިޓްސޫ މޮޓެގީ ހުކުރު ދުވަހު ނޫސްވެރިންނަށް ވިދާޅުވި އެވެ.
މީގެ އިތުރުން މިނިސްޓަރު ވިދާޅުވީ، ވިސާގެ އަގަށް ގެނައި މި ބަދަލުގެ ސަބަބުން އެ ގައުމަށް ޒިޔާރަތްކުރާ ފަތުރުވެރިންގެ އަދަދަށް ވަގުތުން އަސަރެއް ކުރާނެ ކަމަށް ލަފާނުކުރެއްވޭ ކަމަށެވެ.
ޖަޕާނުގެ ފައިސާ ކަމަށްވާ ޔެންގެ އަގު 2021 ވަނަ އަހަރުން ފެށިގެން މެދުނުކެނޑި ދަށަށް ދަމުންދާއިރު، މިހާރު ޔެންގެ އަގު ހުރީ ފާއިތުވި 40 އަހަރުގެ ތެރޭގައި ވެސް ނުވެއްޓޭހާ ދަށް މިންވަރެއްގަ އެވެ.
ޔެންގެ އަގު ދަށްވުމާއި ކޮވިޑް-19 ގެ ބަލިމަޑުކަމަށްފަހު ދަތުރުފަތުރު ކުރުން އިތުރުވުމާ ގުޅިގެން، ޖަޕާނަށް ޒިޔާރަތްކުރާ ފަތުރުވެރިންގެ އަދަދު ވަނީ ވަރަށް ބޮޑަށް އިތުރުވެފަ އެވެ. އެގޮތުން މިދިޔަ އަހަރު އެކަނިވެސް ރެކޯޑް އަދަދަކަށް، 42.7 މިލިއަން ބޭރުގެ ފަތުރުވެރިން އެ ގައުމަށް ޒިޔާރަތްކޮށްފައިވެ އެވެ.
