ލޯކަލް ކައުންސިލްތަކުން ތައްޔާރު ކުރާ ތަރައްގީގެ ޕްލޭނާއި ބިން ބޭނުން ކުރާނެ ގޮތުގެ ޕްލޭން ނުވަތަ ލޭންޑް ޔޫޒް ޕްލޭން ހެދުމަށް އޮތް ދަތިތައް، ޕްލޭނިން މިނިސްޓަރު މުހައްމަދު އަސްލަމް ހުށަހެޅުއްވި ޑްރޯންގެ އެހީގައި ފިލުވައި، އެ ޕްލޭންތައް ފާސްކޮށްދޭން ފަށައިފި އެވެ.
ގާނޫނުގައި ބަޔާންކުރާ ގޮތުން، އެ ޕްލޭންތަކަކީ ވަށާޖެހޭ ގޮތަށް ފަންނީ ގިނަ މައުލޫމާތުތަކެއް ހިމަނަންޖެހޭ ކަރުދާހެކެވެ.
ރަށުގެ މެޕް ކުރެހުމާއި, ގަހާއި ރުކުގެ އަދަދުގެ އިތުރުން ރަށެއްގައި ބިން ހިއްކެން އޮތް ސަރަހައްދު ފަދަ ފަންނީ ގިނަ މައުލޫމާތުތަކެއް ހިމަނަން ލާޒިމުކޮށްފައިވާއިރު، އެކަމުގެ ފަންނީ ގާބިލުކަމެއް ނެތި އެ ކަން އޮތީ ދިގުލައިގެން ގޮސްފަ އެވެ.
އެއާއެކު، ރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނު މިހާރު އޮންނަ ގޮތުން ރަށު ކައުންސިލްތަކުން ހަދަން ޖެހޭ ޕްލޭންތައް ފާސްނުވެ، އެކަން ވެފައި އޮތީ މުޅި ލާމަރުކަޒީ ނިޒާމަށް ކުރި ތަސައްވުރަށް ބޮޑު ހުރަހަކަށެވެ.
އެއާއެކު ލޭންޑް ޔޫސް ޕްލޭންތަކަށް ހުރަސްނޭޅޭ ގޮތަށް ގާނޫނު އިސްލާހުކުރަން ވެސް މަސައްކަތް ކުރި އެވެ.
ނަމަވެސް، މިދިޔަ މެއި މަހުގެ ތެރޭގައި އއ. އުކުޅަހުގައި ބޭއްވި "ވިއަވަތި ރާއްޖެ" ކޮންފަރެންސްގެ ތެރެއިން ޕްލޭނިން މިނިސްޓަރު ވަނީ މަދުވާ މައުލޫމާތު ހޯދޭނެ ގޮތެއް ކިޔައިދެއްވައިފަ އެވެ.
އެއީ، މިނިސްޓަރު އެ ދުވަހު ވިދާޅުވި ގޮތުންނަމަ، ޑްރޯން އެހީގައި ރަށްރަށުގައި މަތިން ފެންވަރު ރަނގަޅު ފޮޓޯތައް ނަގައި، ފޮޓޯއަށް ބަލައިގެން ރުއްގަހާއި ހިއްކޭނެ ސަރަހައްދުގެ ހިސާބު ޖެހޭނެ އެވެ. އެހާ ގިނަ ދުވަހު މި މައްސަލަ ހައްލުނުވެގެން އުޅުނުއިރު، އެ ހިޔާލު ނުދެއްވީ ކީއްވެތޯ ސުވާލުކޮށް، އަސްލަމަށް ބައެއް ކައުންސިލަރުންގެ ފާޑުކިޔުންތައް އަމާޒުވި އެވެ.
އޭގެ ފަހުން، ޕްލޭނިން މިނިސްޓްރީން މިހާރު ވަނީ ޕްލޭންތަކަށް މަދުވި މައުލޫމާތު، ޑްރޯން ފޮޓޯގެ އެހީގައި ހިސާބުކޮށް، ހިމަނާނެ ގޮތުގެ ކަރުދާހެއް ކައުންސިލުތަކާ ހިއްސާކޮށްފަ އެވެ.
އެގޮތުން, ފޮޓޯއަށް ބަލައިގެން ރުއްތައް ގުނައި, އެކަތިގަނޑަށް ހުންނަ ގަސްތައް, އެއީ ގަސްތަކެއްގެ ގޮތުގައި ޕްލޭންގައި ލިޔެ, އެކަން ފަސޭހަކަމާއެކު ކުރެވޭނެ ގޮތް އެ ކަރުދާހުގައި ލިޔެފައިވެ އެވެ.
ޕްލޭނިން މިނިސްޓްރީގެ ކަރުދާހުގައި ހިމަނާފައިވާ ގަސްރުއް ހިސާބުކުރާނެ ގޮތް
އަދި ރަށްރަށުގެ ބިމުގެ އަގު ކަނޑައެޅުމާއި ހިއްކާ ބިންތަކުގައި ރުއްގަސް ހުންނަންޖެހޭ މިންވަރު ހިސާބުކުރާނެ ފަސޭހަ ގޮތްތައް ވެސް ވަނީ ހިމަނައިފަ އެވެ.
އެކަމާ ގުޅިގެން "އަދަދު" އިން ކުރި ސުވާލަކަށް ޖަވާބު ދެއްވަމުން، ކައުންސިލްތަކުގެ ބެލެނިވެރި ފަރާތްކަމަށްވާ ލޯކަލް ގަވަމަންޓް އޮތޯރިޓީ (އެލްޖީއޭ)ގެ ސީއީއޯ އަފްޝަން ލަތީފް ވިދާޅުވީ، ޕްލޭނިން މިނިސްޓްރީން ހިއްސާކުރި ކަރުދާހުގެ އެހީގައި، މައުލޫމާތުތައް ފުރިހަމަކޮށް ހުށަހެޅުމުން ޕްލޭންތައް ފާސްވަމުން އެބަދާ ކަމަށެވެ.
"މިނިސްޓްރީން ޔަގީންކަން ދެއްވާ، އެކަން ވަރަށް ހަލުއިކަމާއެކު ކޮށް ނިންމާލެވޭނެ ކަމަށް،" އަފްޝަން ވިދާޅުވި އެވެ.
އޭނާ ވިދާޅުވި ގޮތުގައި، އެންމެ ފަހުން ލިބިފައިވާ މައުލޫމާތަށް ބަލާއިރު، މިނިސްޓްރީން މިހާތަނަށް ވަނީ 19 ރަށެއްގެ ލޭންޑް ޔޫސް ޕްލޭން ފާސްކޮށްދީފަ އެވެ.
