އިލްމީ ދިރާސާއާ ނުލާ ގައުމުގެ ތަރައްގީއަށް ކުރާ މަސައްކަތުގެ ނަތީޖާ ނުނެރެވުން ގާތް ކަމަށް ނައިބު ރައީސް ފައިސަލް ނަސީމް މިއަދު ވިދާޅުވެއްޖެ އެވެ.
ގައުމީ ތަރައްގީގައި ދިރާސާތައް އަދާކުރާ ދައުރުގެ މައްޗަށް އަލިއަޅުއްވާލައްވާ، ނައިބު ރައީސް ވަނީ މިއަދު ހެނދުނު އެމްއެންޔޫގައި ބޭއްވި ތެވެލި އިންޓަނޭޝަނަލް ކޮންފަރެންސް އިފްތިތާހު ކުރުމުގެ ރަސްމިއްޔާތުގައި ވާހަކަދައްކަވާފަ އެވެ. ތެވެލި ކޮންފަރެންސްގެ ޝިއާރަކީ ވެސް 'ގައުމު ބިނާ ކުރުމުގައި ދިރާސާ ކުރުން'، މިއެވެ.
"ދިރާސާއަކާ ނުލައި ތަރައްގީއަށް ކުރެވޭ މަސައްކަތަކުން ނަތީޖާ ނުނެރެވުން ގާތް. ގައުމެއް ބިނާކުރުމުގައި، ކުރެވޭ މަސައްކަތްތަކުގެ މައިގަނޑު އަސާސަކީ ވެސް، އިލްމީ ދިރާސާތައް. ޒަމާނީ އާ ހޯދުންތަކާއި އީޖާދުތަކަށް މުޖުތަމައު ވާސިލްކޮށްދެނީ ދިރާސާތަކުން،" ތެވެލި ކޮންފަރެންސް އިފްތިތަހުކޮށްދެއްވާ ވާހަކަދައްކަވަމުން ފައިސަލް ވިދާޅުވި އެވެ.
އެމަނިކުފާނު ވިދާޅުވީ، ދުނިޔޭގެ ހުރިހާ ގައުމެއްގެ ސަރުކާރުތަކުން ވެސް ސިޔާސަތުތައް ހަރުދަނާކޮށް ކުރިއެރުވުމަށް، ދިރާސާތަކުގެ އަޑުތައް އައްސަވާނެ ކަމުގައި އުއްމީދު ކުރައްވާ ކަމަށެވެ. އަދި ތެވެލި ކޮންފަރެންސްގައި ކުރެވޭ މަޝްވަރާތަކާއި ބަދަލުކުރެވޭ ތަޖުރިބާތަކުގެ ސަބަބުން، ރާއްޖޭގެ ތަރައްގީއަށާއި ދިވެހިންގެ ދިރިއުޅުމުގެ ފެންވަރުމަތިކުރުމަށް ބޭނުންވާ އީޖާދީ ހައްލުތައް ލިބޭނެ ކަމަށް އުއްމީދު ކުރައްވާކަމުގައި ވެސް ފައިސަލް ވިދާޅުވިއެވެ.
އެމްއެންޔޫގެ ރިސާޗް ޑިވެލޮޕްމެންޓް އޮފީހުން އިންތިޒާމްކޮށްގެން މި ކޮންފަރެންސް ބާއްވަމުން އަންނަތާ މިއީ ފަސް ވަނަ އަހަރެވެ. މި އަހަރުގެ ކޮންފަރެސްއަށް އެކި ދާއިރާތަކުން ގިނަ އަދަދެއްގެ ޝައުގުވެރި ދިރާސާ ކަރުދާސްތަކެއް ހުށަހަޅާފައިވެ އެވެ. ދާއިރާތަކުގެ ތެރޭގައި، އެޑިއުކޭޝަން، ކަލްޗާ، ހިސްޓްރީ، ކޮންސްޓްރަކްޝަން، ޖާނަލިޒަމް، ޖެންޑާ އެންޑް ހިއުމަން ރައިޓްސް ފަދަ ދާއިރާތައް ހިމެނެ އެވެ. އަދި ދީނީ އަދި އިސްލާމީ ފިގުހާ ގުޅޭ އެކި މައުލޫތައް ވެސް ހިމެނެ އެވެ.
މަހާސިންތާ ކުރިއަށްދާނީ މިއަދާއި މާދަމާ އެވެ. މި ދެ ދުވަހު، މައިގަނޑު ގޮތެއްގައި ކުރިއަށްދާނީ، ހުށަހަޅާފައިވާ ދިރާސާ ޕޭޕަރުތަކާ ބެހޭ ގޮތުން ފުޅާކޮށް މަޝްވަރާކުރުމާއި އިލްމީ އެކި ނަޒަރިއްޔާތަކުން ހިޔާލު ހޯދުމެވެ.
