އައްޑޫ ލިންކް ރޯޑް އަލުން ހެދުމުގެ މަސައްކަތް ރޯޑް ޑިވެލޮޕްމަންޓް ކޯޕަރޭޝަނުން އަތުލުމަށްފަހު އެ މަސައްކަތް ޗައިނާ ކުންފުންޏަކާ މިއަދު ހަވާލުކޮށްފި އެވެ.
އެ މަސައްކަތް މިއަދު ހަވާލު ކުރީ ރޯޓައިމް އިންޖިނިއަރިން އެންޑް ޓެކްނޮލޮޖީ ކޯ ލިމިޓެޑްއާ އެވެ. އެއީ ހުޅުމާލޭގެ މަގުތައް ހަދަން ވެސް ހަވާލުކޮށްފައިވާ ކުންފުންޏެވެ. އަދި ހުޅުމާލޭގައި ވެއާހައުސްތަކެއް ހެދުމުގެ މަސައްކަތް ވެސް ހަވާލު ކުރީ އެކުންފުންޏަށެވެ.
އައްޑޫ ލިންކް ރޯޑް ހެދުމުގެ އެއްބަސްވުމުގައި މިނިސްޓްރީގެ ފަރާތުން ސޮއިކުރެއްވީ މިނިސްޓަރު އަބްދުﷲ މުއްތަލިބެވެ. އަދި ރޯޓައިމްގެ ފަރާތުން ސޮއިކުރެއްވީ މެނޭޖިން ޑިރެކްޓަރު ޒޫ ވެއިޑޮންގް އެވެ.
އެ މަސައްކަތް ޗައިނާ ކުންފުންޏާ ހަވާލު ކުރި އަގެއް ސަރުކާރުން ހާމައެއް ނުކުރެ އެވެ.
އައްޑޫ ލިންކް ރޯޑް ހެދުމުގެ މަސައްކަތް އާރްޑީސީއާ ހަވާލު ކުރީ އޭޕްރީލް 8، 2025، ގަ އެވެ. އެ މަސައްކަތް ހަވާލު ކުރީ 829,792,313.63 ރުފިޔާއަށް 1440 ދުވަހުން ނިންމާ ގޮތަށެވެ.
މަގު ހެދުމުގެ މަސައްކަތް އާރްޑީސީ އަތުން އަތުލަން ނިންމިއިރު އާރްޑީސީ އުވާލުން ސަރުކާރުން ވަނީ މި ހިނގާ ސެޕްޓެމްބަރު މަހުގައި ނިންމައިފަ އެވެ. އާރްޑީސީ އުވާލައި އެތަން އެއްކޮށްލަނީ އެމްޓީސީސީއާ އެވެ.
