އެއް ފަހަރު ބޭނުންކޮށްފައި އުކާލާ (ސިންގަލް ޔޫސް) ޕްލާސްޓިކުގެ ބާވަތްތައް ބޭނުންކުރުން ހުއްޓުވުމުގެ ގޮތުން 2022 ވަނަ އަހަރުން ފެށިގެން ޕްލާސްޓިކް ހޮޅި ރާއްޖެއަށް އެތެރެކުރުން މަނާކޮށްގެން އެކަށީގެންވާ ހައްލެއް ނުލިބޭ ކަމަށް ތިމާވެއްޓާ ބެހޭ މިނިސްޓަރު އަލީ ޝަރީފް މިއަދު ވިދާޅުވެއްޖެ އެވެ.
ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި އަލީ ޝަރީފް ވިދާޅުވީ ޕްލާސްޓިކް ހޮޅި މަނާކުރުމާ އޭނާ ދެކޮޅު ހަދަނީ ނޫން ކަމަށާއި ބޭނުންވީ ޕްލާސްޓިކް ހޮޅިއަށްވުރެ ރަނގަޅު އެއްޗެއް ހޯދުން ކަމަށެވެ.
"އަޅުގަނޑު ގަބޫލެއް ނުކުރަން މުޅިއަކުންނެއް މީތި ބޭންކޮށްގެނެއް މިކަމަށް އަސްލު އެކަށިގެންވާ ހައްލެއް މީގައި އައިހެނެއް. ބޭނުމަކަށްވީ މީތީގައި އެއަށްވުރެ ރަނގަޅު އަލްޓަނޭޓިވް ޓެކްނޮލޮޖީއެއް ހުރެއްޖެ ކަމަށްވާނަމަ އޭތި ނެރެން އަސްލު އަޅުގަނޑު. މުޅިއަކުން މިކަމަށް ތާއީދުކުރާ ވާހަކައެއް ނޫން މިދައްކަނީއެއް،" މިނިސްޓަރު ވިދާޅުވި އެވެ.
އަލީ ޝަރީފް ވިދާޅުވީ ޕްލާސްޓިކް ހޮޅީގެ ބަދަލުގައި ކަރުދާސް ހޮޅި ބޭނުންކުރަން ފެށިއިރު، އެ ކަރުދާސް ހޮޅިތަކުގެ ފެންވަރު ވެސް ދެނެ ނުގަނެވޭ ކަމަށެވެ. އެގޮތުން އޭގެ ސަބަބުން އެކި މައްސަލަތައް ނުކުތް ކަމަށް މިނިސްޓަރު ވިދާޅުވި އެވެ.
ގާނޫނުތައް އޮންނަ ގޮތުން ރާއްޖެއަށް އިމްޕޯޓުކުރުން މަނާ ސިންގަލް ޔޫސް ޕްލާސްޓިކުގެ ބާވަތްތަކުގެ ލިސްޓު ކަނޑައެޅުމުގެ ބާރު ލިބެނީ ރައީސުލްޖުމްހޫރިއްޔާއަށެވެ. އަދި، 2020 ވަަނަ އަހަރުން ފެށިގެން ކޮންމެ އަހަރެއްގައި އަންނަނީ އެތެރެކުރުން މަނާ ބާވަތްތައް ހިމެނޭ ލިސްޓު ނެރެމުންނެވެ.
އެ ގޮތުން، ޕްލާސްޓިކް ހޮޅިއަކީ އެންމެ ފުރަތަމަ ނެރުނު ގަރާރުގެ ދަށުން ޖޫން 1، 2021 އިން ފެށިގެން އެތެރެކުރުން މަނާކޮށްފައިވާ ބާވަތެކެވެ. އަދި، ޖެހިގެން އައި އަހަރުގެ ޑިސެމްބަރު 19، އިން ފެށިގެން ޕްލާސްޓިކް ހޮޅި އުފެއްދުމާއި ބާޒާރަށް ނެރުން ވަނީ މަނާކޮށްފަ އެވެ.
ނަމަވެސް އިއްޔެ ސަރުކާރުން ނެރުނު ލިސްޓުގައި ވަނީ ޖޫން 1، 2031 ވަން ދެން ޕްލާސްޓިކް ހޮޅި އެތެރެކުރެވޭ ގޮތަށް ހަދާފަ އެވެ. މި ބާވަތުގެ ޕްލާސްޓިކް އުފެއްދުމާއި ބާޒާރަށް ނެރުން އަނެއްކާ ވެސް މަނާ ވަނީ ޑިސެމްބަރު 19، 2031 ގައި އެވެ.
ރާއްޖޭގެ ވެއްޓަށް، ހާއްސަކޮށް ކަނޑުގެ ދިރުންތަކަށް ބޮޑު ގެއްލުމެއް ލިބޭ ޕްލާސްޓިކް މަނާކުަރަން ފެށި މަސައްކަތް އެންމެ ފުރަތަމަ ކަނޑައެޅި ތާރީހުތަކަށް ނިންމި ނަމަ، 12 ބާވަތެއްގެ ސިންގަލް ޔޫސް ޕްލާސްޓިކު ރާއްޖޭގައި އެއްވެސް ގޮތަކަށް ބޭނުންނުކުރާނެ އެވެ. ނަމަވެސް އޭރު ރޭވި ގޮތަށް، އަދި އެކި ފަހަރު މަތިން ތާރީހުތައް ފަސްކުރުމާއެކީ، ކުރިން ޑިސެމްބަރު 2023 އަށް ނިމެން އޮތް ކަމެއް މި ވަނީ 2031 އަށް ފަސްވެފަ އެވެ.
