މިދިޔަ ސަރުކާރުން ފެށި ފުރަތަމަ ޑިގްރީއަށް ކިޔަވައިދިނުމުގެ ސްކީމް (ހިލޭ ޑިގްރީ) ފުރިހަމަކުރި ދަރިވަރުންގެ އަދަދު އެނގޭހެން ސަރުކާރުން މައުލޫމާތު ނުބަލަހައްޓާކަން ޕާފޯމަންސް އޮޑިޓް ރިޕޯޓުން ހާމަވެއްޖެ އެވެ.
އޮޑިޓް ރިޕޯޓުގައި ބުނެފައިވަނީ 2019 އިން 2024 ގެ ނިޔަލަށް ސްކީމުގެ ދަށުން 16،388 ދަރިވަރަކަށް ދައުލަތުން 835.6 މިލިއަން ރުފިޔާ ހަރަދުކޮށްފައިވީ ނަމަވެސް، އޭގެ ތެރެއިން ޕްރޮގްރާމް ފުރިހަމަކޮށް ފުރަަތަމަ ޑިގްރީ ހާސިލުކުރި ދަރިވަރުންގެ އަދަދު އެނގޭނެހެން މައުލޫމާތު ބަލަހައްޓާފައި ނުވާ ކަމަށެވެ.
ސްޖޫނަށް ދަރުވަރުން ހޮވުމަށްފަހު ދަރިވަރުން ކިޔެވުން ފުރިހަމަ ކުރޭތޯ ނުވަތަ ނުކުރޭތޯ ބަލައި، ޕްރޮގްރާމް ފުރިހަމަކުރާ ދަރިވަރުންނާއި ފުރިހަމަނުކުރާ ދަރިވަރުން އަދި ޕްރޮގްރާމް ޑިފާކުރާ ދަރިވަރުންނާއި ނުވަތަ މަރުކަޒު ބަދަލުކުރާ ދަރިވަރުންގެ މައުލޫމާތު ހޯދައި ބެލެހެއްޓުމަށް ކިޔަވައިދޭ މަރުކަޒުތަކާއެކު އެކަށީގެންވާ އިންތިޒާމުތައް ހަމަޖެހިފައި ނުވާކަން ވެސް އޮޑިޓަށް ވަނީ ފާހަގަކުރެވިފަ އެވެ.
މިފަދަ އިންތިޒާމުތައް ހަމަޖެހިފައި ނެތުމުގެ ސަބަބުން ޕްރޮގްރާމް ފުރިހަމަކޮށްފައި ނުވާ ކަމަށް ފާހަގަކުރެވިފައިވާ 790 ދަރިވަރުންނަށް 19 މިލިއަން ރުފިޔާ ހަރަދުކޮށްފައިވާއިރު، އެ ފައިސާ ހޯދަން މަސައްކަތް ކޮށްފައި ނުވާކަން ވެސް އޮޑިޓަށް ފާހަގަކުރެވިފައިވެ އެވެ.
އޮޑިޓުގައި ބުނެފައިވަނީ ސްކީމްގެ ދަށުން ކިޔެވުމަށް އެދި ހުށަހަޅާ ދަރިވަރަކީ ކުރިން ޑިގްރީ ހާސިލުކޮށްފައިވާ ދަރިވަރެއްތޯ ބެލޭނެ މަރުކަޒީ ނިޒާމެއް ގާއިމުކުރެވިފައި ނެތުމުގެ ސަބަބުން ފުރަތަމަ ޑިގްރީ ކިޔަވާ ދަރިވަރުންނަށް ކިޔެވޭނެ އިންތިޒާމު ހަމަޖައްސައިދިނުމުގެ މަގުސަދާ ހިލާފަށް، ކުރިން ޑިގްރީ ހަދާފައިވާ 271 ދަރިވަރަކަށް ސްކީމްގެ ދަށުން ޑިގްރީއަށް ކިޔެވުމަށް 9.3 މިލިއަން ރުފިޔާ ހަރަދުކޮށްފައިވާ ކަމަށެވެ.
މީގެއިތުރުން ސްކީމްގެ މަގުސަދު ހާސިލްވާ މިންވަރު ދެނެގަނެވޭ ކީ ޕާފޯމަންސް އިންޑިކޭޓާ (ކޭޕީއައި) ތަކެއް ކަނޑައަޅައި ބަލަހައްޓާފައި ނުވުމުގެ ސަބަބުން، ދައުލަތުގެ ހަރަދުގައި ފުރަތަމަ ޑިގްރީއަށް ކިޔެވުމުގެ ފުރުސަތު ލިބުމުން ދަރިވަރުންނަށާއި މުޖުތަމައުއަށް ސްކީމްގެ ސަބަބުން ކުރާ ފައިދާ ވަޒަން ކުރެވޭނެ ގޮތެއްވެސް ނެތް ކަމަށް ރިޕޯޓުގަައިވެ އެވެ.
އޮޑިޓް އޮފީހުގެ ރިޕޯޓުގައި ފާހަގަކުރެވުނު ކަންތައްތަކަށް ރިޔާޔަތްކޮށް ކަންކަން އިސްލާހުކުރަން އެޑިއުކޭޝަން މިނިސްޓްރީއަށް ވަނީ އަންގާފަ އެވެ. އޭގެ ތެރޭގައި ޑިގްރީ ހަދާ ދަރިވަރުން ކޯސް ފުރިހަމަކުރޭތޯ ބެލޭނެ ނިޒާމު ގާއިމުކޮށް، ކޯސް ފުރިހަމަނުކޮށް ހުއްޓާލާ ދަރިވަރުންނަށް ހޭދަވި ފައިސާ ހޯދުމުގެ މަސައްކަތް ކުރުން ހިމެނެ އެވެ.
