ބަރުލަމާނީ ނިޒާމެއް ރާއްޖެއަށް ގެންނަން ހުރަހަކަށް ވެއްޖެނަމަ, އެކުގައި ނުހުންނަވާނެ ކަމުގެ އިންޒާރު އެމްޑީޕީގެ ރައީސް މުހައްމަދު ނަޝީދު މިއަދު ދެއްވާފައިވީ ނަމަވެސް, އެކަން އެގޮތަށް ނުވާނެ ކަމުގެ ޔަގީންކަން އެބަ އޮތްކަން ރައީސް އިބްރާހިމް މުހައްމަދު ސޯލިހް ހާމަކުރައްވައިފި އެވެ.
އެމްޑީޕީގެ އެތެރޭގައި، އަންނަ ރިޔާސީ އިންތިހާބާ ގުޅޭ ގޮތުން ގިނަ ހިޔާލު ތަފާތުވުންތައް އެބަ އޮތެވެ. މިހާރު އޮތް ކޯލިޝަންގެ ތެރެއިން ރައީސް އިބްރާހިމް މުހައްމަދު ސޯލިހު ދެވަނަ ދައުރަކަށް ކުރިމަތިލައްވަން ނިންމަވާފައި ވާއިރު, ނަޝީދު ބޭނުން ވަނީ ވެރިކަމުގެ ނިޒާމް ބަރުލަމާނީއަށް ބަދަލުކޮށް ބޮޑުވަޒީރު ކަމަށް ވަޑައިގަންނަވާށެވެ.
އެކަމާ ގުޅޭ ގޮތުން އެމްޑީޕީ ހުރަކަށް ނުވުމަށް އެދި, ނަޝީދު ވަނީ ކޮންގްރެސްއަށް ގަރާރެއް ވެސް ހުށަހަޅުއްވާފަ އެވެ. ނަމަވެސް, އެމްޑީޕީގެ އިސް ލިޑަރު, ރައީސް ސޯލިހު ވަނީ ތާއީދު ކުރައްވަނީ ރިޔާސީ ނިޒާމް ބޭއްވުމަށް ކަމަށް ވިދާޅުވެ, ގަރާރު އަނބުރާ ގެންދެވުމަށް އެދިވަޑައިގެންފަ އެވެ.
ރައީސް ސޯލިހު ވެސް އިންނެވި ކޮންގްރެސްގެ މާލަމުގައި ނަޝީދު މިއަދު ވިދާޅުވީ މިހާރު އެމްޑީޕީ އޮތް ގޮތުން، އަންނަ ރިޔާސީ އިންތިހާބު ކާމިޔާބު ނުކުރެވޭނެ ކަމަށެވެ. އެމްޑީޕީން އެތައް ބަޔަކަށް ރައީސް ސޯލިހަށް ދެވަނަ ދައުރެއް ދޭން ފެނުނު ކަމުގައިވީ ނަމަވެސް, އެއީ ހަމައެކަނި އެމްޑީޕީގެ އުއްމީދު ކަމަށެވެ.
"...ތަކުރާރުކޮށް ދަންނަވާނަން މުޅި ޕާޓީއާއެކު ނުކުމެގެން ނޫން ގޮތަކަށް އަޅުގަނޑަކަށް 2023 ވަނަ އަހަރު ރިޔާސީ އިންތިހާބަށް ތިޔަ ބޭފުޅުންނާ އެއްކަކު ނުނިކުމެވޭނެ, އަޅުގަނޑު ވަރަށް ބޮޑަށް އެދޭ އެދުމަކީ, އާދޭހަކީ އަޅުގަނޑުގެ ހިތުގެ ހާލިސްކަމާއެކު މި ދަންނަވަނީ އަޅުގަނޑުމެންނަށް އެކީގަ އެންމެންނަށް ތިބެވެން އެބަ އޮތް," ނަޝީދު ވިދާޅުވި އެވެ.
ނަޝީދު އެހެން ވިދާޅުވެފައިވަނިކޮށް, މިއަދު ހެނދުނު ކޮންގްރެސް މާލަމުގެ ހަވާސާއިން "އަދަދު"އިން ރައީސް ސޯލިހާ ސުވާލު ކުރުމުން ވިދާޅުވީ ނަޝީދު އަދި ވިސްނަވާނެ ކަމަށެވެ.
"...އެކީގައި ކުރިއަށްދެވޭ ގޮތަކަށް އަޅުގަނޑުމެން ވިސްނަން ވާނީ, އަޅުގަނޑު ހިތުން ޕާޓީން ހޮވޭ ކޮންމެ ކެންޑިޑޭޓަކާ އެކީގައި މުޅި ޕާޓީ އޮންނާނެ،" ރައީސް ސޯލިހު, "އަދަދު"އަށް ވިދާޅުވި އެވެ.
ރައީސް ސޯލިހު ވިދާޅުވީ ނަޝީދު ހުށަހެޅުއްވި ގަރާރާ ގުޅޭ ގޮތުން މަޝްވަރާ ކުރުން މާދަމާ އޮންނާނެ ކަމަށާއި އެމަނިކުފާނު ދެކޭ ގޮތުގައި ކޮންގްރެސްމަނުން އެކަމާ ދޭތެރޭ ވަރަށް ފުންކޮށް ވިސްނާނެ ކަމަށެވެ.
"އަޅުގަނޑު ހިތުން، ނިންމާ ކޮންމެ ނިންމުމަކީ އެއާ އެކީގައި ކުރިއަށްދާން ޖެހޭނެ ނިންމުމެއް ކަމަށް އަޅުގަނޑު ދެކެނީ. އަޅުގަނޑު ދެކެނީ ކޮންގްރެސްމަނުން ނިންމާނީ ޕާޓީ އާއި ގައުމަށް އެންމެ ފައިދާހުރި ނިންމުން ކަމަށް،" ރައީސް ވިދާޅުވި އެވެ.
"އަދަދު"އިން ރައީސަށް ސުވާލު ކުރަނީ - ފޮޓޯ: މުހައްމަދު ޝާބިން / އަދަދު
ނަޝީދު ދައްކަވަނީ 2023 ކާމިޔާބު ނުވާނެ ކަމުގެ ހިސާބު
ނަޝީދު, މިއަދު ހެނދުނު ދެއްކެވީ އެންމެ ފަހުން 2018 ވަނަ ބޭއްވި ރިޔާސީ އިންތިހާބުގެ ނަތީޖާއިން ފެންނަ މަންޒަރުގެ ހިސާބެވެ;
އެ އިންތިހާބުގައި 233,000 މީހުން ވޯޓު ދިނެވެ. އޭގެ ތެރޭން 42 ޕަސެންޓް މީހުން ވޯޓުލީ, ޕީޕީއެމްގެ ކެންޑިޑޭޓް, ރައީސް އަބްދުالله ޔާމީނަށެވެ. އެމްޑީޕީގެ ކެންޑިޑޭޓް, ރައީސް ސޯލިހަށް ލިބުނީ 135,000 ވޯޓެވެ. އޭގައި ޖުމްހޫރީ ޕާޓީ އާއި އެމްއާރްއެމް އަދި އަދާލަތުގެ ބައިވެރިވުން އޮތެވެ.
ނަޝީދު ޖެއްސެވި ހިސާބުން ރައީސް ސޯލިހަށް ލިބުނު ވޯޓުގެ 12 ޕަސެންޓަކީ, ޖުމްހޫރީ ޕާޓީން ހޯދި ވޯޓެވެ. އެމްއާރްއެމް އަދި އަދާލަތު ޕާޓީ އެކުވެ ނަގާފައިވަނީ ހަ ޕަސެންޓް ވޯޓެވެ. އެހެންވެ, މި ދެ ބައި އުނިކުރުމުން, އެމްޑީޕީއަށް ލިބުނު ކަމަށް ނަޝީދު ދެކެނީ 112,000 ވޯޓެވެ.
ރައްޔިތުންގެ މަޖިލީހުގެ ރައީސް ވިދާޅުވި ގޮތުގައި, އެމްޑީޕީ ބައިބައި ވެއްޖެނަމަ, އެ ވޯޓެއް ރައީސް ސޯލިހަކަށް ނުހޯދޭނެ އެވެ. މިއަދު މިއޮތް ގޮތަށް ކަންކަން އޮވެއްޖެނަމަ 112,000 ވޯޓުން 40 ޕަސެންޓް ވޯޓު އެމްޑީޕީއަށް ގެއްލި, 2023 އުނދަގޫވާނެ އެވެ.
"...އަޅުގަނޑުމެން ގޮތެއް ހޯދަން އެބަ ޖެހޭ މި ހާލަތުން މި ޕާޓީ އަރައިގަތުމަށް, މި ޕާޓީއަކަށް އަޅުގަނޑު މުހިންމެއް ނޫން އަދި ރައިސުލްޖުމްހޫރިއްޔާ ވެސް މުހިންމެއް ނޫން, އަޅުގަނޑުމެންނަށް މުހިންމީ ރާއްޖޭގެ ރައްޔިތުންނަށް ހެޔޮ ގޮތުގައި ޑިމޮކްރަޓިކް ނިޒާމެއްގައި ވެރިކަން ކޮށްދެވި ރަނގަޅު ގޮތްތައް ހޯދުން," ނަޝީދު ވިދާޅުވި އެވެ.
ނަޝީދުގެ ގަރާރު
ރާއްޖޭގެ ވެރިކަން ކުރާ ނިޒާމް ބަރުލަމާނީ ނިޒާމަށް ބަދަލުކޮށް, ރިޔާސީ އިންތިހާބެއްގައި ދެވަނަ ބުރެއްގެ ވޯޓަކަށް ނުގޮސް އިންތިހާބު ކާމިޔާބު ކުރެވޭނެ މަގެއް ކަނޑައަޅެމަށް ފެންނަ ނުފެންނަ ވޯޓެއް ނެގުމަށް އެމްޑީޕީ ކޮންގްރެސްއަށް ނަޝީދު ހުށަހަޅުއްވާފައިވަނީ އެމްޑީޕީގެ ނައިބު ރައީސް މުހައްމަދު ޝިފާޒްގެ ތާއީދާއެކު އެވެ.
ޕާޓީގެ ރައީސް ނަޝީދު ހުށަހެޅުއްވި ގަރާރުގައި ވަނީ ގާނޫނުއަސާސީއަށް ގެންނަން ބޭނުންވާ ބަދަލުތައް ފާހަގަކޮށްފަ އެވެ. އެގޮތުން، ސަރުކާރުގެ އެންމެ އިސްވެރިއަކީ މަޖިލީހުގެ ތެރެއިން އިންތިހާބުކުރާ ބޮޑުވަޒީރު ކަމަށާއި ދައުލަތުގެ އެންމެ އިސްވެރިއެއްގެ ގޮތުގައި ހުންނާނީ ރައްޔިތުންގެ މެދުގައި ނަގާ ރިޔާސީ ވޯޓަކުން ހޮވޭ މީހެއް ކަމަށް ވަނީ ފާހަގަކޮށްފަ އެވެ.
އަދި، ބޮޑުވަޒީރާއި ރައީސްގެ ބާރުތައް ކަނޑައެޅުމަށާއި މަޖިލީހުގެ ދާއިރާތައް ތަމްސީލުވާނެ ގޮތްތަކާއި މަޖިލިސް އިންތިހާބުގައި ސިޔާސީ ޕާޓީތަކުން ހޯދާ ވޯޓުގެ ނިސްބަތަށް ބަލައި، ހާއްސަ ކުރެވޭ "ނެޝަނަލިސްޓު ލިސްޓު"ގެ މެންބަރުން ހިމެނޭ އުސޫލު ކަނޑައެޅުމަށް ވެސް ހުށަހަޅައިފަ އެވެ.
މީގެ އިތުރުން ވަޒީރުންގެ މަޖިލިސް ކަނޑައަޅާނީ މަޖިލިސް މެންބަރުންގެ ތެރެއިން ކަމަށާއި ސުޕްރީމް ކޯޓަށް ފަސް ފަނޑިޔާރުން އައްޔަން ކުރުމުގެ އިތުރުން ޖުޑީޝަލް ސާވިސް ކޮމިޝަން (ޖޭއެސްސީ) އެކުލަވާލެވިފައިވާ ގޮތް ބަދަލުކުރުމުގެ އިސްލާހު ވެސް ގެނައުމަށް ގަރާރުގައި ހިމަނާފައިވެ އެވެ.
