އެއްފަޅެއްގައި ޖެހިގެން އޮތް ފަޅުރަށް ހިމާޔަތް ނުކުރަން ރަށެއްގެ ރައްޔިތުން އެދުމަކީ އާދައިގެ ކަމެއް ނޫނެނެވެ. އާއްމު އުސޫލަކީ އެހެން ހުރި ރަށްތައް ހިމާޔަތްކުރަން މީހުން އެދުމެވެ. އެކަމަކު އަލިފުށީ ރައްޔިތުން އެދެނީ އެ ރަށުގެ ފަޅު ތެރޭގައި އޮތް ހަމައެކަނި ފަޅުރަށް ކަމަށްވާ އެއްތިނގިލި ހިމާޔަތް ނުކުރާށެވެ.
ސޯޝަލް ސެންޓަރުގައި މިހާރު ކުރިއަށްދާ ކޮންގްރެސްގައި އަލިފުށީ ކައުންސިލްގެ އެމްޑީޕީ މެމްބަރު އިބްރާހީމް ޒަހީން ވިދާޅުވި ގޮތުގައި އެއްތިނގިލި ހިމާޔަތް ނުކުރަން އަލިފުށީ ރައްޔިތުން އެދެނީ އެ ރަށުގައި އުފެދޭ މަދިރީގެ އުނދަގޫ ބޮޑުކަމުންނެވެ.
"އަޅުގަނޑުމެން، އަލިފުށީ ރައްޔިތުން މި ދިރިއުޅެނީ ވަރަށް ހާލެއްގައި އިނގޭތޯ. އެއީ މަދިރީގެ އުނދަގުލުގެ ސަބަބުން. އެއްތިނގިލީގައި އުފެދޭ މަދިރީގެ އުނދަގުލުގެ ސަބަބުން އަޅުގަނޑުމެންގެ ރައްޔިތުން ދަނީ ވަރަށް ދަތިއުނދަގޫތަކެއް ތަހައްމަލުކުރަމުން،" އޭނާ ވިދާޅުވި އެވެ.
ޒަހީނު ވިދާޅުވި ގޮތުގައި އަލިފުށީ ރައްޔިތުން ވަނީ ކަމާ ބެހޭ އިދާރާތަކަށް އެ މައްސަލަ ތަކުރާރުކޮށް އެކި ފަހަރު މަތިން އެ މައްސަލަ ހުށަހަޅައިފަ އެވެެ.
އަލިފުށީ ފަޅުން ބައެއް ހިއްކައިގެން އެއާޕޯޓް އަޅަން އީއައިއޭ ހެދި އިރު ވެސް އަލިފުށިން އެދުނީ އެއްތިނގިއްޔާ އެކު ބިން ހިއްކާށެވެ. އެއީ އެއްތިނގިލީގެ ކަނޑޫފަލަށް ވެސް އޭރުން ވެލި އަޅައި ބައްދަލައިލެވޭނެތީ އެވެ.
އަލިފުށީގެ އިލްތިމާސަށް، އެމްޑީޕީގެ ކޮންގްރެސްގައި މިއަދު ޖަވާބެއް ދެއްވީ އެ ޕާޓީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދެވެ. ރަށްރަށާއި ފަޅުތަކުގެ ތަބީއަތަށް ބަދަލު އަންނަ ފަދަ މަޝްރޫއުތައް ހިންގުމާ ދެކޮޅަށް ވަކާލާތު ކުރައްވާ ނަޝީދުގެ ޖަވާބުގައި އެއްތިނގިއްޔާ ބެހޭ ގޮތުން ވެސް ވާހަކަފުޅު ދެއްކެވީ ހަމަ އެ މޭރުމުންނެވެ.
"ހަގީގަތުގައި ހިމާޔަތްކުރީމާ މަދިރި މަދު ވާނީ. އެކަން ވަރަށް ބޮޑަށް ވިސްނަވަން ޖެހޭނެ،" ނަޝީދު ވިދާޅުވި އެވެ.
އެމަނިކުފާނު ވިދާޅުވި ގޮތުގައި ރާއްޖޭގައި "ގިލި" ކިޔާ ތަންތަނަކީ ވެސް ގުުދުރަތީ ގޮތުން މުޅިން ތަފާތު މާހައުލުތަކަކަށް ވެދާނެ އެވެ. އެކަމަކު އެމަނިކުފާނު ވިދާޅުވި ގޮތުގައި "ގިލި" ކިޔާ ތަންތަނުގެ ހަގީގަތް އަދި އޮތީ ނުވެސް ބެލި އެވެ.
"އަދި އަޅުގަނޑުމެންނަށް މިއުޅެނީ ގިއްޔަކީ ކޮބާކަން ވެސް ނޭނގިގެން،" ނަޝީދު ވިދާޅުވި އެވެ.
ކޮންމެ ރަށަކުން ތަނެއް ހިމާޔަތްކުރަން އެމްޑީޕީގެ މެނިފެސްޓޯގައި ހިމަނާފައި ވަނީ އެމަނިކުފާނު ވިދާޅުވި ގޮތުގައި ސައިންޓިފިކް ދިރާސާތަކަށް ބިނާކޮށްގެންނެވެ. ރަށްރަށާއި ފަޅުފަޅުގެ ހަގީގަތް އެނގޭ ކަމަށް ހީވާ ކަމަށާއި އެހެންވެ އެތަންތަނަށް ގޮތްގޮތް ހަދަން ބޭނުންވާ ކަމަށް ވެސް އެމަނިކުފާނު ވިދާޅުވި އެވެ. އެހެން ނަމަވެސް އެގޮތަށް ގެންނަ ބަދަލުތަކުގެ ސަބަބުން ބޮޑެތި ގެއްލުންވެ، މާހައުލަށް ބަދަލު އަންނަ ކަމުގެ މިސާލެއްގެ ގޮތުގައި އެމަނިކުފާނު ދެއްކެވީ ހއ. ކެލާގެ ގޮނޑުދޮށެވެ.
"ބޮޑުތަކުރުފާނު ވާހަކައިގައި އޮންނާނެ ކެލާގެ ވާހަކަ، އެތަނުގެ ފަޅުގެ ވާހަކަ އެތަނުގެ ގޮނޑޮދޮށުގެ [ރީތިކަމުގެ] ވާހަކަ. މިއަދު އަކިރި އަރައިފި. ކުޅެކުޅެކުޅެ،" ނަޝީދު ވިދާޅުވި އެވެ.
ރަށްރަށުގެ ތަރައްގީއަށް ވިސްނަން ޖެހޭނީ ގުދުރަތީ ނިޒާމުގެ ތެރެއިން ކަމަށާއި އެނޫން ގޮތެއް ނެތް ކަމަށް ވެސް އެމަނިކުފާނު ވިދާޅުވި އެވެ.
