ވެރިކަން ހިންގާ މޯލްޑިވިއަން ޑިމޮކްރެޓިކް ޕާޓީގައި ތަފާތު ހިޔާލަށް އަދި ހިޔާލު ތަފާތުވުމަށް ފުރުސަތު އޮންނާނެ ކަމަށް މިހާރު ކުރިއަށްދާ އެ ޕާޓީގެ ހަތަރު ވަނަ ކޮންގްރެސް ފެށުމުގެ ޖަލްސާގައި ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވެއްޖެ އެވެ.
އެމްޑީޕީގެ ކޮންގްރެސްގައި ވާހަކަ ދައްކަވަމުން ރައީސް ވިދާޅުވީ ހިޔާލުތަފާތުވުން އޮއްވައި، އެންމެނަށް ހުރިހާ ކަމެއްގައި އެއްބަސްނުވެވޭނެ ކަމަށެވެ. އެހެންކަމުން އޮތް "ހަމައެކަނި ގޮތަކީ، ހިޔާލު ތަފާތުވުންތަކާ، ތަފާތު ހިޔާލުތަކާއެކުގާ ކުރިޔަށް ދިޔުން" ކަމަށް ރައީސް ސޯލިހު ވިދާޅުވި އެވެ.
"އެމްޑީޕީގާ ހިޔާލު ތަފާތުވުންތަކަށް ޖާގަ އޮންނާނެ. އަދި ތަފާތު ހިޔާލުތަކަށްވެސް ޖާގަ އޮންނާނެ. ބައެއް ކަންތައް ތަކަކީ އެންމެންނަށް އެއްބަސްވެވޭ ކަންތައްތައް. ނެއްބައި ކަންތައްތަކަކީ، އެއްބަސް ނުވެވޭ ކަންތައް ތަކަށް ވެދާނެ. ނަމަވެސް އޮތް ހަމައެކަނި ގޮތަކީ، ހިޔާލު ތަފާތުވުންތަކާ، ތަފާތު ހިޔާލުތަކާއެކުގާ ކުރިޔަށް ދިޔުން. ދިވެހިރާއްޖެއާ ދިވެހީންނަށް އުފާވެރި މާދަމާއެއް ގެނެސްދިނުމަށް އަޅުގަނޑުމެން އެކުވެގެން ދިއްލި، މިދަންމަރުގެ އުޖާލާކަން އެންމެ ހިނދުކޮޅަކަށްވެސް ފަނޑުވެ، ނިވުނަ ދީގެން ނުވާނެ،" ރައީސް ވިދާޅުވި އެވެ.
އެމްޑީޕީގެ ކޮންގްރެސް މިރޭ މި ފެށީ ރާއްޖޭގެ ވެރިކަން ހިންގާ ނިޒާމު އެ ޕާޓީގެ ތެރެއިން ބަދަލު ކުރުމަށް ރައްޔިތުންގެ މަޖިލީހުގެ ރައީސް ކޮންގްރެސްއަށް ގަރާރެއް ހުށަހަޅުއްވާފައި އޮއްވަ އެވެ. ރައީސް ސޯލިހާއި އެމަނިކުފާނުގެ ކެބިނެޓު މެމްބަރުން އެ ގަރާރެއް ތާއީދު ނުކުރައްވާކަން ވަނީ ކުރިން ހާމަ ކުރައްވައިފަ އެވެ.
އޭގެ އިތުރުން މިރޭ ވާހަކަ ދައްކަވަމުން ރައީސް ސޯލިހު ވިދާޅުވީ އެމްޑީޕީއަކީ އެކި ދާއިރާއަށް ނިސްބަތްވާ އާންމު ރައްޔިތުން އުފެއްދި ޕާޓީއެއް ކަމަށާއި އެއީ ޕާޓީގެ ފަހުރެއް ކަމަށެވެ.
"ރެސޯޓެއްގެ ރެސްޓޯރެންޓްގާ ހުންނަ، ވޭޓަރު ދެކެނީ މި ޕާޓީ އުފެއްދުމުގާ އޭނާގެ ދައުރު ނުހަނު ބޮޑުކަމުގަ. ކަސްޓަމްސް ކައިރިން އެތާތިބޭ މަޖޫރީން ދައްކަނީ އެމްޑީޕީ އުފެއްދުމުގާ އެމީހުން ވީ ގުރުބާނީގެ ވާހަކަ. ބާޒާރުމަތިން ވިޔަފާރިވެރިން ވެސް އެމީހުންގެ ވިޔަފާރި ނުރައްކަލަށް ހުށަހަޅާ އަދާކުރި ދައުރުގެ ވާހަކަ ފަހުރުވެރިކަމާއެކު ދައްކާ. މަސްވެރިންނާ ދަނޑުވެރިން. މިއުޒިޝަނުންނާ އާރޓިސްޓުންނާ ނޫސްވެރިން. ޓެކްސީ ޑްރައިވަރުންނާ އޮޑިދޯނި ފަހަރުގެ ފަޅުވެރިންނާ ނެވިން،" ރައީސް ވިދާޅުވި އެވެ.
ރައީސް ވިދާޅުވި ގޮތުގައި އެއްވެސް ހިފެހެއްޓުމެއް ހުރަހެއް ސުމާރެއް ނެތި އެމީހަކަށް ފެންނަ ގޮތަކަށް، ހިތަށް އެރި ވާހަކައެއް ލިޔެ ބުނެ ފާޅު ކުރުމުގެ މިނިވަންކަން ރާއްޖޭގާ މިހާރު އެބަ އޮތެވެ.
"މިކަމާ އެއްކޮޅު ބޭފުޅުން އަދި ކީއްކުރަންތޯ؟ ދެކޮޅު ހެއްދެވި ބޭފުޅުންވެސް މިހައްގުގެ ބޭނުން ކުރައްވާ މިންވަރުގާ އަމުދުން މިހާރު ހައްދެއް ނެތް," ރައީސް ވިދާޅުވި އެވެ.
އެމްޑީޕީގެ ކޮންގްރެސްގައި 1100 އަށް ވުރެ ގިނަ މެމްބަރުން ބައިވެރިވެ އެވެ. މިރޭ ހަމަ އޮންނަނީި ކޮންގްރެސް ފެށުމުގެ ޖަލްސާ އެވެ. މާދަމާ އޮންނާނީ މަޝްވަރާތަކާއި ބައްދަަލުވުންތަކާއި ބައެއް ޕްރެޒެންޓޭޝަންތަކެވެ. މުހިންމު ކަންކަމަށް ވޯޓަށް އެހުން އޮންނާނީ އަންނަ އާދީއްތަ ދުވަހެވެ.
