އޮސްޓްރޭލިއާގެ ކުރީގެ ބޮޑު ވަޒީރު ސްކޮޓް މޮރިސަން ސިއްރުން ފަސް މިނިސްޓްރީއެއް ހިންގެވިކަން ފަޅާއަރައި ޕްރެޝަރާ ކުރިމަތިވި ނަމަވެސް ގާނޫނު ހަދާ މަޖިލީހުން އިސްތިއުފާ ދެއްވަން ދެކޮޅު ހައްދަވަމުން އެބަގެންދަވަ އެވެ.
ބޮޑު ވަޒީރުކަމުގައި ހުންނެވި އިރު ފަސް މިނިސްޓްރީއެއް ހިންގެވުމުގައި މޮރިސަން އުޅުއްވީ ކޮވިޑް ބަލިމަޑުކަމުގެ ތެރޭގަ އެވެ. އެކަން ދިފާއު ކުރައްވައި މޮރިސަން ވިދާޅުވީ "އެއީ އާދަޔާ ހިލާފު ހާލަތެއް ދިމާވެ ކޮންމެހެން އަޅަން ޖެހުނު ފިޔަވަޅެއް" ކަމަށެވެ.
މޮރިސަންއަކީ ނިއު ސައުތު ވޭލްސްގެ ކުކް ތަމްސީލް ކުރައްވާ މަޖިލިސް މެމްބަރެވެ. ސިއްރުން މިނިސްޓްރީތައް ހިންގެވިކަަން ފަޅާއެރުމުން އާއްމުންނާއި ކުރިން ސަަރުކާރުގައި އިސް މަގާމުތައް ފުރުއްވި ފަރާތްތަކުން އަަންނަނީ ނުރުހުން ފާޅުކުރަމުންނެވެ.
އޮސްޓްރޭލިއާގެ ނޫސްތަކުން ބުނީ މާޗް 2020 އިން ފެށިގެން ހެލްތު މިނިސްޓްރީ ހިންގެވުމުގަައި މޮރިސަން އުޅުއްވި ކަމަށާއި މޭ 2021 އިން ފެށިގެން ފިނޭންސް، ޓްރެޝަރީ، ހޯމް އެފެއާޒް އަދި ރިސޯސާސް މިނިސްޓްރީއާ ހަވާލުވެވަޑައިގެންނެވި ކަމަށެވެ.
މޮރިސަންގެ އެ މައްސަލަ ތަހުގީގު ކުރަން ފަށާފައިވާ ކަމަށް މި ހަފުތާގައި އާ ބޮޑު ވަޒީރު އެންތަނީ އަލްބަނީޒް ވިދާޅުވި އެވެ. އަލްބަނީޒް ވިދާޅުވީ އެކަމުގައި ގާނޫނީ ލަފާ ހޯއްދަވާނެ ކަމަށާއި އެއީ ބަލައިގަނެވޭނެ ނިންމުމެއް ނޫން ކަމަށެވެ.
