ބަރުލަމާނީ ނިޒާމަކަށް ރާއްޖޭގެ ވެރިކަން ކުރުމުގެ ނިޒާމު ބަދަލު ކުރުމަށް އަންނަ ހުކުރު ދުވަހު ފަށާ އެމްޑީޕީގެ ކޮންގްރެސްއަށް ގަރާރެއް ހުށަހަޅާފައިވަނިކޮށް، ތާއިދު ކުރައްވަނީ ރިޔާސީ ނިޒާމަކަށް ކަމަށް ޖުޑީޝިއަލް ސާވިސް ކޮމިޝަން (ޖޭއެސްސީ) ގެ ރައީސް އަދި ރައްޔިތުންގެ މަޖިލީހުގެ ތުޅާދޫ ދާއިރާގެ މެމްބަރު ހިސާން ހުސައިން ހާމަކުރައްވައިފި އެވެ.
ބަރުލަމާނީ ނިޒާމު ގެނައުމުގެ ގަރާރު އެމްޑީޕީގެ ކޮންގްރެސްއަށް ހުށަހަޅުއްވަނީ އެ ޕާޓީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދެވެ. ހިސާން އަކީ ރައީސް ނަޝީދުގެ ވަކީލެއްގެ ގޮތުގައި ވެސް މަސައްކަތް ކުރެއްވި އެމަނިކުފާނާ ގާތް ބޭފުޅެކެވެ.
މިއަދު ކުރެއްވި ޓްވީޓެއްގައި ހިސާން ވިދާޅުވީ އިގްތިސާދަށް އެކި އަސަރުތައް ކުރަމުންދާ ދަނޑިވަޅެއްގައި ކަންކަން ކުރިއަށްގެންދާއިރު ހަމަޖެހުމާއި ތަރައްގީއަށް ވިސްނަން ޖެހޭ ކަމަށެވެ.
"މިފަދަ ދަނޑިވަޅެއްގައި، [ރާއްޖެ ފަދަ] ތަރައްގީވަމުން އަންނަ ގައުމަކަށް، ސިޔާސީ ހަމަޖެހުމާއި، ރައްޔިތުން ބޭނުންވާ ތަރައްގީ ގެނެވޭނީ ހަމައެކަނި ރިޔާސީ ނިޒާމަކުން،" ހިސާންގެ ޓްވީޓުގައި ވިދާޅުވި އެވެ.
މީގެ ކުރިން ވެސް ރައްޔިތުންގެ މެދުގައި ނިޒާމު ކަނޑައެޅުމަށް ބޭއްވި ފެންނަ ނުފެންނަ ވޯޓުގައި ނަޝީދާއި އެމްޑީޕީން ތާއީދު ކުރީ ބަރުލަމާނީ ނިޒާމަށެވެ. އޭރު ކުރީގެ ރައީސް އަބްދުﷲ ޔާމީނާއި އެމަނިކުފާނުގެ ޕީއޭ އިން ވެސް ތާއީދު ކުރީ ބަރުލަމާނީ ނިޒާމަކަށެވެ.
ނަމަވެސް, މިހާރު އެމްޑީޕީގެ ތެރޭގައި ރިޔާސީ ނިޒާމާއެކު ކުރިއަށް ދާން ބޭނުންވާ މީހުން ވެސް ގިނަ އެވެ. އެމްޑީޕީގެ އިސް ލީޑަރު އަދި ރައީސް އިބްރާހީމް މުހައްމަދު ސޯލިހް ވެސް ވަނީ ނަޝީދުގެ ގަރާރު އަނބުރާ ގެންދެވުމަށް އެދިވަޑައިގެންފަ އެވެ.
ރައީސް ސޯލިހުގެ ކެބިނެޓުގައި ތިއްބެވި ބޭފުޅުންނާއި އެމަނިކުފާނުގެ އަރިސް މެމްބަރުން ގެންދަވަނީ ރިޔާސީ ނިޒާމަށް ތާއިދު އޮތްކަން ހާމަކުރައްވަމުންނެވެ.
ނަޝީދު ފިޔަވައި އިތުރު ސިޔާސީ ލީޑަރަކު މި ވަގުތަށް ބަރުލަމާނީ ނިޒާމު ގެންނަން ތާއީދެއް ނުކުރައްވަ އެވެ. ކުރިން ބަރުލަމާނީ ނިޒާމަށް ތާއީދު ކުރެއްވި ޔާމީން ވެސް ވިދާޅުވަނީ މި ވަގުތަށް އެ ނިޒާމު ރާއްޖެއަށް "ފިޓު" ނޫން ކަމަށެވެ.
