ބްރިޖު މަސައްކަތް ކުރާ ޕްލެޓްފޯމެއް ވިލިމާލެ ފަރަށް އެރީ އެންކަރަށް ދިމާވި ޓެކްނިކަލް މައްސަލައަކާ ގުޅިގެން ކަމަށް ޕްލޭނިން މިނިސްޓްރީން މިއަދު ބުނެފި އެވެ.
އިއްޔެ މެންދުރު ހިނގި މި ހާދިސާއާ ގުޅިގެން ފުލުހުން ބުނީ މި ހާދިސާގައި ބްރިޖު މަސައްކަތްކުރާ ޕްލެޓްފޯމެއް ވިލިމާލޭ ފަރަށް އަރައިގެން ތިން މީހަކަށް އަނިޔާވެފައިވާ ކަމަށާއި، އަނިޔާވި މީހުން ވިލިމާލެ ހޮސްޕިޓަލަށް ގެންގޮސްފައިވާ ކަމަށެވެ.
މައުލޫމާތު ލިބިފައިވާ ގޮތުގައި އެ މީހުންނަށް މާ ސީރިއަސް އަނިޔާތަކެއް ނުލިބެ އެވެ.
މި ހާދިސާ ހިނގީ ވިލިމާލޭގެ އިރު ދެކުނު ކަންމަތީގައި ޖަހާ ބްރިޖު ތަނބުގެ މަސައްކަތް ކުރުމަށް ޕްލެޓްފޯމް ބެހެއްޓުމުގެ މަސައްކަތް ކުރަމުން ދަނިކޮށް ކަމަށާއި ޕްލެޓްފޯމް އެންކާ ކުރަން އުޅުމުގެ ތެރޭގައި އެންކާއަށް ޓެކްނިކަލް މައްސަލަ ދިމާވެގެން ކަމަށް މިކަމާ ގުޅިގެން ޕްލޭނިން މިނިސްޓްރީން ނެރުނު ބަޔާނެއްގައި ބުންޏެވެ.
މައްސަލަ ދިމާވި ޕްލެޓްފޯމަކީ އާންމުކޮށް މިފަދަ މަސައްކަތްތަކުގައި ގެންގުޅޭ "ސެލްފް އެލެވޭޓިން ޕްލެޓްފޯމް" އެކެވެ. ހަމަ މި ސަރަހައްދުގައި މީގެ ކުރިން ވެސް މީގެ ޕްލެޓްފޯމްތައް ބަހައްޓައިގެން މަސައްކަތްކޮށްފައިވާ ކަމަށް ޕްލޭނިން މިނިސްޓްރީން ބުންޏެވެ.
ހާދިސާ ހިނގި ފަހުން 24 ގަޑިއިރުވީ ނަމަވެސް އަދިވެސް އެތަނުން ޕްލެޓްފޯމް ނުނެގެ އެވެ. ޕްލޭނިންގެ ބަޔާނުގައި ވަނީ ޕްލެޓްފޯމް ނެގުމުގެ މަސައްކަތް ކުރަމުންދާ ކަމަށެވެ. އިތުރު ތަފުސީލެއް ނުދެ އެވެ.
މި ހާދިސާއާ ގުޅިގެން ފަރަށް ލިބުނީ ކިހާވަރެއްގެ ގެއްލުމެއް ކަމެއް އަދި ސާފެއް ނޫނެވެ. މިފަދަ މައްސަލަތައް ބަލާ ދައުލަތުގެ އިދާރާ އެންވަޔަރަމެންޓަލް ޕްރޮޓެކްޝަން އެޖެންސީ (އީޕީއޭ)ން ވަނީ ފަރަށް ލިބުނު ގެއްލުން ދިރާސާ ކުރަމުންދާ ކަމަށް ބުނެފަ އެވެ.
މާލެ-ތިލަފުށި ބްރިޖު މަޝްރޫއުގެ ހުލާސާ
މާލެ-ތިލަފުށި ބްރިޖް މަޝްރޫއަކީ މިހާތަނަށް އެންމެ ބޮޑު ހޭދައެއްކޮށްގެން ސަރުކާރުން ހިންގާ ޕްރޮޖެކްޓެވެ. މުޅި ޕްރޮޖެކްޓަށް 7.7 ބިލިއަން ރުފިޔާ ހަރަދުވާނެ ކަމަށް ބެލެވޭ މި ބްރިޖުގެ ކޮންޓްރެކްޓަރަކީ އިންޑިއާގެ އެފްކޮންސް ކުންފުންޏެވެ.
މި ބިޔަ ޕްރޮޖެކްޓަށް ހަރަދުކުރަނީ އިންޑިއާ އެގްޒިމް ބޭންކު މެދުވެރިކޮށް ހަމަޖައްސާފައިވާ 400 މިލިއަން ޑޮލަރުގެ ކްރެޑިޓް ފެސިލިޓީގެ ތެރެއިންނާއި އިންޑިއާ ސަރުކާރުން ދޭ 100 މިލިއަން ޑޮލަރުގެ ހިލޭ އެހީންނެވެ.
ބްރިޖު ނިމުމުން ގްރޭޓާ މާލޭ ސަރަހައްދުގައި ހިމެނޭ ތިލަފުއްޓާއި ގުޅީފަޅާއި ވިލިމާލެ މާލެއާ ގުޅާލެވޭނެ އެވެ. އެއާއެކު ތިލަފުށިން ހުޅުމާލެއާ ހަމައަށް އެއްގަމު މަގުން ދަތުރުކުރެވޭނެ މަގުފަހި ވާނެ އެވެ.
މި ރަށްތައް ގުޅާލަން އަޅާ ބްރިޖާއި ކޯސްވޭ އަދި މަގުތަކުގެ ނެޓްވާކުގެ ދިގުމިނުގައި 6.7 ކިލޯމީޓަރު ހުންނާނެ އެވެ. މި ލިންކުގެ ބައިތަކުގެ ތެރޭގައި ތިން ބްރިޖާއި، ދެ މަގާއި، ކޮންމެ ރަށަކަށް އަރާ ފޭބުމަށް އިންޓަޗޭންޖް ޕޮއިންޓްތަކާއި، ޕާކިން ސަރަހައްދުތައް ގާއިމުކުރެވޭނެ އެވެ.
މާލެ-ތިލަފުށި ބްރިޖަކީ މި ސަރުކާރުގެ އިގުތިސޯދީ ތަސައްވުރާއި ސިޔާސަތުގެ މުހިންމު ބަޔެކެވެ. ނަމަވެސް މި ރިޔާސީ ދައުރު ނިމެންވާއިރަށް ބްރިޖުގެ މަސައްކަތް މުޅީން ނުނިމޭނެ އެވެ. މި ބްރިޖުގެ މަސައްކަތް އެއްކޮށް ނިންމާލެވެނީ މޭ 2024 އަށެވެ.
އެކަމަކު އަންނަ އަހަރުގެ މެދުތެރޭގައި މާލެއާ ވިލިމާލެއާ ގުޅާލެވި، އޮގަސްޓު ހިސާބުގައި ދަތުކުރަން ފެށޭނެ ކަމަށް ސަރުކާރުން އަންނަނީ ބުނަމުންނެވެ.
