ސައުދީ ރަސްގެފާނު ސަލްމާން ބިން އަބްދުލް އަޒީޒްގެ ފަރާތްޕުޅުން މި އަހަަރު ކައުބަތުﷲ ގެފުޅު ދޮވުމުގެ ހަފްލާގައި އިސްކޮށް އުޅުއްވީ ވަލީ އަހުދު މުހައްމަދު ބިން ސަލްމާން ކަމަށް ސައުދީ ޕްރެސް އެޖެންސީން ބުނެފި އެވެ.
ކޮންމެ އަހަރަކު ވެސް ގެފުޅު ދޮވުމުގެ ހާއްސަ ހަފްލާއެއް އޮވެ އެވެ. ކީރިތި ރަސޫލާގެ ސުންނަތާ އެއް ގޮތްވާ ގޮތުގެ މަތިން ކުރިއަށް ގެންދާ އެ މަސައްކަތުގައި ވަލީ އަހުދާ އެކު ސަައުދީގެ އެހެން ބައެއް އިއްޒަތްތެރިން ވެސް ބައިވެރިވެވަޑައިގެންނެވި އެވެ.
ގެފުޅު ދޮވުމުގައި ވަލީ އަހުދު އުޅުއްވާ މަންޒަރު ފެންނަ ވީޑިއޯއެއް ސައުދީ ޕްރެސް އެޖެންސީން ވަނީ ޓްވިޓާގައި އާއްމުކޮށްފަ އެވެ. އެ އެޖެންސީން ބުނީ ގެފުޅު ދޮވުމަށް ފަހު، ދެ ރަކުއަތުގެ ސުންނަަތް ނަަމާދެއް ކުރެއްވި ކަމަށެވެ.
ކަައުބަތުﷲ ގެފުޅުގެ ފާރުތަކާއި ތަޅުންގަަނޑު ދޮވެ ސާފުކުރަނީ ތަފާތު ދެ ގޮތަކަށެވެ. ގެފުޅު އެތެރޭގެ ފާރުތައް ދޮވުމަށް ބޭނުން ކުރަނީ ފިނިފެންމަލާއި ހުވަދުން ފޯކޮށްފައިވާ ހުދު ފޮތިކޮޅެކެވެ. ތަޅުންގަނޑު ދޮންނަނީ ޒަމްޒަމް ފެނާއި ފިނިފެންމަލުގެ ސެންޓު އެއްކޮށްގެން ތައްޔާރު ކުރާ ފެނަކުންނެވެ.
