ދިވެހިރާއްޖޭގެ ވެރިކަން ހިންގާ ނިޒާމު ބަރުލަމާނީއަށް ބަދަލުކޮށްފި ނަމަ ރައްޔިތުން ހާލުގައި ޖެހޭނެ ކަމަށް ހޯމް މިނިސްޓަރު އަދި އަދާލަތު ޕާޓީގެ ލީޑަރު އިމްރާން އަބްދުﷲ މިރޭ ވިދާޅުވެއްޖެ އެވެ.
ނިޒާމު ބަދަލު ކުރުމަށް މަސައްކަތް ކުރުމަށް ވެރިކަން ހިންގާ އެމްޑީޕީގެ ކޮންގްރެސްއަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ހުށަހަޅުއްވައި، އެކަމާ ގުޅޭ ގޮތުން ނޫސްވެރިންގެ ބައްދަލުވުމެއް ބާއްވާފައި އޮއްވާ މިރޭ ސޯޝަލް މީޑިއާގައި އިމްރާން ވިދާޅުވީ "ބަރުލަމާނީ ނިޒާމަކީ މިރާއްޖެއަށް އެކަށޭނެ ނިޒާމެއް ނޫންް" ކަމަށެވެ.
"ރާއްޖޭގެ މިއަދުގެ ހާލަތުގައި ބަރުލަމާނީ ނިޒާމު ގެނެސްފި ނަމަ ސިޔާސީ ހަމަޖެހުން ގެއްލި، އަވަސް އަވަހަށް ސަރުކާރު ބަދަލުވެ، ރައްޔިތުން ބައިބައިވެ، ރައްޔިތުން ހާލުގައިޖެހުން ފިޔަވައި އިތުރު މޮޅުކަމެއް ނުވާނެ،" އިމްރާން ޓުވިޓާގައި ލިޔުއްވާފައިވެ އެވެ.
ނަޝީދުގެ ނޫސްވެރިންގެ ބައްދަލުވުމަށްފަހު މިއަދު މި ނޫހާ ވާހަކަ ދައްކަވަމުން ފައްޔާޒު ވެސް ވިދާޅުވީ ނިޒާމު ބަދަލު ކުރުމަކީ ރަނގަޅު ގޮތެއް ނޫން ކަމަށެވެ.
"ރާއްޖެއަކީ ކުޑަ ގައުމަކަށް ވުމާއެކު ބަރުލަމާނީ ނިޒާމަކަށް ބަދަލުކުރުމުން ނުކުންނަ ނަތީޖާ ރަނގަޅު ވާނެ ކަމަށް ގަބޫލު ނުކުރެވޭ. ބަރުލަމާނީ ނިޒާމުގައި މަދު ބައެއްގެ އަތް ދަރަށް ސަރުކާރުގެ ކޮންޓްރޯލް ދާނެ. [އެއާ ހިލާފަށް] ރިޔާސީ ނިޒާމުގައި ހުރިހާ ރައްޔިތުންނަށް ބަސް ބުނުމުގެ ފުރުސަތު ލިބޭ،" އޭނާ ވިދާޅުވި އެވެ.
އެމްޑީޕީގެ ކޮންގްރެސް އޮންނާނީ އަންނަ ހުކުރު ދުވަހުން ފަށައިގެން އާދީއްތަ ދުވަހުގެ ނިޔަލަށެވެ. އެ ކޮންގްރެސް ވެގެންދާނީ ރާއްޖޭގެ ނިޒާމު ބަދަލު ކުރުމާމެދު މަޖިލީހުގެ ސުޕަ މެޖޯރިޓީ ކޮންޓްރޯލް ކުރާ އެމްޑީޕީން ގޮތެއް ނިންނާމެ ދުވަހަށެވެ.
