އޮސްޓްރޭލިއާގެ ކުރީގެ ބޮޑު ވަޒީރު ސްކޮޓް މޮރިސަން ސިއްރުން ތިން މިނިސްޓްރީއެއް ހިންގުމުގައި އިސްކޮށް އުޅުއްވި މައްސަލައެއް ބަލަން ފަށާފައިވާ ކަމަށް އާ ބޮޑު ވަޒީރު އެންތަނީ އަލްބަނީޒް ވިދާޅުވެއްޖެ އެވެ.
އޮސްޓްރޭލިއާގެ ނޫސްތަކުން ބުނީ މިދިޔަ މޭ މަހު މޮރިސަންގެ ސަރުކާރު ނިމުމަކަށް އައުމުގެ ކުރިން ދެ އަހަރު ދުވަހުގެ މުއްދަތަށް ހެލްތު، ފިނޭންސް އަދި ރިސޯސަސް މިނިސްޓްރީ ހިންގެވީ މޮރިސަން ކަމަަށެވެ.
އަލްބަނީޒް ވިދާޅުވީ އެކަމުގައި ގާނޫނީ ލަފާ ހޯއްދަވާނެ ކަމަށާއި އެއީ ބަލައިގަނެވޭނެ ނިންމުމެއް ނޫން ކަމަށެވެ. މޮރިސަން ވަނީ އެކަަމާ ގުޅޭ ގޮތުން އެއްޗެއް ވިދާޅުވާން ދެކޮޅު ހައްދަވާފަ އެވެ.
އޮސްޓްރޭލިއާގައި ރާނީގެ ފަރާތުން ހުންނަ ގަވަރުނަރު ޖެނެރަލް ޑޭވިޑް ހާލީ ހޯމަ ދުވަހު ވިދާޅުވީ މޮރިސަން ސިއްރުން ތިން މިނިސްޓްރީ ހިންގެވުމަށް ހުއްދަ ދިނީ ގާނޫނު އަސާސީއާ ހިލާފަށް ނޫން ކަމަށެވެ.
އެހެން ނަމަަވެސް އަލްބަނީޒް އާއި ގާނޫނީ ތަޖުރިބާކާރުން އަދި ކުރީ ސަރުކާރުގެ އިސްވެރިން ވެސް އަންނަނީ އެކަަން ސިއްރުކޮށްފައި އޮތުމުން ފާޑުކިޔަމުންނެވެ.
އޮސްޓްރޭލިއާގެ ނޫސްތަކުން ބުނީ ކުރީގެ ހެލްތު މިނިސްޓަރު ގްރެގް ހަންޓްއަށް ކޮވިޑް ޖެހި، މަސައްކަތް ނުކުރެއްވޭ ނަމަ، ބޮޑު ވަޒީރަށް ޒިންމާތައް އެރުވުމަށް ނިންމީ 2020 ގައި ކަމަށެވެ.
އެހެން ނަމަވެސް ކުރީގެ ފިނޭންސް މިނިސްޓަރު މެތަޔަސް ކޯމަންއަށް އެ މިނިސްޓްރީ ހިންގެވުމުގައި އޭރުގެ ބޮޑު ވަޒީރު މޮރިސަން އުޅުއްވިކަން އެނގިވަޑައިގެންނެވީ މިދިޔަ ހަފްތާގައި ނޫސްތަކުން އެކަަން ރިޕޯޓު ކުރުމުންނެވެ.
