މި ފަހަރުގެ ދެ ވަނަ ޑިވިޝަން ފުޓްބޯޅަ މުބާރާތުގައި ނިއު ރޭޑިއަންޓް ސްޕޯޓްސް ކްލަބުން ވާދަކުރަން ޖެހުނީ ސަސްޕެންޝަނުން ސަލާމަތްވެގެން، ކުރު މުއްދަތެއްގެ ތެރޭގައި ޓީމެއް އެކުލަވާލައިގެން ކަމަށާއި އަންނަ އަހަރުގެ ދެ ވަނަ ޑިވިޝަން ފުޓްބޯޅަ މުބާރާތަށް ފުރިހަމަ އަށް ތައްޔާރުވެގެން ނިއު އެނބުރި އަންނާނެ ކަމުގެ ޔަގީންކަން އެބައޮތް ކަމަށް އެ ޓީމުގެ ކޯޗު ސޮބާހު މުހައްމަދު އިބްރާހިމް (ސޮބާ) ބުނެފި އެވެ.
ފީފާ އާއި އެފްއޭއެމްގެ ސަސްޕެންޝަނެއްގައި މިދިޔަ ތިން އަހަރަށް ވުރެ ގިނަ ދުވަހު އޮތް ނިއު މި ފަހަރުގެ ދެ ވަނަ ޑިވިޝަނުގައި ވާދަކުރަން ތައްޔާރީތައް ފެށީ މަހަކަށް ވުރެ ވެސް ކުޑަ ދުވަސްކޮޅެއް ވެފައި އޮއްވަ އެވެ. ސަސްޕެންޝަނުން ސަލާމަތްވާން ކްލަބްގެ ދަރަނިތައް ނިންމައި، ނިއު އިން ދެ ވަނަ ޑިވިޝަނަށް ޓީމެއް އެކުލަވާލި ވެސް ގޮންޖެހުންތަކާ އެކުގަ އެވެ.
ސޮބާގެ އިރުޝާދުގެ ދަށުން ނިއު އިން ވަނީ ދެ ވަނަ ޑިވިޝަނުގައި ފުރަތަމަ ކުޅުނު ހަތަރު މެޗުން މޮޅުވެފަ އެވެ. އެއީ ކްލަބް ޓީނޭޖް، ލޮރެންޒޯ ސްޕޯޓްސް ކްލަބް، ވިކްޓަރީ ސްޕޯޓްސް ކްލަބް އަދި ބީޖީ ސްޕޯޓްސް ކްލަބް އެވެ. އެކަމަކު، ގްރޫޕްގެ ފަހު ދެ މެޗުން އެލްޓީ އަތުން ބަލިވެ، މަހިބަދޫ ސްޕޯޓްސް ކްލަބާ ވަނީ އެއްވަރުވެފަ އެވެ. ގްރޫޕްގެ ދެ ވަނަ ޓީމުގެ ގޮތުގައި ސެމީ ފައިނަލަށް ގޮސް، އިއްޔެ ސެމީ ފައިނަލުގައި ނިއު ވަނީ ޕެނަލްޓީ ޖަހައިގެން ބުރު ސްޕޯޓްސް ކްލަބް އަތުން ބަލިވެ، މުބާރާތުން ކަޓައިފަ އެވެ.
ނިއުގެ ކޯޗު ސޮބާ ސޯޝަލް މީޑިއާގައި ކުރި ޕޯސްޓެއްގައި ބުނެފައިވަނީ މި ނަތީޖާ ނިއު ސަޕޯޓަރުންނަށް ގަބޫލުކުރަން ފަސޭހަ ނުވާނެ ކަމަށެވެ.
"އަޅުގަނޑު މިކަމާ ކުރިމަތިލީ ވަރަށް ކެރިގެން ނިއު ރޭޑިއަންޓް އަކީ ރާއްޖޭގައި ވަރަށް ބޮޑު ހިސްޓްރީއެއް އޮތް ކްލަބެއްކަން ދަނެގެން. އަދި މީގެ ކުރިން ނިއު ރޭޑިއަންޓާ އެކު ބައިވަރު ކާމިޔާބު ހޯދާފައިވާ މީހެއްގެ ހައިސިއްޔަތުން މިކަން ކުރުމުގެ ހެޔޮ ނިޔަތުގައި، އަދި އުފާކުރަން އަޅުގަނޑު ދެކެ ލޯބިވާ އިތުބާރުކުރާ ގިނަ އަދަދެއްގެ ސަޕޯޓަރުން ތިބީމަ. އަބަދުވެސް ސަޕޯޓަރުން ބޭނުންވާ ނަތީޖާ އަކީ ޓީމު މޮޅުވުން،" ސޮބާ ބުންޏެެވެ.
"ހަގީގަތަކީ މި ފަހަރު އަލަށް ހަވާލުވި މެނޭޖްމަންޓްގެ ބުރަ މަސައްކަތުން ހަތަރު އަހަރަށް ފަހު ޓީމު މި އަހަރު ސަލާމަތްކުރިކަން. ކަންކަން ނިންމަން ޖެހުނީ ލިބިފައި އޮތް ޓައިމާ ބަލާފައި ވަރަށް އާޖެންޓްކޮށް އެލާޓްގައި ތިބެގެން. ފީފާ ބޭން ނެގީ މުބާރާތް ފެށެން ވަރަށް ކުޑަތަން ވެފައިވަނިކޮށް، ކުރަން ޖެހުނީ ވަރަށް ބުރަ މަސައްކަތްތަކެއް،"
ސޮބާ ބުނީ ފައިނަލަށް ދިއުމަކުން، އަދި ދެ ވަނަ ޑިވިޝަން ޗެމްޕިއަންކަން ދިއުމަކުން އަދި ފުއްދާލެވޭކަށް ނެތް ކަމަށެވެ. ފުރަތަމަ ޑިިވިޝަނަށް ކޮލިފައިވާން ރެލިގޭޝަން ކުޅެން ޖެހުމަކީ އުނދަގޫ މަރުހަލާއެއްކަން ފާހަގަކޮށް ސޮބާ ބުނީ ފުރަތަމަ ޑިވިޝަނަށް ޔަގީންކަމާ ކޮލިފައިވާން ވަރުގަދަ ސްކޮޑެއް ބޭނުންވާ ކަމަށެވެ.
"ނިސްބަތުން ބަލާއިރު (މި ފަހަރު) ލިބުނީ ވަރަށް ލިމިޓެޑް ތަޖުރިބާ ހުރި ކުޅުންތެރިންތަކެއް. ރާއްޖޭގައި މުބާރާތް ހިންގާ ގަވައިދު އަދި ފޯމެޓް އަހަރަކު އެއް ފަހަރު ބަދަލުވުމަކީ ވެސް އިތުރު ޗެލެންޖެއް،" ސޮބާ ބުންޏެވެ.
ސޮބާ ފާހަގަކުރި އެ ޗެލެންޖަކީ ފުރަތަމަ ޑިވިޝަނުން ރެލިގޭޝަން ކުޅެން އަންނަ ދެ ޓީމުގެ ފެންވަރު ހުރިހާ ގޮތަކުން ވެސް ރަނގަޅުވުމެވެ. މެޗު ފިޓްނަސް އާއި ކުޅުންތެރިންގެ ފެންވަރަށް ބެލިޔަސް ފުރަތަމަ ޑިިވިޝަނުގައި ގިނަ މެޗުތަކެއް ކުޅެފައި އަންނަ ދެ ޓީމާ ދެ ވަނަ ޑިވިޝަނުގެ ދެ ޓީމު ވާދަ ކުރުމަކީ ފަސޭހަަކަމެއް ނޫން ކަމަށް ސޮބާ ވަނީ ބުނެފަ އެވެ.
ކްލަބް ގްރީން ސްޓްރީޓްސް ފުރަތަމަ ޑިވިޝަނަށް ޕްރޮމޯޓް ކޮށްދިން ސޮބާ ބުނީ ފެންވަރު ރަނގަޅު ކުޅުންތެރިން ތިބި ރަނގަޅު ސްކޮޑެއް ނެތި ފުރަތަމަ ޑިވިޝަނަށް ޕްރޮމޯޓްވާން އުޅުމަކީ ވުުމަށް ވުރެ ނުވުން ކައިރި ކަމެއް ކަމަށެވެ.
"މިކަން ނޭނގޭ ބަޔަކު ކޮންމެ އެއްޗެއް ކީ ކަމުގައި ވިޔަސް ﷲ ދެނެވޮޑިގެންވާނެ ޓީމެއްގެ ގޮތުގައި ކަންކަން ރަނގަޅުކުރަން އެންމެން ކުރި ބުރަ މަަސައްކަތް. މި ފަަހަރު ޔަގީނުން ވެސް ފާހަގަވި އަދި ފެނުނު މަންޒަރަކީ ނިއު ރޭޑިއަންޓް، ވިކްޓަރީ އެނބުރި އައުމާ އެކު ދަނޑަށް ދިރުން ލިބުނުކަން. ފުޓްބޯޅައިގެ ރޫހު އޮތްކަން. ނިއު ރޭޑިއަންޓް ދެ ވަނަ ޑިވިޝަނުގައި ކުޅުނު ކަމުގައި ވިޔަސް ރާއްޖޭގެ ޓޮޕް ޑިވިޝަނަށް ވުރެ ގިނަ ބަޔެއްގެ ސަމާލުކަން ހުއްޓިގެންދިޔަކަން. މުބާރާތް ފޮލޯކުރިކަން،" ސޮބާ ބުންޏެވެ.
"އިންޝާﷲ ނިއު ރޭޑިއަންޓް ފުރިހަމަ އަށް ތައްޔާރުވެ އެނބުރި އަންނާނެކަމުގެ ޔަގީންކަން އެބައޮތް،"
ދެ ވަނަ ޑިވިޝަނުގެ ފައިނަލަށް ދިޔަ ކްލަބް ޓީނޭޖާއި ބުރު ސްޕޯޓްސް ކްލަބަށް ވަނީ އަންނަ އަހަރުގެ ދިވެހި ޕްރިމިއާ ލީގަށް ޕްރޮމޯޓްވާން ކޮލިފިކޭޝަން ކުޅެން ފުރުސަތު ލިބިފަ އެވެ. އެ ދެ ޓީމު ކުޅެން ޖެހޭނީ މި ފަހަރުގެ ދިވެހި ޕްރިމިއާ ލީގުގެ ފަހަތުގައި އޮތް ސުޕަ ޔުނައިޓެޑް ސްޕޯޓްސް (ސަސް) އާއި ދަ ގްރާންޑޭ ސްޕޯޓްސް ކްލަބާ އެވެ. މި ހަތަރު ޓީމުގެ މެދުގައި ލީގު ބުރެއް ކުޅުމަށް ފަހު އެންމެ ގިނަ ޕޮއިންޓް ހޯދާ ދެ ޓީމެއް ފުރަތަމަ ޑިވިޝަނަށް އަރާނެ އެވެ.
ސަސްޕެންޝަނުން ސަލާމަތްވެ، ވިކްޓަރީ އާއި ނިއު އަށް ފުރަތަމަ އަހަރުގައި ފުރަތަމަ ޑިވިޝަނަށް ޕްރޮމޯޓްވާން ކުރި މަސައްކަތުގައި ލިބުނު ނާކާމިޔާބީން ފިލާވަޅު ނަގައި އަންނަ އަހަރު ވަގުތު ލިބިގެން ރަނގަޅަށް ތައްޔާރުވާނެކަމަށް ބެލެވެ އެވެ.
