މަރުގެ އަދަބު ތަންފީޒުކުރުމަކީ ތާއީދުކުރައްވާ ކަމެއް ކަމަށާއި އެހެން ނަމަވެސް ރާއްޖޭގެ ޝަރުއީ ނިޒާމުގައި ކަންތައްތައް ވަމުން އަންނަ ގޮތަކީ އެކަމަށް އޮތް ހުރަހެއް ކަމަށް ކުރީގެ ރައީސް އަބްދުﷲ ޔާމީން ވިދާޅުވި ކަމަށް ރިޕޯޓްކުރީ އިއްޔެ އެވެ.

ގިނަ ދުވަސްތަކަކަށް ފަހު ރައީސް ޔާމީން ބުރާސްފަތި ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައިި އެ މަނިކުފާނު ވިދާޅުވީ މަރަށް މަރު ހިފުމަށް އެޅިފައިވާ ގިނަ ހުރަސްތަކެއް އެބަހުރި ކަމަށާއި ޝަރުއީ ނިޒާމުގައި ކަން ހިނގާ ގޮތަކީ އޭގެ އެއް ހުރަސް ކަމަށެވެ. އެމަނިކުފާނު ވިދާޅުވީ ޝަރުއީ މަރުހަލާ ފެށޭ ހިސާބަކީ މައްސަލައެއްގެ ތަހުގީގު ކަމަށް ވާއިރު ރާއްޖޭގައި ކުރާ ޖިނާއީ ތަހުގީގުތަކަށް ރައްޔިތުންގެ އިތުބާރެއް ނެތް ކަމަށެވެ.

"ދިވެހިރާއްޖޭގައި ތަހުގީގުތައް މިކުރެވެނީ ކިހިނެތްތޯ؟ ދިވެހިރާއްޖޭގައި މިކުރެވޭ ތަހުގީގުތަކާ ދޭތެރޭގައި ރައްޔިތުންގެ އެއްވެސް ކަހަލަ އިތުބާރެއް އެބަ އޮތްތޯ؟،" އެ މަނިކުފާނު ވިދާޅުވި އެވެ.

ރައީސް ޔާމީންގެ ވެރިކަމުގައި ފުލުހުންގެ ހިދުމަތް ހަރާބުވެ، އިންޓެލިޖެންސްގެ މައުލޫމާތު ވެސް އެ މަނިކުފާނާ ހިއްސާ ނުކޮށް ދުވަސްތަކެއް ދިޔަ ކަމަށް ވެރިކަމުގައި ވިދާޅުވެފައިވެ އެވެ.

އެމަނިކުފާނު ވިދާޅުވި ގޮތުގައި މަރަށް މަރުހިފުމަކީ އެމަނިކުފާނު ގަބޫލުކުރައްްވާ ކަމަކަށް ވިޔަަސް ރާއްޖޭގައި ކުރާ ތަހުގީގުތަކުގެ ފޭރާން [ރަނގަޅުކަމަށް] އެމަނިކުފާނު ގަބޫލެއް ނުކުރައްވަ އެވެ. ތަހުގީކުރާ ގޮތާއި ފަނޑިޔާރުން އަމަލުކުރައްވާ ގޮތްތަކަށް ބޮޑެތި ބަދަލުތަކެއް އަންނަން ޖެހޭ ކަމަށް ވެސް އެމަނިކުފާނު ވިދާޅުވި އެވެ.

"ގިސޯސްއާ ދޭތެރޭގައި އަދިވެސް އަޅުގަނޑުގެ ވިސްނުމަކަށް ބަދަލެއް ނާދޭ. އެހެން ނަމަވެސް އޭގައި ހުރި ހުރަސްތައް، އޭގައި ހުރި އުނދަގޫތައް މި ދެންނެވީ. ތަހުގީގުގެ ފޭރާމާ، ތަހުގީގުކުރާ އިރު ޕްރިޖުޑިސް އޮވޭތޯ، ތަހުގީގުކުރާ އިރު ފްރޭމްކުރުމުގެ މަސައްކަތް ކުރެވޭތޯ. ތަހުގީގުގެ ކޮލިޓީއަކީ ކޮބައިތޯ، ފަނޑިޔާރުންނާ ހަމައަށް ދިޔައިމަ ކަންތައްތައް ހިނގަމުންދާ ގޮތް،" ޔާމީން ވިދާޅުވި އެވެ.

ރާއްޖޭގައި ސުޕްރީމްކޯޓުން ނިންމާފައި ހުރި ބައެއް ނިންމުންތައް ހަމަ ސުޕްރީމް ކޯޓުން ބަދަލުކޮށްފައި އެބަހުއްޓެވެ. ޔާމީން ސުވާލުކުރެއްވީ މީހަކު މަރާލާފައި (މީހަކަށް މަރުގެ އަދަބުދީފައި) ކުރިން ކޮށްފައިވާ ހުކުމެއް އެގޮތަށް މުރާޖައާ ކުރާނީ ކިހިނެތްތޯ އެވެ.

"މިހާރު ސުޕްރީމް ކޯޓުން ނިންމަވާފައި އޮންނަ އެތައްް މައްސަލައެއް، އަނެއްކާވެސް ހަމަ އެ ސުޕްރީމްކޯޓުން ނިންމަވާފާނެ އަލުން މުރާޖައާކޮށްފަ އަނެއްކާވެސް ނިއުޅާލަނީ އެއީ ނުވާ ކަންތައްތައް ގޮތަށް. މަދެއް ނޫން ދެއްތޯ އެގޮތަށް ނިންމަވާފައި ހުރި ކަންތައްތައް،" އެ މަނިކުފާނު ވިދާޅުވި އެވެ.

އެމަނިކުފާނު ވިދާޅުވި ގޮތުގައި އެމަނިކުފާނުގެ ވެރިކަމުގެ ފަސް އަހަރު ތެރޭގައި މަރުގެ އަދަބު ތަންފީޒުކުރަން ނުފެށުނީ މަރުގެ ހުކުމެއް ޝަރުއީ އެންމެ ފަހު މަރުހަލާއާ ހަމައިން ނިމިގެން އައިސްފައި ނުވާތީ އެވެ. އޭގެ އިތުރަށް އެ އަދަބު ތަންފީޒުކުރާނެ ގޮތްތަކާ ގުޅޭ ގޮތުން ވެސް ބޮޑެތި ދަތިތައް ހުރި ކަމަށް ވިދާޅުވި އެވެ.

ބައެއް މުހިންމު ހަބަރުތައް

• މ. ދިއްގަރާއި ތ. ގާދިއްފުށީގައި ކައުންސިލުން ހުސްވެފައިވާ ދެ މަގާމަކަށް މެންބަރުން ހޮވުމަށް އިއްޔެ ބޭއްވި ބައި އިލެކްޝަން ކާމިޔާބުކުރީ ވެރިކަންކުރާ އެމްޑީޕީންނެވެ.
• ދުނިޔޭގެ އެންމެ ދުވަސްވީ އަދި ފުޅާދާއިރާއެއްގައި ވަޔާ ޓްރާންސްފާ ހިދުމަތް ދެމުންދާ ވެސްޓަން ޔޫނިއަންގެ ރާއްޖޭގެ ލޯކަލް ޕާޓްނަރު، އައިލެންޑް ފައިނޭންޝަލް ސާވިސަސްއަށް ދޫކޮށްފައިވާ ރެމިޓަންސް ލައިސެންސް ހިފެހެއްޓުމާ ގުޅިގެން އެ ހިދުމަތް ރާއްޖެއިން ހުއްޓިފައިވާކަން އިއްޔެ ރިޕޯޓްކުރި އެވެ.

• ރާއްޖެ ހިމެނޭގޮތަށް މެލޭޝިއާ، ސިންގަޕޫރު އަދި ސީޝެލްސް ފަދަ ގައުމުތަކުގެ ޑްރަގް ޑީލަރުންނާ ގުޅުން އޮންނަ ލަންކާގެ ޑްރަގު ވިޔަފާރީގެ ބޮޑެއް ކަމަށް ބެލެވޭ ނަދުން ޗިންތަކަ ވިކްރަމްރަތުނަ އަލިއަސް ހަރަކަ ކަޓާ އެގައުމުގެ ފުލުހުން ހައްޔަރުކޮށްފި އެވެ.

• ބައިނަލްއަގްވާމީ ޒުވާނުންގެ ދުވަސް ފާހަގަ ކުރުމަށް ހދ. ކުޅުދުއްފުށީގައި ބާއްވާ ހަރަކާތްތަކުގައި ބައިވެރިވެވަޑައިގަތުމަށް ނައިބު ރައީސް ފައިސަލް ނަސީމް އިއްޔެ އެ ރަށަށް ވަޑައިގަތެވެ. އަދި މި ދަތުރުފުޅުގައި އެ އަތޮޅު ނޮޅިވަރަމްއަށް ވެސް ވަޑައިގަތެވެ.

ރިސޯޓްތަކުން ޕެޓް ޕްލާސްޓިކް އެއްކޮށް، ރަނގަޅު ގޮތުގައި ބޭނުންކުރަން މޯލްޑިވްސް އޯޝަން ޕްލާސްޓިކްސް އެލަޔަންސް (މޯޕާ) އިން ކުރިއަށް ގެންދާ ޕްރޮގްރާމްގައި އައްޑޫ އީކުއޭޓާ ވިލެޖް ރިސޯޓުން ބައިވެރިވިކަން އެ ޖަމިއްޔާއިން ހާމަކުރީ އިއްޔެ އެވެ.

ދުވަހުގެ ކޯޓޭޝަން

މަރަށް މަރު ހިފުމަށް ކުރީގެ ރައީސް ޔާމީންގެ ވެރިކަމުގައި ވަރަށް ބޮޑަށް ތައްޔާރުވިޔަސް އެކަން ތަންފީޒެއް ނުކުރެ އެވެ. އެކަން ތަންފީޒު ނުކުރި ނަމަވެސް ވިސްނުމަށް ބަދަލެއް ނާންނަ އެކަނިކުފާނު ވިދާޅުވީ ބުރާސްފަތި ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގަ އެވެ.

"ގިސޯސްއާ ދޭތެރޭގައި އަދިވެސް އަޅުގަނޑުގެ ވިސްނުމަކަށް ބަދަލެއް ނާދޭ. އެހެން ނަމަވެސް އޭގައި ހުރި ހުރަސްތައް، އޭގައި ހުރި އުނދަގޫތައް މި ދެންނެވީ. ތަހުގީގުގެ ފޭރާމާ، ތަހުގީގުކުރާ އިރު ޕްރިޖުޑިސް އޮވޭތޯ، ތަހުގީގުކުރާ އިރު ފްރޭމްކުރުމުގެ މަސައްކަތް ކުރެވޭތޯ. ތަހުގީގުގެ ކޮލިޓީއަކީ ކޮބައިތޯ، ފަނޑިޔާރުންނާ ހަމައަށް ދިޔައިމަ ކަންތައްތައް ހިނގަމުންދާ ގޮތް،"

ދުވަހުގެ ފޮޓޯ

އެފްއޭ ކަޕް ފުޓްބޯޅަ މުބާރާތުގެ ކުއާޓާ ފައިނަލުގައި ރޭ ވެލެންސިއާ އާއި ދަ ގްރާންޑޭ ސްޕޯޓްސް ކްލަބް ކުޅުނު މެޗްގައި ވެލެންސިއާގެ އަސްހަދު އަލީ ގޯލް ޖެހުމަށް ފަހު އުފާ ފާޅުކުރަނީ. ރޭގެ މެޗްގައި 2-1 އިން ދަ ގްރާންޑޭ ބަލިކޮށް ކްލަބް ވެލެންސިއާ އިން މުބާރާތުގެ ސެމީ ފައިނަލުން ވަނީ ޖާގަ ހޯދާފައި. -- ފޮޓޯ: އިމޭޖަސް.އެމްވީ