ހެލްސިންކީ، ފިންލެންޑް (އޮގަސްޓް 11) - އެއިންޓްރަކްޓް ފްރޭންކްފާޓް އަތުން 2-0 އިން މޮޅުވެ، ރެއާލް މެޑްރިޑުން ފަސް ވަނަ ފަަހަރަށް ސުޕަ ކަޕްގެ ޗެމްޕިއަންކަން ހޯދައިފި އެވެ.
މިއީ 14 ފަހަރު ޗެމްޕިއަންސް ލީގު ކާމިޔާބުކޮށްފައިވާ ރެއާލުން ސުޕަ ކަޕް ކާމިޔާބުކުރި ފަސް ވަނަ ފަހަރެވެ. އެ ފަސް ފަހަރުގެ ތެރެއިން ދެ ފަހަރު މުބާރާތުގެ ތަށި އުފުލާލީ ކާލޯ އަންޗެލޮޓީގެ ކޯޗުކަމުގަ އެވެ. މީގެ ކުރިން އަންޗެލޮޓީ ވަނީ ރެއާލާ އެކު 2014 ވަނަ އަހަރުގެ ސުޕަ ކަޕް ވެސް ހޯދައިފަ އެވެ. ދެން، ރެއާލުން ސުޕަ ކަޕް ހޯދީ 2002، 2016، 2017 އަދި މި އަހަރު އެވެ.
ރޭގެ މެޗަށް ފަހު އަންޗެލޮޓީ ބުނީ ފްރޭންކްފާޓުން ރާވައިގެން ތިބި ގޮތުން ރޭގެ މެޗު ރެއާލަށް އުނދަގޫވި ކަމަށާއި އެހެން ނަމަވެސް ދެ ގޯލު ޖަހައިގެން މެޗުން މޮޅުވެ، މި ކާމިޔާބު ހޯދުމުން އުފާކުރާ ކަމަށެވެ.
ރެއާލުން ރޭގެ މެޗުގައި ގޯލެއް ޖެހޭތޯ ކުރަމުންދިޔަ މަސައްކަތް ކާމިޔާބުވީ މެޗުގެ 37 ވަނަ މިނިޓްގަ އެވެ. ކޯނަރެއްގައި ހުރަސްވި ބޯޅައެއްގައި ރެއާލްގެ ކަރިމް ބެންޒެމާ ބޮލުން ޖައްސާލި ބޯޅައެއް ބޭރުވާން ދަނިކޮށް ގޯލު ކުރިމައްޗަށް ހުރަސްކޮށްލައި ދިނީ ކަސެމީރޯ އެވެ. އެ ވަގުތު، ކުޑަ އޭރިއާ ކައިރީގައި ހުސްކޮށްހުރި ޑޭވިޑް އަލަބާ އަށް ބޯޅަ ލިބުމުން ފަސޭހައިން ގޯލަށް ފޮނުވާލި އެވެ.
ފްރޭންކްފާޓުން ދެ ވަނަ ހާފްގައި ކުޅުން ރަނގަޅުކޮށް ނަތީޖާ ހަމަހަމަކުރެވޭތޯ ބެލި އެވެ. އެހެން ނަމަވެސް މެޗުގެ 65 ވަނަ މިނިޓްގައި ރެއާލްގެ ބެންޒެމާ ވަނީ އެ ޓީމަށް ލީޑުފުޅާކޮށްދީފަ އެވެ. ވިނީޝިއުސް ޖޫނިއާ ނެގި ހުރަހަކުން އޭރިއާ ރޮނގުކައިރީގައި ހުރެފައި އެއް ފަަހަަރުން ބެންޒެމާ ޖެހި ޝޮޓް، ފްރޭންކްފާޓްގެ ކީޕަރު ކެވިން ޓްރަޕް އަތްކައިރިން ވަނީ ގޯލަށެވެ.
މިއީ ބެންޒެމާ ރެއާލަށް ޖަހައިދިން 324 ވަނަ ގޯލެވެ. އޭނާ އަށް ވުރެ ގިނަ ގޯލު ރެއާލަށް ޖަހައިދިން ހަމައެކަނި ކުޅުންތެރިއަކީ 450 ގޯލު ޖެހި ކްރިސްޓިއާނޯ ރޮނާލްޑޯ އެވެ.
ޔުއެފާ ޗެމްޕިއަންސް ލީގުގެ ޗެމްޕިއަނާއި ޔޫރޮޕާ ލީގުގެ ޗެމްޕިއަން މެދުގައި ޔޫރަޕްގެ ފުޓްބޯޅަ ސީޒަން ފަށްޓަން ކުޅޭ ސުޕަ ކަޕް މެޗުގައި މި ފަހަރު ވަނީ ސެމީ އޮޓޮމެޓިކް އޮފްސައިޑް ސިސްޓަމް ބޭނުންކޮށްފަ އެވެ.
