ހއ. ދިއްދޫގައި 75 ހައުސިން ޔުނިޓު އެޅުމުގެ މަސައްކަތް ބަޔަކާ ހަވާލުކޮށްފި އެވެ.
ޑިޒައިން އެންޑް ބިލްޑް އުސޫލުން އެ މަސައްކަތް ހަވާލުކޮށްފައި ވަނީ އެސްޖޭ ކޮންސްޓްރަކްޝަން ޕްރައިވެޓް ލިމިޓެޑާ އެވެ.
ޖުމްލަ 120،405،400.00ރ. އަށް މި މަޝްރޫއުގެ މަސައްކަތް ހަވާލުކޮށްފައިވަނީ އެއް އަހަރު ދުވަހުގެ ތެރޭގައި ނިންމުމަށެވެ.
މިއީ ތިން ކޮޓަރީގެ ރޯހައުސްތަކެކެވެ. ކޮންމެ ރޯ ހައުސްއެއް ވެސް ހުންނާނީ ދެ ފަންގިފިލާއަށެވެ. ކޮންމެ ހައުސިން ޔުނިޓެއްއްގައި ތިން ފާހަނާ އާއި ސިޓިންގްރޫމް، ބަދިގެ، ކާގެ، ލޯންޑަރީ އަދި ސްޓޯ ރޫމެވެ.
މީގެ އިތުރުން ޕާކަކާއި ވެހިކަލް ޕާކް ކުރާނެ ތަނެއް ވެސް އެ ތަނުގައި ގާއިމް ކުރަން ވަނީ ނިންމާފަ އެވެ.
މި އެއްބަސްވުމުގައި ޕްލޭނިން މިނިސްޓްރީގެ ފަރާތުން ސޮއިކުރެއްވީ ހައުސިން ޑިޕާޓްމެންޓު ޑިރެކްޓަރު އަހުމަދު ވިޝާން ނަސީމެވެ. އެސްޖޭ ކޮންސްޓްރަކްޝަން ޕްރައިވެޓް ލިމިޓެޑްގެ ފަރާތުން ސޮއިކުރެއްވީ އެ ކުންފުނީގެ އެމްޑީ މުހައްމަދު ޝާހިދެވެ.
